1 Hayu Melekisadeki awelili nkosi wa mlima wa Selemu, na mtambika wa Sapanga Mkulu. Abulahamu paawelili anguhuya kuhuma kungondu kula awelili kawakoma wankosi, Melekisadeki akakongine nayu, akamhighila. 2 Hinu Abulahamu akampegha lilundila limonga lya ikumi lya vindu vyogha atolili haku, lihina lya Melekisadeki lingumaanisa, "Nkosi mweni kubhaghula ng'ogha," na kangi ni nkosi wa kumahala wapakema Salemu, ingumaanisa "Nkosi wa kulikala kwa kuponga." 3 Hayu kahela Tati hilahila nyongu, kahela ukolu, kahela mtumbulo hilahila hata mwihu wa machuwa ghaki. Melikisadeki ni handa Mwana wa Sapanga, mweni anguyendelela kuwela mtambika machuwa hyogha bila mwihu. 4 Hinu mumuwachilile vila mundu hayu kawela mkulu, hata mnahota wa twenga mkulu Abulahamu akampegha lilundila limonga lya ikumi lya vindu vyogha atolili kungondu. 5 Hinu tungumanya yiwa kukovekelana na selia gha Sapanga ampeghili musa, wawelekwa wa Lawi wala wenikuwela ni watambika, wangupalwa kutola mahala gha lilundila lya ikumi kuhuma kwa wandu, ingumaanisa walongo wa weni, pamonga na yiwa na weni hilahila ni wawelekwa wa Abulahamu. 6 Ila hayu Melekisadeki kawela ng'ogha wa ukolu wa Lawi, pamonga na hagha akapokela mahala gha lilundila lya ikumi kuhuma kwa Abulahamu, kangi akamuhighila Abulahamu mundu avile kalongelwa yiwa atepeghwa kila akilongelile Sapanga. 7 Kwahela utatala yiwa hayu mweni kuhighila ni mkulu kupiti yula mweni kuhighilwa. 8 Hilahila, hagha watambika weni kupokela lilundila lya ikumi, ni wandu weni kuhova, ila haku yula mweni kupokela lipinga lya ikumi, hayu Melekisadeki, ingulongwa yiwa anguyendelele kulama handa yailongile Mayandiko gha Sapanga. 9 Hinu tunguwesa kulonga nagha, lipindi Abulahamu pakayegha lilundila lya ikumi lya hindu ghaki, Lawi hilahila ayeghili kupitila kwa Abulahamu. 10 Hinu tunguwesa kulonga yiwa hata Lawi mweni kupokela lilundu lya ikumi kuhuma kwa walongo ghaki, na mweni apeghili lilundu lya ikumi kwa Melekisadeki kupitila kwa Abulahamu. 11 Waizilaili wapeghilwi selia na Sapanga na selia hazi zihumila kwa utambika wa Walawi. Ila utambika hau uwelili na malepelelu, hinu ikapalwa uhiki utambika ghangi handa wa Melekisadeki ulandana ng'ogha na hula wa Haluni. 12 Kwaikiva utambika paughalambuka, hilahila selia ingupalwa ighalambuki. 13 Hilahila Bambu wa twenga yula wangumlongela kumighalu hai, awelili mundu wa likabila ghangi na kwahela mundu wa likabila lyaki kawesa kutumikila kulughanja akiwela handa mtambika. 14 Kwaikiva ni chakaka yiwa Bambu wa twenga ahumili kukiwelekwa kya Yudasi, kivile Musa kakikema ng'ogha paawelili angulongela kwa habali gha watambika.

15 Kangi mghalu hau ni chakaka nesu, mtambika ghangi mwenikulandana na Melekisadeki kawoneka kala. 16 Mweni kagholwa ng'ogha kuwela mtambika kwa selia na malaghilo gha wandu, ila awelili mtambika kwa makakala gha ukomu ghaki uwela ng'ogha na mwihu. 17 Kwaikiva Mayandiko yangulonga yiwa, "Wenga ni mtambika machuwa hyogha bila mwihu kwa mlandano wa Melekisadeki." 18 Hinu hila selia gha dahile gha yeni kulongelela utambika iyalamiswa kwaikiva gha kuwela ipola kala na gha maha ng'ogha. 19 Kwaikiva selia iyegha ng'ogha utimililo kwa mghalu wowosi. Ila hinaa, kwa njila ghangi tuyeghelwa litumaini maha nesu, na kwa kuwela kwa litumaini hali tunguwesa kumuheghelela pabehi Sapanga. 20 Kupiti hyogha, Lipindi Walawi wanguvikwa kuwela watambika kuwelili ng'ogha na kilapo ila haku kuvile na kilapo kya Sapanga. 21 Ila Yesu agholilwi kuwela mtambika kwa kilapo, pala Sapanga paamlongelili, "Bambo kalapa, na mweni ateghalambula ng'ogha lukani lwaki, ‘Wenga ni Mtambika machuwa hyogha bila mwihu.’" 22 Hinu kwa kuwela na kilapo haki, Yesu ni chakaka wa lilaghano maheli nesu kuhuma kwa Sapanga kwaikiva gha wandu ghaki. 23 Kwaikiva watambika wala waghangi wawelili wandu hela, hinu lipindi lyao lya kuhova palihikile wakahova wakotoho kuyendelela na mahengu ghao na hai ndiwa kwaikiva wakawoneka watangala. 24 Ila kwaikiva Yesu angulama machuwa hyogha bila mwihu, na utambika ghaki uvile ng'ogha na mwihu. 25 Hinu mweni anguwesa kuwalakola wala wangumuyendela Sapanga kwa kupitila mweni, kwaikiva mweni angulama machuwa hyogha bila mwihu na kuwayupila kwa Sapanga, 26 hinu Yesu ndiwa angupalwa kuwela Mtambika Mkulu kwaikiva gha twenga, kana sambi ng'ogha wala uhakata mghati mwaki, Sapanga ambhaghulile kuhuma kwa waghola sambi na akamkwelesa kundumba. 27 Mweni kapala ng'ogha kuyegha litambiku kila lelo handa watambika waghangi wakulunga, akitumbula kwa sambi syaki mweni, na kuulongola sambi sya wandu wogha. Kwaikiva kaghola vila lihanja limonga hela lipindi pakajitola mweni kuhova. 28 Kukovekelana na Selia gha Sapanga ampeghili Musa wandu wawelili wakivikwa kuwela watambika pamonga na yiwa wawelili waghola sambi ila kuulongolo Sapanga amhaghulila Mwana ghaki aweli mtambika mkulu avile katimila machuwa hyogha bila mwihu.