1 Kwaikiva kila mtambika mkulu kahaghulilwa paghati gha wandu anguwela kwaikiva gha wandu kumighalu ingumlongelela Sapanga, ili apati kuyegha hupo na matambiku ili wandu walekeselwi sambi. 2 Kwaikiva mweni hilahila kalepelelwa, hinu anguwesa kuwagholela ulungwana wala wandyungi na wala weni kuwela wayuyughu kukweghwa kumteghu wa sambi. 3 Kwa nagha ingumpala kuyegha litambiku kwaikiva gha sambi zyaki mweni na hilahila kwa sambi zya wandu waghangi. 4 Kwahela mundu kangujihaghula kuwela Mtambika Mkulu mweni ngamweni. Ila angupalwa kukemwa na Sapanga handa vila Haluni akemilwi. 5 Hilahila Kilisito kaipegha ng'ogha mweni utundamilu wa kuwela Mtambika Mkulu, ila ni Sapanga ndiwa amlongelili yiwa, "Wenga ni mwana ghangu, nenga lelo niwela Tati ghako." 6 Hilahila kumahala ghangi angulonga,

"Wenga ndiwa mtambika machuwa hyogha bila mwihu,

kulihengu lya utambika wa Melekizedeki." 7 Yesu paawelili akilikala haku kumlimawogha, ayupili na kumluwa Sapanga kwa kililo kikulu na masosi, kwa yula awelili na uweso wa kumlokola kukihu, na mweni akahyoghanilwa kwaikiva gha kumtundamila Sapanga. 8 Pamonga na yiwa awelili Mwana wa Sapanga, aivulili kuyitikila kupitila maghaso yamkolili. 9 Pakayomola kugholwa aweli katimila, Yesu akawela mtumbulo wa ulokola wa machuwa hyogha bila mwihu kwa wandu wogha wamtundamila. 10 Hinu Sapanga kamvika kuwela Mtambika Mkulu handa awelili Melekizedeki.

11 Tuvile na milando mitangala gha kulongelelela habali gha utambika hau, ila yuyughu ng'ogha kuyalongela, kwaikiva mwenga ni watopa wa kumanya. 12 Uchakaka ni yiwa lipindi hali hinaa mwenga mngalipalwa kuwela wavula, ila mmbila mngupala kuvulwa kangi ghala mavulo gha mtumbulo wa ukwinila, badili gha kupala mulyo ukamala mwenga mngupala maweli. 13 Kwaikiva yula anguyonga maweli weka hayu kambila mwana mnung'una, kwa nagha angumanya ng'ogha haki maha au haki kihakata. 14 Ila wandu weni kukamala ndiwa wani kulyegha milyo ikamala, wala wavulilwi kwa milandano kulekanisa maheli na mahakata.