1 O elaka ɛkɛndiamaki Isalaele na batɛndi, molaka mo nzala mokitaki o ehe ɛ nɛnɛ. Na boiko, moto ɔmɔ o Bɛtɛlɛmɛ e Yuda ahaki nde na mwali na bana banande ba mele bape; bahaki nokiha ngano elaka o ehe ɛ nɛnɛ e Moaba*. 2 Moto ɔlɔkɔ lina inande Elimɛlɛkɛ, mwali onande lina Naomi mpe bana banande ɔnɛ lina Maloni mpe onkina lina Kilioni; baliki ɔ mɔnkɔndu monka Epalata o Bɛtɛlɛmɛ e Yuda*. Baiyaki o ehe ɛ nɛnɛ e Moaba mpe bakihaki, 3 Elimɛlɛkɛ aowa mpe Naomi aopali nde na bana banande bape ba mele. 4 Balɔkɔ baobala bahi Moaba; ɔmɔ lina Ɔlipa mpe onkina lina Luta. O mbiha e mebu liomu, 5 Maloni na Kilioni mpe baowa. Naomi aopali nko nde kaika, ngana mpamba mpe bome mpamba.

6 Boiko Naomi akɔlɔngɔnɔki nde na makilo ma nande ma bainto nɔbɛlɛ o ehe e Moaba, na itina aokaki lotepwama mbɔ Nkolo aepwa bato banande nobabɛliela biomba bi ndei. 7 Na boiko, babɛlɛki o ehe ɛlɔkɔ ekihaki nde na makilo noisia o Yuda; ya o mboka, 8 Naomi aoywebia makilo ma nande ma bainto mbɔ: «Bɔnsɔ, boisia moto na moto onka nyango e nande. Tika Nkolo abokelele boboto nga bokelaki inyo onka bawi mpe onka mi mɔmɛnɛ! 9 Tika Nkolo abopae ɔmɔ na ɔmɔ ɛmɛngɔ noyala o itumba inande i ibala!» Mpe Naomi aobabwatela nolamwa na balɔkɔ, ya balɔkɔ baototwa penda na bilelo. 10 Ombiha baomoisenyele bɔnɛ: «Boiko pɔ! Tohaka mputa na wɛ kii o bokundu bɔwɛ.» 11 Ya Naomi aisiaki nko nobaebia: «Bana bami ba bainto, boisia o makundu manyainyo. Itina iondi inyo noha mputa na mi be? Tingoisia nobota bamɔ bana ba mele baɔhɔ noisia nobobala*. 12 Boisia onka inyo. Bonkambie. Na itina naya engambi tingoisia nobala. Na kaki mpe naohanga: "Nale na elikia nobota, mpe o botio bɔ lɛlɔ naoputana na mwele mpe naobota bana ba mele", 13 Bɔngɔhɔ nobalila kii oula balɔkɔ? Bongoyabaka noyala nko bala na boili balɔkɔ? Boiko pɔ, bana bami ba bainto! Na itina, mahɛi ma mi mapenda ma nyainyo, ikata inka Nkolo ionzokia liale penda.»

14 Na boiko, makilo ma mape ma bainto baisiaki nko nototwa na bilelo. Ombiha, Ɔlipa aobwatela nyango e na nde e bokilo nolamwa nande, ya Luta aondaki nko nolamema na nde. 15 Na boiko, Naomi aoywebia Luta ndɛmbɔ: «Lenda, mokale mɔwɛ aisia o bokundu mpe onka ba nyambe ba nande. Isia nga bokela mokale mɔ wɛ, isia onka wɛ.» 16 Ya Luta aomoisenyele: «Tonkamanyake mbɔ nakokambie mpe naisie onka mi. Nko manda ehaka wɛ, ehaka mpe mi; nko manda engokihe wɛ, engokihe mpe mi. Bokundu bɔ wɛ bongoyala mpe bo mi; Nyambe ɛ wɛ angoyala mpe Nyambe e mi. 17 Nko manda engobu wɛ, engobu mi mpe engokundame mi. Tika Nkolo ampae ikamba ipenda kaki lobo lonkina notokapola mi na wɛ pɔ nko iwa!» 18 Naomi ɛnɛkɛ mbɔ Luta aana nko noha mputa na nde, taisia nomotepeya 19 mpe bahaki mputa kii ɔ Bɛtɛlɛmɛ.

Na boiko, oiyaki balɔkɔ ɔ Bɛtɛlɛmɛ, inanga inkuma inyongaki na boili balɔkɔ. Bainto baemwaki: «Ɔnɛ nko Naomi?» 20 Ya nde aobaisenyele ndɛmbo: «Tabombeyake Naomi nimbo mbɔ: "Ngainto o ibulwako!" Bombeye Mala nimbo mbɔ: "Ngainto o mahɛi penda!" Na itina Nkolo e Nguya Too Too aonzokia liale penda. 21 Nahaki makata ntondiama mpe Nkolo e Nguya Too Too aonzisenya nko na makata. Taboisiaki nombeya Naomi, naitina Nkolo e nguya Too Too aɔnzɛlɛlɛ mɔkɔngɔ mpe aonzokia mahɛi.» 22 Ɛlɔkɔ eiko Naomi abɛlɛki o ehe ɛ nɛnɛ e Moaba nde na Luta, bokilo bo nande bo ngainto bo mohi Moaba. Baiyaki ɔ Bɛtɛlɛmɛ o elaka ebanda balɔkɔ nonyuka mambo i ɔlɔzɛ*.