1 येशुले फरि समुन्दरल वङल सिक्छ्या यांऔ तअसिऊ। चारवरङन रुल हुल आवाए घिन्या ताहौ कि, येशु समुन्दरल लिज्यान्या तोलोअ डोङ्गाल वूमौ, ओटन अपुर सोगलै रुयाङ नामलै च्याङज्यावाङ।✝ 2 ओटन येशुले नकाङजन आहानङन भ्याई छेन आह्युउवाङ। आसिक्छ्याङन ओले ऐआढोवाङ, 3 "थएचिते! ब्याएचिते, तोलोअ धूर वाइन्या रु वाहौ नाल्ट पलिहौ। 4 ओटन ओले धूर आवाहौक काङ्का धूर यमल वङल परिऊ, ओटन बनबायाङ रा:स्यु रांज्योव। 5 काङ्का धूर लुङलेन्या पोल परिऊ, जोल नाले भ्याई व्म माडोएदा ओटन व्म आमाडोटौकाले छिटो परिटौ। 6 ओटन जब भ्याई घाम चर्किस्यु वुईलिउ, ओटन रिंन आमाकोलोकौकाले राङौ। 7 ओटन काङ्का धूर ज़ुयाङ खार्ल परिऊ। ओटन जङ्गलले आछ्यापौ, ओटन ना माशैदा। 8 तर काङ्का धूरयाङ चान्या येङल तेइवाङ, ओटन नका परिइवाङ, ओटन घिस्यु सैईवाङ, ओटन काङ्का तिस गुना, काङ्का साठी गुना ओटन काङ्का सय गुना सैईवाङ।" 9 तब येशुले ऐलेऊ, "जोल थएन्या ना ले नकाले ग्याथटौत्या।"

10 जब येशु आबाठए लिज्याऔ, तब जो-जो रुयाङै ईका राथटौ, आ सिइयाङ ल्योङ हिन्वाङ, ओटन ओयाङै ईका आहानल अर्थ रांगिन्वाङ। 11 येशुले नकाङजन ऐआढोवाङ, "परमेस्वरलं राज्यल अर्थ जेजन यांस्युई लेसिया, तर बाहेरला वालाङ नाल्ट सोगलै छेन आहानयाङ ङन्ज पान्सिया। 12 नैताइस्यु नकाङ ब्याएन्या ता ऐब्याएरा तर नकाङ मारङरदी, थएन्या ता ऐथएरा तर माबुजिरदी। ऐग्याटाईत्या कि नकाङ परमेस्वरलं लेऊदेए ग्यावलरते ओटन नकाङल पाप छेमा ढान्या लेसिया।"✝

13 फरि येशुले नकाङजन ऐआढोवाङ, "जे ईका आहानल अर्थ माबुजिच्योकन? फरि अपुर आहानयाङल अर्थ कैलेस्यु बुजिच्यो का? 14 धूर वाइन्या वालाले परमेस्वरलं बचन वाइवा। 15 काङ्का रुयाङ ना धूर मनताइन्या लेरा। जो यमल वङल परिवाङ, नकाङै जोमनताइन्या सिक्छ्या थएरकन बै सैतान ओचोएटै रा:स्यु जो बचन नकाल वाइसिऊ ना बचन ऐलाङौ। 16 नैलेस्युजै जो लुङैलुङलेन्या पोल वाइसिऊ, ईका नकाङ ज्या, जो बचन थएस्यु ओबजाक्कै हेसाङस्यु ग्रहन ढोरा। 17 तर नकाङल भितरलं रारिंन आमाफैलिउकाले नकाङ टचिइ दिनजाई तनरा, ओलं छिन्ट बचनल कारन खान्या या दुख राकन, नकाङ ओचोएटै ढोङरा। 18 ज़ुयाङ खार्ल वाइसिन्या धूरयाङ नकाङ ज्या, जोले बचन ता ऐथएरा, 19 तर ईका जिबनल सङ्सारला आतिइ सनर धनसम्पतलं मयामोह सनर अपुर लोब ढास्यु बचनजन माएरा। ओटन नकाङ फलिफाप माताइरदी। 20 ओटन जोयाङ चान्या येङल वाइसिवाङ हो, नकाङ बचन थएरा, ओटन ग्रहन ढोरा, ओटन शई बै शशैरा, काङ्काङै तिस गुना, काङ्काङै साठी गुना ओटन काङ्काङै सय गुना।"

21 येशुले नकाङजन ऐआढोवाङ, "नैति काङ्काङै बत्ति बलाइस्यु पाथीबाङल या चारपाईन्युउल नाएङालेस्यु भितरलं रालाङौका? नैति दियालं यर्त मानाएसिऊ का?✝ 22 जो जन्तु मोअसिज्या, नका सोगल पाखालै थनन्या लेसिया, ओटन जो जन्तु कप्सी ना मोअसिऊ माढुदुऊदी।✝ 23 यदि जोल थएन्या नाले नकाले ग्याथटौत्या।" 24 येशुले नकाङजन फरि ऐआढोवाङ "जे जो थएच्यो, नकात ध्यान योंचिते। दानाङभन्या ज्वाए मानस्यु जे योंचिर जे ओवाए डोएच्या। ओटन जेजन ओटन बै भ्याई यांन्यालेसिया।✝ 25 दानाङभन्या जोसकाए ले नकाजन अपुर बै यांन्यालेसिया, तर जोल्योङ माले, नका ल्योङन लेकन बै न्हानसिया।"✝

26 येशुले ऐलेऊ "परमेस्वरलं राज्य ऐटाइन्या हो कि काङ्का तोलोअ रुले येङल धूर आवाहौमन, 27 ओटन ना रिउल रुक कन्बै, सन्सिज्याकन्बै लाअ रिउ ना धूर तुसाहा ओटन घिया, तर ना कढाई घिऊ नाजन थाहै माताइदी। 28 येङले ओलजै सपरिइवा, पहेला तुसाइस्यु आडाला, ओलं छिन्ट बाला, तब बालाल पुरै जाए सहा। 29 तर जब आजाए मीन तब नाले हस्याले खानौ तअसिया, दानाङभन्या अन दुउन्या बेला ताइदा।"✝

30 येशुले फरि ऐलेऊ, "परमेस्वरलं राज्य नैस तुलना ढान्या? अथाबा नै आहानङन इकाल वाऱ्याइसं पानन्या? 31 नका काथ्याल जाए मनताइन्याई लेया जब येङल वाइसी। तब ना यिङला सोगलै धूरयाङतन इङन्या ताहकन बै, 32 जब नका वाइसी, तब ना घिया, ओटन सोगलै इङन्याङतन ना घिन्या ताहा, ओटन नकाले घिघिन्या हाङ्गाङ पलिइवा, ओटन नमता बनबायाङै नकाल छिरिउल बाईचुङन्या सनर रा:सिप जाएरा।" 33 नकाङै ज्वाए बुजिऊ राढुदुउ येशुले ऐटाइन्या तबर आहानयाङ पानस्यु, नकाङजन बचन आसथएवाङ। 34 बिना आहान येशु नकाङसं माछ्योङदा, तर आ सिइयाङजन ओलं राबाठएक सोगलै अर्थ आपानस्योवाङ।

35 ओछिम्क ओइ ताहापाइनाई येशुले सिइयाङजन आढोवाङ, "रांचिते, गे समुन्दरल हुदिफन्ट हिनन्या।" 36 ओटन हुलसकाए बिदा होन्‌वा पाइना, येशु जो डोङ्गाल चुङज्याऊ, नकालै ओलजन आसिइयाङै रा:सकाए रालाङौ। ओटन अपुर डोङ्गाङबै रा:सकाए लेवाङ। 37 ओटन ओचोएटै नल घिन्या आन्ढी कोखा आढोव, ओटन रील छालयाङ डोङ्गाल पछरिऊ तअसिऊ, आवाए समन कि डोङ्गाल री फाङताइङा लेदा। 38 येशु ओलजै डोङ्गाल छिन्ङन्ता पोल तोलोअ वूम नाएस्यु आम्वाईज्याऔक, नकाङै ओलजन ऐढास्यु रासोचटौ, "औ गुरुज्यू, गे सिङा गेलन्या नैति नङजन आतिइ मालेव रों?" 39 तब येशु सन्सिऊ ओटन आन्ढीजन आहप्काहौ, ओटन समुन्दरल छालयाङजन ऐआढोव, "शान्त ताहन्ते! दिङन्ते!" ओटन आन्ढी थामिसिऊ ओटन भ्याई हेसाङवाङ। 40 येशुले नकाङजन आढोवाङ, "जे दानाङ आवाए छ्याएच्यो? जेल्योङ अझ बै बिस्वास मालेऊ?" 41 तर नकाङ भ्याईज छ्याएवाङ ओटन रारां छ्योङौ लागिवाङ, "ईका काङ्का? आन्ढी सनर समुन्दरले बै इकाल परीम मानिज्याऔने।"