1 ओटन येशुले नकाङजन ऐआढोवाङ "ङा मछ्यु, जेजन ऐढाच्या, इल ज्वाए च्याङज्यावाङ, इकाङ तन काङ्का-काङ्का ऐटाइन्या लेरा कि, जोले परमेस्वरलं राज्य सक्ति सकाए आरांज्यान्या मारङौ, तब समन सिन्याल स्वाद मादारौदी।"

2 नकाल छ दिन छिन्ट येशुले पत्रुस, याकूब सनर यहुन्नाजन हिनस्यु तोलोअ झेनन्या डान्डाल ओलसं आलाङौने। नङं ओयाङ रांबाठए लिज्यावाङ, ओटन नकाङल हार्मै येशुल बर्न फिरिसिऊ।✝ 3 ओटन नकाल क्वा आवाए भ्याई तरवर ताहौ, कि पिरथ्बील काङ्काई बै धोबीले क्वाजन ऐलेस्यु चेईस्यु पालन्या माजाएदुउडी। 4 तब नका आसिइयाङै एलिया सनर मोशा ओटन येशुसं रांछ्योङज्यान्या रांरङौ। 5 पत्रुसले येशुजन ऐआढोव, "औ गुरुज्यू, गे इल गेलन्या चान्या ताहौ। गे इलै लिज्याऔ नाल्ट तिनगोटा छाप्रा जाएया, तोलोअ न नाल्ट, तोलोअ मोशाल नाल्ट ओटन तोलोअ एलियाल नाल्ट।" 6 पत्रुसले नै छ्योङ्ङ ऐलेस्यु यिङौ आमाढुदुऊ, दानाङभन्या नकाङ भ्याई छ्याएस्यु लेवाङ। 7 ओटन तोलोअ बादल रा:स्यु नकाङजन आथोअवाङ, ओटन बादललन तोलोअ ऐटाइन्या ग़ा थहौ, "ईका ङानिज्युन्या ङाज़ा ज्या, इकाल छेन थएचिते।"✝ 8 ओटन नकाङै चारवरदेए रांखिमौक रा:सकाए येशु बाहेक अपुर काङ्काईजन मारङदुरा।

9 डान्डालन रालाइज्याऔ बेलाक येशुले नकाङजन ऐआढोवाङ, "जब समन रुल ज़ा सिन्याङ तन बान्चिस्यु मासोव, तब समन जो रङच्यो ना काङ्काईजन तापानस्योच्यो लेस्यु आपरिङवाङ।"

10 नकाङै ईका छेन यांका रांनाटौ, तर नकाङ रारांल छ्योङौ लागिवाङ, "सिन्याङ तन बान्चिस्यु सोन्याल अर्थ नैति रैस।" 11 ओटन नकाङै ओलजन ऐलेस्यु रांगिनौ, "पहेला एलिया रांऔजै परिया, ऐलेस्यु ब्यबस्थाला शास्त्रीयाङ दानाङ ऐलेर?"✝

12 येशुले जबाक आयोवाङ, "पबित्र शास्त्रल सरसिन्या लेया, कि एलिया मछ्यु हादेए रा:स्यु सोगल सुढारवा, तर रुल ज़ाल बारेल आका दानाङ सरसी कि नकाले भ्याई दुख डोएवा, ओटन क्याइसिन्या गनिसिया? 13 तर ङा जेजन ऐढाच्या कि, एलिया ता रांदा, ओटन नकाल बारेल जो पबित्र शास्त्रल सरसिन्या अनुसार नकाङै ओलसं जोमन लेऊ राचाहिऊ, ओमन्जै लेवाङ।"

14 जब येशु अपुर आ सिइयाङ ल्योङ आरांऔक, नकाङजन चारवरङन बअघिन्या रुयाङ हुलले रांघिरिज्यान्या सनर शास्त्रीयाङ नकाङ सकाए ताकानतोकन रालज्यान्या आरङवाङ। 15 ओटन सोगलै हुलले येशुजन रांरङौ, चोएटै भ्याईजै अचम्म रामानिऊ, ओटन चोएस्यु ओलजन धोक रांयोव। 16 येशुले सिइयाङजन आगिन्वाङ, "जे नकाङसं नै जेछ्योङज्याचिऊ?" 17 हुललन तोलोअले ओलजन जबाक आयोव, "औ गुरुज्यू, ङामि ल्हेपा ज़ा जोल्योङ लाटा आत्मा लागिस्युलेऊ, नैताइस्यु ङा नल्योङ ङाहोन्ङु। 18 जब नकाले ङा ज़ाजन कोलोकौ, तब नामल पछारवा, ओटन आयांलन फुई पलिईस्यु, आह्वा ज़िङ कैवा, नका कग्रक्कै ताहा।* ङा न सिइयाङजन पलिइस्योचिते लेस्यु धोक ङायोङवाङ, तर नकाङै पलिटौ माढोदुरा।" 19 ओटन ईका थएस्यु येशुले नकाङजन आढोवाङ, "ऐ, अबिस्वासी रुयाङ, ङा खक समन जे सकाए लिज्याङ्का? ओटन जेजन खसाअ सहिन्या? नकाजन ङा ल्योङ होन्चिते।" 20 नकाङै ना केटाजन आल्योङ राहोनौ, ओटन नकाले येशुजन आरङौ चोएटै ना दुस्ट आत्माले नाजन फटेफटे जाएस्यु नकाजन नामल आपछारिउ, ओटन आयांलन फुई पलिईस्यु फुटीफुटी लेऊ तअसिऊ। 21 येशुले नकाल आबौजन आगिनौ, "खकन इकाजन ऐ ताहौ?" नकाले ऐलेऊ, "आलुल योअकन्जै, 22 इकाजन सएन्याल नाल्ट, नका दुस्ट आत्माले इकाजन खयाङ्क मील सनर खयाङ्क रील क्याइवा। तर यदि नङ कोबाअ ढाऔ ढुदुनकन, गे यर्त दया ढास्यु गेजन व्एसिन्ते।" 23 येशुले नाजन ऐआढोव, "‘यदि नङ ढाऔ ढुदुनकन!’ ऐलेस्यु ईका नै नपान्नु? बिस्वास ढान्या वालाङ नाल्टता सोगलै छेन सम्भब लेया।" 24 तब केटाल बौले आव्‌रकलिउसं ऐलेऊ, "ङा बिस्वास ऐढोङा, तर ङा अबिस्वासत ङाजन व्टङते।" 25 तब हुल तचोएकै चोएस्यु रारांन्या आरङौ, ओटन येशुले दुस्टआत्माजन ऐलेस्यु आहप्काहौ, "ऐ, लाटा सनर भैरा आत्मा, ङा नङजन आग्या यांना, नकातन पलिईस्यु हिनन्ते, ओटन फरि खकै नकाल भितर तापसिन।" 26 ओटन ना केटाजन भ्याई जै चिचच्याइस्यु लछार पछार जाएस्यु पलिहौ, ओटन ना बालअ सिन्याङमन ताहौ, आङ समन कि भ्याउयाएले ऐलेऊ तअसिवाङ कि आका ता सिदा। 27 तर येशुले नकाल कुई कोलोअस्यु नाजन जरुक्कै आछेनौ, ओटन ना सोव। 28 ओटन जब येशु नका झिमल हिनौ, तब आमि सिइयाङै आबाठएक ओलजन ऐलेस्यु रांगिनौ, "गे नकाजन दानाङ पलिटौ माढुदुई?" 29 येशुले नकाङजन ऐआढोवाङ, "ईका वाला दुस्ट आत्मा पलिटौ नाल्ट बिना बर्तसका प्रार्थनाले माढुदुचिदी।"

30 येशु सनर आ सिइयाङ नङंन पलिईस्यु नकाङ गालील ताइस्यु हिन्वाङ। ईका छेन काङ्काईले तासनरत्या ओलं इच्छ्या लेऊ, 31 दानाङभन्या ओले आसिइयाङजन सिक्छ्या यांऔयन ढाज्याऔ। येशुले नकाङजन ऐआढोवाङ, "ङा रुल ज़ा हो रुयाङल कुईत पारिङरा ओटन रुयाङै ङाजन सएन्यालेरा, ओटन ङासिऊल तिन दिनक ङा बान्चिस्यु सोन्यालेङा।" 32 तर येशुले जो छ्योङौ, ना नकाङै माबुजिदुरा, ओटन गिनन्याल नाल्ट बै नकाङ छ्याएस्यु लेवाङ।

33 ओयाङ कफर्नहुमलं रांवाङ, ओटन झिमल रा:स्यु येशुले नकाङजन आगिन्वाङ, "जे यमल नैति छेन जेछ्योङज्याचिऊ।"

34 तर नकाङ छपक्कै दिङवाङ, दानाङभन्या यमल नकाङै ईका छेन छ्योङवाङ कि "गेतन घिन्या काङ्का?"✝ 35 तब येशुले चुङस्यु, बारैं वटाजन आखुल्वाङ, ओटन नकाङजन ऐआढोवाङ, "तर यदि काङ्का रु हादेए ताहौ रोंकौकन तब ना सोगलै तन छिन्ट ताहा, सनर सोगलैल सेबक ताहौजपरिया।"✝ 36 ओटन तोलोअ इङन्या लुलजन खार्ल आसच्यानौ, ओटन नाजन घोनल हिनस्यु येशुले नकाङजन ऐआढोवाङ, 37 "जोले ईका इङन्या लुलमन काङ्का तोलोअ जन ङा मिनङन ग्रहन ढोव, नाले ङाजन ग्रहन ढोवा, ओटन जोले ङाजन ग्रहन ढोव, नकाले ङाजन माङडी, तर ङाजन परिङन्या वालाजन ग्रहन ढोवा।"✝

38 यहुन्नाले येशुजन ऐआढोव, "औ गुरुज्यू, तोलोअ रुले न मिनतन दुस्टआत्माङजन आपलिइज्यान्या गेरङयिउ, गे नकाजन नैलेव मायोदुया, दानाङभन्या ना गे बगालला रु माङडी।" 39 येशुले ऐआढोवाङ, "नाजन तारुखिच्यो, दानाङभन्या जोले ङा मिनङन सक्तिला काम ढोव, छिन्ट ङा मिनङन ओचोएटै नकाले माचान्या काम माढोऊदी।" 40 दानाङभन्या जो गे बिरोदल माले, ना गे पक्छेलै लेया।✝ 41 ङा जेजन मछ्यु ऐढाच्या, कि जे येशुलै ज्या, ऐलेस्यु जोले जेजन त खुरी री ओव यांचिऊ नकाले पक्का आपुरस्कार गवाइन्या माल्दी।✝

42 "ओटन जोले ङाजन बिस्वास ढान्या वाला ईका इङन्याङ ङन तोलोअजन दुख योंव, नकाल नाल्ट ता बरु तोलोअ घिन्या लुङल चाखी नकाल ढेङत केप्स्यास्यु नाजन समुन्दरल क्याइन्याई चान्या लेया। 43 यदि नकुईले नङजन बिस्वासतं चोए यांनुकन नाजन पल्ते। नेंलोअ कुई लेस्यु बै नरगला खकै मासिन्या मील हिनौ भन्या थुत्या ताइस्यु जिबन डोएन्या न नाल्ट चान्या ज्या।✝ 44 नरगल ता न लुइयाङ सिर, न मीज सी। 45 ओटन न खङले नङजन बिस्वासतं दुख यांनुकन नाजन पल्ते ओटन नेंलोअ खङ लेस्यु नरगल क्याइसिऊ भन्या ता दुन्डा ताइस्यु जिबन डोएन्या न नाल्ट चान्या ज्या। 46 नरगल न लुइयाङ सिर, न मीज सी। 47 यदि नम्युउले नङजन धोखा यांनुकन नाजन हाएस्यु क्याइते। नेंलोअ म्युउ लेस्यु बै नरगल क्याइस्यु नीऊ भन्या ता तोलोअ म्युउ सकाए परमेस्वरलं राज्यल पसिन्या न नाल्ट ठिक लेया।✝ 48 नरगल न लुइयाङ सिर, न मी जै सी।"✝

49 दानाङभन्या सोगलैजन मीले चोखा जाएसिया जोमनलेस्यु बलिदानला सापिऊ चोखा जाएसिऊ। 50 "सापिऊ चान्या ज्या, तर यदि सापिऊल ढार हिनकन फरि ना जे कैलेस्यु सापिऊढार जाएच्यो? जे-जेल सापिऊ मन न्हाए जाएस्यु नाएचिते। जे जेल सापिऊ नाएचिते, ओटन जे शान्तिसं लिज्याचिते।"