Marcos 5

येशुले भूत लागिन्या रुजन आसबेलन्या

1 ओटन येशु सनर आ सिइयाङ समुन्दरल हुदिफन्ट गेरासेनस मलुउलं रांवाङ। 2 येशु डोङ्गालन ओचोएटै बाहेर पलिहौ, ओटन सिन्या रुयाङल ऊईलन तोलोअ अशुद्दआत्मा लेन्या रु येशुसं डोएसिऊ। 3 नका ऊईजिऊलै चुङज्याया। ओटन काङ्काईले नाजन साङ्गलले समेत पोअस्यु नाटौ माढुदुरदी। 4 दानाङभन्या नकाजन तबर पाला हटकरी सनर साङ्गलले पोअसिऊ, ओटन बै नकाले साङ्गल चेईस्यु कलाए-कलाए आजाटौ, काङ्काईले नकाजन कायम जाटौ माढुदुज्यारदी। 5 नका सदाई लाअ रिउ ऊईजिऊल सनर डान्डा जिऊल कलिकौयन ओटन ओलं ओलझन्जै लुङले टुप्सिस्यु घाइत्या जाएवा। 6 ओटन जब नाले येशुजन लोएतन आरङौ, तब चोएस्यु रा:औ, ओटन येशुजन घुन्डा टिकिस्यु ढोक आयोव। 7 ओटन घिन्या ग़ाले चिचच्याइस्यु ऐलेऊ, "औ, सर्बोच्च परमेस्वरलं ज़ा येशु ङाजन नङसं नै काम? नङ ङाङन नै नचाहिनु? परमेस्वरलं मिनतन ङा नङजन बिन्ति ढाना नङ ङाजन दुख तायाङ।" 8 (दानाङभन्या येशुले नकाजन ऐआढोव, "ऐ अशुद्दआत्मा नका तन पलिईस्यु हिनन्ते") 9 ओटन येशुले नकाजन आगिनौ, "न मिन नैति?" नकाले येशुजन आढोव, "ङा मिन ता फौज दी, दानाङभन्या गे भ्याई लेई।" 10 ओटन दुस्टआत्माङै येशुजन पालै पाला बिन्ति रांढोव, गेजन ईका पोलन तापलिइसिन। 11 नला नेराका डान्डाल वोअयाङल तोलोअ घिन्या बगाल लाज्यावाङ। 12 ओटन नका दुस्टआत्माङै ऐलेस्यु येशुजन बिन्ति रांढोव, "गेजन वोअयाङल ल्योङ हिनौ यांसिन्ते, ओटन गे नकाङल जिङल पसिया।" 13 तब येशुले नकाङजन हिनन्या अनुमति आयोवाङ, ओटन ना दुस्टआत्माङ बाहेर पलिईस्यु वोअयाङ जिङल पसिवाङ, ओटन छ्योअ नेहजार वोअयाङल बगाल ओरलालन हुर्रिस्यु समुन्दरल तेइवाङ ओटन बुदिस्यु सिवाङ। 14 नका वोअयाङ छान्या वालाङ ढोङस्यु, बजार सनर नङ्गरल हिनस्यु रांपानौ। ओटन ईका नैति ताहौ, ना ब्याटौ नाल्ट रुयाङ नल रांवाङ। 15 तब नकाङ येशु ल्योङ रांवाङ, ओटन जो रु ल्योङ दुस्टआत्माङ लागिन्याङै ओजन रांरङौ, ओटन ना रु बेलस्यु चान्या ताइस्यु क्वा क्वाएसिस्यु आचुङज्यान्या रङस्यु नकाङ छ्याएवाङ। 16 ओटन जो जोले ईका घटना रांरङौ, नकाङै जोल्योङ दुस्टआत्माङ लागिन्याङ, ओटन वोअयाङल हालत नैताइस्यु लेव नकाङजन रा:सथएवाङ। 17 ओटन नकाङ येशुजन बिन्ति ढाऔ तअसिवाङ, कि गे पोलन हिनन्ते। 18 येशु डोङ्गाल पसिङा आलेऊक, नका दुस्टआत्मा लागिन्या रुले बिन्ति आढोव, "ङाजन नङसं हिनौ यांङते।" 19 तर येशुले नाजन माभनस्योदा, तब नाजन ऐआढोव, "नङ नझिम हिनस्यु न रुयाङ सनर नन्हाएयाङजन प्रभुले न नाल्ट नैति घिन्या काम आढोव ओटन नङजन आठनस्यान्या, घिन्या दयाल बारे नन्हाएयाङजन पानस्योवरते।" 20 तब नका डेकापोलिस*5:20 देकापोलिस ऐराढान्या शब्दल अर्थ १० सहर बराबर सहर हिनौ, ओटन येशुले आ नाल्ट आढान्या घिन्या अचम्मला कामल बारेङन नला सोगल पोल प्रचार आढोव ओटन रुयाङ अचम्मै ताइवाङ।

याईरसल मेएमा आज़ा सनर रोगि मेएमा

21 फरि जब येशु डोङ्गालन समुन्दरल हुदिफन्ट हिनौ, तब तोलोअ बअघिन्या रुयाङ हुल हुङआङन दुउसिवाङ, ओलं समुन्दरल वङलै लिज्याऔ। 22 आराधना झिमला शासकयाङ मध्य तोलोअ याईरस मिनला रु आल्योङ रांऔ, ओटन येशुजन रङस्यु आखङल फलुप्सिऊ, 23 ओटन ऐलेस्यु भ्याई बिन्ति आढोव, "ङामि इङन्या मेएमा ज़ा सिङाईलिज्याव, नैताइस्यु रा:स्यु नकाल यर्त नकुई नाएते, ओटन ना बेलस्यु जिङदा ग्याताइत्या।" 24 तब येशु नका सकाए हिनौ। तोलोअ घिन्या रुयाङ हुल आछिन्ट लागिऊ, ओटन, रुयाङ आल्योङ रांङालेस्यु थुईसिस्यु वङवाङ। 25 ओटन बारं बर्स हाकन्ज जी बगिन्या वाला तोलोअ मेएमा नल लिज्याऔ। 26 ओटन नाले तबर गुनीयाङ कुईतन घिन्या लेन्यामालन्या दुख आडोटौ ओटन आमि सोगल धनसम्पत खर्च ढास्यु बै नका माबेल्दा तर नका झन्जै माचान्या गतिल हिनस्यु लेऊ। 27 नकाले येशुल चान्याथाई थएस्यु आनाटौ, ओटन ओ रुयाङ हुलल छिन्ङन रा:स्यु येशुल क्वा आछुउ। 28 दानाङभन्या नकाले आयिङ आयिङल ऐलेऊ, "यदि ङा नकाल क्वा, याएज छुङकन बै ऐबेल्ङा।"

29 ओटन ओबजाक्कै नका मेएमाल जी बगिन्या रुकिसिऊ, ओटन आबुलला रोग आबेलन्या नकाले आसनौ। 30 येशुले ओचोएटै आसक्ति बाहेर आपलिइन्या सनस्यु हुलल लेऊदेए वलस्यु रुयाङजन आगिन्वाङ, "काङ्काले ङाक्वा आछुउ?" 31 ओटन आसिइयाङै येशुजन ऐराढोव, "रुयाङ रारां राथुइसिज्यान्या ता नङ ऐरङज्याना, ओटन बै नङ ऐलिज्याना कि काङ्काले ङाजन आछुङु?" 32 तर ङाजन छुन्या वाला काङ्का रैस, लेस्यु येशुले चारवरदेए आखिमौ। 33 तब ना मेएमाले ओलजन कैताइस्यु लेऊ ना सनस्यु, आछ्याहै वुउस्यु-वुउस्यु रांऔ ओटन येशुल लेऊक घुन्डा टिकिस्यु जो ताइस्यु लेऊ सोगल सत्य छेन आपानस्योव। 34 तब येशुले नाजन ऐआढोव, "ऐ ज़ा, नबिस्वासले नङजन आसबेल्नु, शान्त सकाए हिनन्ते न नाएबोर बेल्दा।" 35 येशुले आछ्योङज्याऔक, यहूदीयाङ शासकलं झिमलन रुयाङ अथाबा थाई पानन्यावालाङ रा:स्यु ऐलेवाङ, "न ज़ा ता सिदा। आब गुरजन अपुर नैकाम दुख नजाएज्यानु?" 36 तर नकाङै रांछ्योङज्यान्या छेनदेए ध्यान मायास्यु येशुले आराधना झिमला याईरसजन ऐआढोव, "ताछ्यातन, बिस्वास याएज ढोते।"

37 ओटन येशुले पत्रुस, याकूब, सनर याकूबल आभाई यहुन्नाजन बाहेक अपुर काङ्काईजन बै यहूदीयाङ आराधना झिमल ओलसं रांन्या अनुमति मायोदुऊरा। 38 ओयाङ आराधना झिमला शासकलं झिमल तापवाङ ओटन भ्याई रुयाङ राव्‌रज्यान्या सनर राचिचच्याइज्यान्या रांरङवाङ। 39 तब भितरलं हिनस्यु येशुले नकाङजन ऐआढोवाङ, "जे दानाङ हल्ला मच्चाईज्याच्यो ओटन दानाङ व्‌रच्यो? लुल सिस्यु माल्दी, तर नका रुउस्यु लेऊ।" 40 नकाङ येशुल छेन थएस्यु साहौ तअसिवाङ। तब ओले नकाङ सोगलैजन पाखाल आपलिइवाङ ओटन लुलल बौ सनर आअमा ओटन ओलसं लिज्यान्या आ सिइयाङजन ओलसं लाङस्यु जोङ लुल लिज्याऔ, ओङ हिन्वाङ। 41 ओटन लुलल कुई कोलोअस्यु ओले नकाजन ऐआढोव, "तालिता कुमी," जोल अर्थ हो, "ऐ लुल ङा नङजन ऐढाना सोन्ते।" 42 ओटन ओचोएटै लुल सोव, ओटन बावतअसिऊ। ना लुल बारं बर्सला लेऊ। ओटन नवाए बेला नकाङ अचम्मै ताइवाङ। 43 येशुले नकाङजन ऐआढोवाङ, ईका काङ्काईजन थाह ताटाइत्या ऐलेस्यु कडा आग्या आयोवाङ। ओटन नकाङजन ऐआढोवाङ, लुलजन कोबाअ ज्यान्या योंचिते।