1 कैसरिया कर्नेलियस मिन क्याक्याइबि मिझि धु, सुते इटालिया नाङानयि सिपाहियि घोबा हिना। 2 खो कजसुबायि भक्ता हिना, राङ खो राङ ख्युइ प्येरा पोरोयि कजसुबायि झिटा मानि किनलो। ख्युइ मितेबाला सम छेया किङगा दान पिन्दे कजसुबाला बारतैला मोनलाम क्याकिन। 3 ख्युइ ङिम्मु तिन बजे झोमला दर्शनला चाङमा क्याइरे कजसुबायि तेङलायि लोन खेरङान झि राङ यहला लेप्ते जु नानाइबा थोइसोङ, "कर्नेलियस!" 4 झिरे ख्युइ हतिला ल क्याइरे ताइसोङ राङ नाइसोङ, "प्रभु, नोइ।" तेहि ख्युइ नाइसोङ, "ख्युइ मोनलाम राङ टाङनाबाला पिपिनि दान याकायि चाला कजसुबायि धुनला क्योक्योबा होतो। 5 तेहि मितेबाला योप्पाला चँह, राङ पत्रुस नाङान सिमोनला क्ये ताङदे चँह। 6 खो पाबुइ लाइकिङान सिमोनयि तेहा त्येतु, सुइ खिम छो छोम्मुवायि धुनला धु।" 7 जब खो ङ्याबो ताम नाङान तेङलायि लोन खेरङान, बिदा च्युङदे, तेहि ख्युइ रेँ यक्पुवातेबे नाङने ङि राङ मिछ्याता ख्युइ स्यापच्यि स्युरु भक्ता सिपाहि झिला क्ये ताङदेलो, 8 राङ हतिबाला ताम पोरो स्ये छारते च्येला योप्पाला चाँसोङ।

9 ङाइटोतेला हतिबा रेँ ढुलला हति भजारयि धुनला हुइतुइना, ङिम्मुइ च्युनङि बजे झोमला पत्रुस मोनलाम क्याकतु खिमयि खानाला थोन्सोङ। 10 खो टोपा तसोङ, राङ ख्युइ चिगा सा सोम क्याइसोङ, हिन्नाङ स्यानतेबे ङ्योपा तयार सुइतुइना खो ध्यान मग्न च्युङसोङ। 11 ख्युइ तेङला प्येप्ये राङ हतिने फाला छुला पोरोने तन्ना तातामा च्वरा पिरथिवि यहला रेन कुरुकुरु काङबा स्यि क्याक्याइबा तुढो राङ स्युरे ढोङान उ होएता तुढो राङ पान्नाङला च्याचिउतेबा धु 12 हति तन्नाला पिरथिवि पोरो कुरकुर काङबा स्यि क्याक्याइबा तुढो राङ स्युते ढोङानयि तुढो राङ पान्नाङयि च्योज्युङतेबा याङ धु। 13 तेहि ख्युइ क्ये झि थोइसोङ, "ए पत्रुस ल्ह, राङ साते स्हो।" 14 हिन्नाङ पत्रुसयि नाइसोङ, "माना प्रभु, चिचालानाना ङाहि जब याङ च्याङ अपवित्र वा भाभा क्यु सासाइबा मेता।" 15 हति क्ये लाम्मा ङिबा याङ ख्युइ थोइसोङ, "कजसुबायि चाङमा सोसोइबा होतो हतिला ख्योए भाभा ठानि माके।" 16 लाम्मा सुम थु धि च्वरा च्युङसोङ, राङ हतितुइना राङ हति तन्ना तेङला यहला खेरसोङ।

17 जब पत्रुस खुरि थोथोङा धि दर्शनयि खुँ च्हि हिनोम नाइरे सम नाङ नाङला आच्यामाच्या च्युङसोङ, हतितुइना राङ कर्नेलियसयि चाँचाँबि मितेबा सिमोनयि खिम फाकिन राङ कोयि धुनला लाँरे त्येसोङ, 18 "पत्रुस नाङानयि सिमोन ङिहा ताताता होए कि?" नाङान क्ये छेयाला टिसोङ।

19 जब पत्रुस दर्शनयि भारेला विचार किन ताताता होतो हतितुइना अपवित्र आत्मायि खोला नाइसोङ, "तोइ, मिरको समुयि ख्योएला फाकिन्दु। 20 ल्हँ, राङ माला क्यु, राङ माख्यारा हतिबा ङ्याबो क्यु, चिचालानाना हतिबाला ङाहि चाँचाँबा ना।" 21 तेहि पत्रुस पुपसोङ, राङ हति मितेबे तेहा पुते नाइसोङ, "तोइ, खि पापाति मिते ङा ना। खे ङिहा लेलेबि खुँ च्हि ना?"

22 हतिबे नाइसोङ, "घोबा मिझि कर्नेलियस, सु टुङबो राङ कजसुबा ङ्याबो झियाप राङ यहुदि मितेबाने सम्मान खुँखुँबि मिना, ख्योएला ख्युइ खिमला क्ये ताङदे चोँङान राङ ख्युइ चिने लोन ङ्योन नाइरे पवित्र तेङलायि लोन खेरङानने खोला आदेश खुँखुँबा होतो।" 23 तेहि ख्युइ हतिबाला नाङला क्ये ताङदे हतिबाला ढोम्बो स्यामसोङ। ङाइटोतेला पत्रुस लाँरे हतिबा ङ्याबो पुइसोङ, राङ योप्पायि चोम राङ भाइतेबा।

24 जब हतिबा कैसरियाला क्योपसोङ। रेँ मितेबा राङ धुनयि रुवातेबाला क्ये ताङदे रुरे कर्नेलियस हतिबे लाम तेन त्येतु। 25 जब पत्रुस नाङला लेप्ते हतितुइना कर्नेलियस खो ङ्याबो ठाते ख्युइ काङबा सुङदे छ्या पुलसोङ। 26 हिन्नाङ पत्रुसयि खोला जु नेन राङ त्येसोङ, "ल्हँ, ङा राङ याङ मिनि हिन।" 27 तेहि खो हति ङ्याबो ताम नेन राङ खिमयि नाङला स्युसोङ, राङ ख्युइ हतिया लेइराङ झोझोमा ठेसोङ। 28 तेहि पत्रुसयि खोला नाइसोङ, "यहुदि मान्ते मितेबा ङ्याबो सङ्गत कि, अथवा हतिबा ङ्याबो ठेरे कि यहुदि झिकि चाला अनुचित हिना नाङान ताम ख्योएला छ्या मेताइ, हचु हिन्नाङ कजसुबायि ङाला मि रेनला अपवित्र अर्थात भाभा ठानि माके नाइरे ताताना होतो। 29 हतिचाला क्योबि पाल्ला आपति च्याङ माताना ङा ख्युइ तेहा लेप्ते। ख्युइ ङाला चिला कापते? ता नोइ।"

30 तेहि कर्नेलियसयि नाइसोङ, "ङि स्यियि ताङला हा:लाम धि भेलाला तिन बजेयि मोनलाम किन ताताता धु, तेहि चहकिलो कोहिला कोकोनि मिझि ङाहि धुनला लाँसोङ, 31 राङ नाइसोङ, ‘कर्नेलियस, कजसुबायि धुनला ख्युइ मोनलाम ङ्याङ्याना होतो, राङ ख्युइ टाङनाबाला पिपिनि दानयि याका च्युङसोङ। 32 हतिचाला योप्पाला मितेबा चाँरे पत्रुस नाङान सिमोनला क्ये ताङदे चाँसोङ। खो छो छोम्मुवायि नेमुला पाबुइ लाइकिङान सिमोनयि खिमला ताताता धु।’ 33 तेहि ङाहि हतितुइना राङ ख्युइ तेहा मि चाँसोङ, राङ ख्योए ङिङच्ये राङ ङ्याबो लेप्सोङ। ता प्रभुने ख्योएला आदेश पिपिनि ताम पोरो ङ्यानयापला ङे पोरो कजसुबायि धुनला ङिहा होतो।"

34 तेहि पत्रुसयि ताम नाला छेलसोङ, "तेम्बारे ङा थुइदु, कि कजसुबायि छह मिकिता।"✝10:34 व्यवस्था १०:१७; २ इतिहास १९:७ 35 हिन्नाङ मितेबे पोरोला सु खो ङ्याबो झिकिनलो, राङ लाइ ल किन, हति ग्रहण योग्य हुन। 36 कजसुबायि इस्राएलितेबाला चाँचाँबि लोन, अर्थात येशु ख्रिष्टयि लाम्ला टाइक्ये क्याक्याइबि शान्तियि लोन ल खेला छ्या होतो। खो राङ पोरोयि कजसुबा ना।✝10:36 भजनसंग्रह १०६:२०; यशैया ५२:७ 37 युहान्नायि टाइक्ये क्याक्याइबि बप्तिसमायि च्येला, गालिलने सुरु क्याइरे यहुदिया काङ टाइक्ये क्याक्याइबि वचन धि राङ ना, 38 कि कजसुबायि नासरतयि येशुला पवित्र आत्मा राङ शक्तियि अभिशेक क्याइसोङ लाइ ल किन राङ दियाबलसने तुका पिपिनातेबाला टाक्तु झ्युकिन राङ ढुनलो, चिचालानाना कजसुबा खो ङ्याबो धु। 39 "तेहि ख्युइ यहुदितेबे देश राङ यरुश्लेमला क्याक्याइबि तामयि ङे साछि ना। खोला खि पालेपला तारे याङ सेसोङ। 40 खोला राङ कजसुबायि ङिन सुबाला सोम्बो सोइरे लाङसोङ, राङ खोला तान्सोङ, 41 मि पोरोला माना, हिन्नाङ हु सुला ल कजसुबायि साछियि धोला धाधामा होतो, राङ खो स्यि छारते सोम्बो च्युङ छारते ङि खो ङ्याबो ङ्योपा साइरे। 42 ख्युइ ङेला जनताला टाइक्ये कितु, राङ खो सोम्बो राङ स्यिस्यियातेबे ल अल भेङान होङयापला कजसुबायि लामला धाधामा मि ना नाङानयि साछि तेरयापला आदेश पिपिना धु। 43 ङोन्सेखिलङान पोरोयि ख्युइ साछि पिपिना होतो, कि ख्युइ थोला हिछे किङान पोरोयि ख्युइ मिनयि लाम्ला तिक्पा माप खुकिन।" ✝10:43 यशैया ३३:२४; यशैया ५३:५-६; यर्मिया ३१:३४; दानिएल ९:२४

44 पत्रुसयि धि तामतेबा नेननेन वचन ङ्यान ङान पोरोयि थोला पवित्र आत्मा पापतु च्युसोङ। 45 यहुदि मान्ते मितेबे थोला याङ पवित्र आत्मायि वरदान च्योच्युवा थोङदे पत्रुस ङ्याबो होङान यहुदि हिछे किङानतेबा हा:लाइसोङ। 46 चिचालानाना स्यान क्येला ताम नाइरे हतिबे कजसुबायि छे तेतेका हतिबे थोइसोङ। तेहि पत्रुसयि नाइसोङ, 47 "ङेला च्वरा पवित्र आत्मा खुङान धिबाला छ्युयि बप्तिसमा होङयापला सुइ माना न ङ्युइकिन?" 48 तेहि क्युइ हतिबाला येशु ख्रिष्टयि मिनला बप्तिसमा पिन नाइरे आदेश पिन्सोङ। तेहि हतिबे पत्रुसला चिगा तेरयापला हतियाराङ त्योए नाइरे स्युवा क्यापसोङ।