1 पत्रुस राङ युहान्ना मितेबा ङ्याबो ताम नेन राङ धु, पुजारितेबा, मोनलाम क्यासि खिमयि घोबा राङ सदुकितेबा ख्युइ तेहा लेप्सोङ। 2 हतिबा स्येताङ लाँलाँबा धु, चिचालानाना येशुला स्यिरे सोम्बो च्युङदे लाँकिन नाङानयि ताम हतिबे मितेबाला लोबिन राङ धु राङ घोषना किन राङ धु। 3 तेहि हतिबे खोङला सुङसोङ, राङ ङाइटो थु झ्याल्ला पोरसोङ, चिचालानाना हति भेला कमु च्युङ छारतु। 4 हिन्नाङ वचन ङ्यानङानतेबे नाङने लेइराङयि हिछे क्याइसोङ, राङ हिछे किङानयि टाँगा हा:लाम तोङ ङा च्युङसोङ।

5 ङाइटोतेला हतिबे आङकिङान, केवा किङान गुरुतेबा राङ शास्त्रितेबा यरुश्लेमला झोमसोङ। 6 घोबा पुजारि हन्‍नास, कैयाफा, युहान्ना, अलेक्जेन्डर राङ घोबा पुजारि प्येरायि पोरो हतिया धु। 7 हतिबे पत्रुस राङ युहान्नाला उइला लाँङदे टिसोङ, "काङ शक्तिने अथवा सुइ मिनला क्युइ धि क्याक्याइबा ना?"

8 तेहि पवित्र आत्मायि खाँरे पत्रुसयि हतिबाला नाइसोङ, "मितेबे आङकिङान राङ केवा किङान गुरुतेबा, 9 तिरिङ ङि मि ढुडिया झिकि थोला लाइ ल झि क्याक्याइबि भारेला हति काङ च्युइयि टाक्तु च्युक्ते नाइरे टिना, 10 खे पोरोला राङ इस्राएलयि मि पोरोला छ्या सअ, कि खि क्रुसला ताताबि राङ कजसुबायि स्यिस्यियाने सोम्बो सोसोइबि, खो राङ नासरतयि येशु ख्रिष्टयि मिनला धि मि खि धुनला टाक्ते लाँलाँबा धु। 11 ‘हति टोउ राङ ना, काङ टोउते, सोङानतेबे मिके नानाइबा होतो, सो थाल्ला कुना यि घोबोयि टोउ च्युच्युङा होतो।’ ✝4:11 भजनसंग्रह ११८:२२; दानिएल २:३४-३५ 12 स्यान च्यालाङ मुक्ति मेता, चिचालानाना मुक्ति खुयापला तेङलायि हअला मितेबाला स्यान च्याङ मिन पिपिना मेता।" 13 जब हतिबे पत्रुस राङ युहान्नायि हा:म थोङदे, राङ हतिबा छोइ मालाबि मि ना राङ शाधाराण मि ना नाइरे हा:कोसोङ, तेहि हतिबा हा:लाइसोङ, राङ हतिबा येशु ङ्याबो तोकिन नाङान हतिबे हा:कोसोङ। 14 हिन्नाङ टाटाकि मिला हतिबा ङ्याबो लाँलाँबा थोङदे हतिबे च्याङ ताम ना माङ्युइसोङ। 15 हतिचाला हतिबाला यहुदिबे नेतातेबा झोझोमि तुमने फिला ढोयापयि आदेश पिन्छारते हति जु नेन राङ खोरे नाङला टोइ क्याइसोङ। 16 "धि मिबाला ता हु च्हि किच्याइ? चिचालानाना तेम्बारे राङ धिबाने हा:लाइयापयि लाइ झि च्युङदु नाङान यरुश्लेमला त्योएङानयि मि पोरोला थोङ छारतु, राङ ङि धि मिके ना मिङ्युइबा। 17 हिन्नाङ धि ताम जनताला टाइक्ये मा योङ नाइरे ‘याङ धि मिनला मि रेन ङ्याबो खे च्याङ माना’ नाइरे हुइ धिबाला चेतावानि तेर कोयिन।"

18 तेहि हतिबाला क्ये ताङदे "ता याङ येशुयि मिनला ताम माना राङ छोइ च्याङ मातेर" नाइरे हतिबे आदेश पिन्सोङ। 19 हिन्नाङ पत्रुस राङ युहान्नि हतिबाला जवाक पिन्सोङ, "कजसुबायि ताम ङ्यानयापले ख्युइ ताम ङ्यानयाप कजसुबायि मिला ल हिना कि माना खेराङ विचार कि।"

20 "चिचालानाना ङि थोथोङा राङ थोथोइबा तामतेबा मानाइबि ङ्युइ राङ मिङ्युइबा।" 21 हतिबे ङेबा तेरयापयि च्युइ राङ माखुबा राङ हतिबाला तरह लेइराङ थरकाइ चेरे ताङसोङ, चिचालानाना काङ घटना घटि च्युच्युङा होए हति चाला मि पोरोयि कजसुबे छे धेकिन्दु। 22 चिचालानाना काङ मि हा:लाइयापयि लाइने टाटाका होतो, हति लो खलङिले मा हिना।

23 थारथोनयाप खुरे हतिबे रेँ रुवायि तेहा लेप्सोङ, राङ घोबा पुजारितेबा राङ केवा किङान गुरुतेबे नानाइबि ताम पोरो हतिबाला स्येसोङ। 24 जब हतिबे धि थोइरे, हतितुइना हतिबे लाम्मा झिला कजसुबा ङ्याबो रेँ क्ये तेक्ते नाइसोङ, "हे प्रभु, सुइ तेङला, पिरथिवि, छो छोम्मुवा राङ हतिला होएता क्यु पोरो सोइसोङ।✝4:24 प्रस्थान २०:११; नहेम्हास ९:६; भजनसंग्रह १४६:६ 25 सुइ पवित्र आत्मायि लाम्ला रेँ स्यापच्यि हुइ ताङबुइ दाउदयि खाने नाइसोङ, ‘यहुदि मान्ते मितेबा चिला स्येताङ लाँदुइ, राङ मितेबे फान मेते तामतेबा चिला टान्दे? 26 परमप्रभुयि विरोधला ख्युइ अभिशेक क्याक्याइबा मियि विरोधला पिरथिवियि क्यालबो लाँसोङ, राङ आङकिङानतेबा ङ्याबो झोमसोङ।’✝4:26 भजनसंग्रह २:१-२ 27 चिचालानाना तेम्बारे ख्युइ अभिशेक क्याक्याइबा, ख्युइ पवित्र स्यापच्यि येशुयि विरोधला हेरोद राङ पन्तियस पिलातस ङिकार, यहुदि मान्ते मि राङ इस्राएलतेबा ङ्याबो धि भजारला राङ झोझोमा होतो।✝4:27 मत्ति २७:१-२; मर्कुस १५:१; युहान्ना १८:२८-२९ 28 हति कियापला राङ ख्युइ लाक्पाने राङ ख्युइ योजाना च्वरा ताङलाने राङ नाइ छाछारा होतो। 29 ताता हे प्रभु, हतिबे थरकाइ चेचेबि थोला मि तोइ, राङ ख्युइ यक्पुवातेबाला पुरा हा:म राङ ङ्याबो ख्युइ वचन नारु छ्यु। 30 राङ टाक्तु झ्युयापला ख्युइ रेँ लाक्पा ख्योङि तुइना, रेँ पवित्र स्यापच्यि येशुयि मिनयि लाम्ला हा:लाइयापयि लाइ राङ हो:न तोरयापयि लाइ होङवार सअ।"

31 हतिबे मोनलाम क्याप छारते च्येला हतिबा झोझोमि साला धारसोङ, राङ हतिबा पोरो पवित्र आत्मायि खाँसोङ, राङ हतिबे हा:म राङ ङ्याबो कजसुबायि वचन नाइसोङ

32 हिछे किङानतेबे तुम पोरो सम च्हि राङ आत्मा च्हि च्युच्युङा धु, राङ हतिबे नाङने चिकि याङ रेँ क्यु समप्ति च्याङ क्यु धि ङाहि ना नाइरे मिना, हिन्नाङ हतिबे क्यु पोरो पिमा ना। 33 हति लोब्टुतेबे शक्ति छेया राङ ङ्याबो प्रभु येशु याङ स्यिरे सोम्बो च्युङदे लाँयापयि भारेला साछि तेरिन्दु, राङ हतिबा पोरोयि थोला ङिङच्ये छेया ताताता धु। 34 हतिबे नाङने रेनला च्याङ क्युयि कोइबा मिहा, चिचालानाना चोम सा स्यिङ कि खिमयि ताक्पो हिना, हतिबे हति चँहरे हति घोङ क्याकिन्दु, 35 राङ लोब्टुतेबे काङबाला भोरिन्दु, राङ सुगा सुगाला काङकाङ तामयि कोइबा हुन, सो पोरोला घोकिन।

36 ता साइप्रस देशयि लेवि क्युइयि योसेफ, सुला लोब्टुतेबे बारनाबास नाइरे मिन पोपोरा होतो हति समस्युयि च्यिटा ना। 37 ख्युइ रेँ सा राङ हति आलाइ ख्योरे लोब्टुबे काङबाला पोरसोङ।