1 रेँ लोब्टु च्युङिला आदेश पिन छारते येशु हतिने हतिबे भजारला लोप्तु राङ लोन ल टाइक्ये कितु पुइसोङ। 2 बप्तिस्मा तेरङान युहान्नायि ख्रिष्टयि लाइतेबे टाइक्ये झ्याल्ला थोइसोङ, राङ रेँ लोब्टुतेबाला ख्युइ तेहा धि ताम ढिरु चाँसोङ। 3 हतिबे येशुला टिसोङ "होङानते ख्योराङ ना, कि ङे स्यानला कुँरे तोच्याइ?" 4 येशुयि हतिबाला नाइसोङ, "खि थोथोइबा राङ थोथोङि ताम युहान्नाला नोइ, 5 कानातेबाला मि खुङान ना, राङ ढुढियातेबा काङबि ढोङान ना। लाक्पा काकामि नाझा होएतातेबा टाङान ना। नामज्यो होहोनातेबा थोइ ङ्युङान ना। स्यिस्यियातेबा सोम्बो च्युङदे लाँलाँबा धु, राङ टाङनाबाला लोन ल टाइक्ये किनराङ धु।✝11:5 यशैया ३५:५-६; ६१:१ 6 ‘काङानतेबा सुइ ङाहि थोला संका मिकिता।’"

7 तेहि युहान्नायि लोब्टुतेबा पुते येशुयि युहान्नायि भारेला मिझोमतेबाला नाला छेलसोङ, "जब खे युहान्नाला तारु च्याङ मेते साला पुते च्हि थोङसुइ? च्हि हुरबुइ ङ्युमि ङोलोला स्युस्युबा? 8 हतितुइना खे चिला थोन्दे? च्हि कोहिला झ्याबो कोकोनि मिला तारु? कोहिला झ्याबो कोकोनाता क्यालबुइ खिमला तोकिन। 9 खे चिला थोन्दे? ङोन्सेखिलङानला तारु? हिनाइ, ङा ख्योएला नाज्याइ, ङोन्सेखिलङान याङ मि छेयाला। 10 चिचालानाना युहान्ना हति मि ना सुइ भारेला पवित्र शास्त्राला टिटिबा धु, ‘तोइ, ङा ङाहि तेङलायि लोन खेराङानला ख्युइ ताङ ताङला चोङज्याइ, सुइ ख्युइ धुनला ख्युइ लाम तयार सोङान ना।’✝11:10 मलाकि ३:१ 11 तेम्बारे ङा खेला नाज्याइ, पुमोला क्येक्येबाने बप्तिस्मा तेरङान युहान्नाले छेया स्यान सु याङ मेता। हचु हिन्नाङ तेङलायि राज्यला सु पोरोले छुवा होए, हतिते युहान्ना छेया ना। 12 बप्तिस्मा तेराङान युहान्नायि टाइक्ये किति भेलाने थाल्ला थु तेङलायि राज्ययि सु छेया क्याइरे याला-याला डुन राङ धु, तेहि आङ छेया मितेबा तोप राङ ङ्याबो हतिला सुङिन। 13 चिचालानाना युहान्नायि भेला थु ङोन्सेखिलङानतेबा पोरो राङ मोशयि ठिमयि कजसुबायि राज्यि भारेला ङोन्सेखिखिला होतो। 14 खे ङ्यानयापला तयार होएना, होङानयि एलिया धि राङ ना।✝11:14 मलाकि ४:५; मत्ति १७:१०-१३; मर्कुस ९:११-१३ 15 सुला ङ्यानयापयि नामज्यो होए, हति ङ्योन।" 16 "ता ङा धि पुस्ता काङ ङ्याबो थुक च्याइ? धि ता भजारला आलिचेङान च्यिटा टिमा च्वरा ना, सुइ हतिबे रुवाला क्येतुइ, राङ नेन, 17 ‘ङि खि चाला लिउ पुइरे, हिन्नाङ खे मा छ्यामसोङ। ङि बैरायि लु लाँरे, हिन्नाङ खि छिमा मापिसोङ।’ 18 चिचालानाना युहान्ना सेन राङ थुङिन मालेबा, राङ हतिबा खोला ढे काकाला धु नाइरे नेन्दु। 19 मि पिजा सेन राङ थुङिन लेप्सोङ, राङ हतिबा नेन्दु, ‘तोइ, साढिया, छहझिया, कर तुइङान राङ तिक्पा किङानबे रुवा!’ कजसुबायि बुद्धि थारका ना नाङानयि ताम हति लाइने राङ प्रमाणित हुन।"

20 काङ-काङ भजारला येशयि लेइराङ शक्तिशालि लाइतेबा क्याक्याइबा होतो, ख्युइ हतिबाला ङारतु च्युसोङ, खुँते हतिबे घ्योप्पा माकाइबालो। 21 "धिक्कार ख्योएला, ए खोराजिन! धिक्कार ख्योएला, ए बेथसेदा! चिचालानाना खि तिया क्याक्याबि शक्तिशालि लाइबा टुरोस राङ सिदोनला क्याइबा नाना हतिबे ख्युइ राङ पुवायि कोहिला कोन्दे कघि थाबे कुइरे घ्योप्पा क्याइछाराना।✝11:21 यशैया २३:१-१८; इजकिएल २६:१-२१ 22 हिन्नाङ ङा खेला नाज्याइ, ल अल भेयापयि ङिनला खेले केना ता टुरोस राङ सिदोनयि हालत लेइराङ कुइरे त्योएयाप हुन। 23 ए कफर्नहुम, च्हि ख्योए पान्नाङ थु धेकिनाइ च्हि? ख्योए हअलु थु ढिमङान ना। चिचालानाना ख्युइ तिया क्याक्याइबि शक्तिशालि लाइतेबा सदोमला क्याइबा नाना हति तिरिङयि ङिन थु लुइलुइबा होतोना।✝11:23 यशैया १४:१३-१५; उत्पत्ति १९:२४-२८ 24 हिन्नाङ ङा ख्योएला नाज्याइ, ल अल भेयापयि ङिनला ख्योएले ता सदोम मुलुयि हालत लेइ कुइरे त्योएयाप होङान ना।"

25 हति भेलाला येशुयि नाइसोङ, "हे आके, तेङला राङ पिरथिवियि प्रभु, ङा ख्योएला कटिनक्या नाज्याइ, चिचालानाना ख्युइ धि ताम बुद्धिमान राङ स्येरे भाइरे पोरसोङ, हिन्नाङ च्यिबातेबाला हति थोङदु च्युसोङ।" 26 हिना, आके, चिचालानाना ख्योएला धि ल स्येदु। 27 "ङाहि आकि पोरो क्यु ङाला स्यास्याता होतो। आकि अर्थात पिजाला सुइयाङ ङोमिस्येबा, राङ पिजि अर्थात आकेला सुइ याङ ङोमिस्येबा, तेहि हतिबे याङ ङोसेकिन सुला पिजि आके थोङदु झुयापयि धोप्पा किन।"✝11:27 युहान्ना ३:३५; १:१८; १०:१५ 28 "हे पोरो क्यु राङ सम तुयि खाँखाँबा बा, ङाहि तेहा सअ, ङा खेला ङालसोरु झ्युकच्याइ। 29 ङाहि ङेरस्यिङ रेँ थोला खेर, राङ ङा ङ्याबो लोप, चिचालानाना ङा सम याबो राङ सम सिपोयि मिना, तेहि खि रेँ समला ङाल्सो खुङान ना।✝11:29 यर्मिया ६:१६ 30 चिचालानाना ङाहि ङेरस्यिङ लाइला होतो, राङ ङाहि खुरबो याँ होतो।"