1 ख्युइ सोएयापला शाउल याङ सहमतला होतोलो। हति ङिन यरुश्लेमला च्युच्युङायि चर्चयि विरोधला तुका छोम्मुवा झि सुरु च्युङसोङ, राङ लोब्टुतेबा अर्थात हतिबा पोरो यहुदिया राङ सामरियायि छेत्र यहला खा थोरसोङ। 2 भक्ति मितेबे स्तिफनसला खेरते कुसोङ राङ ख्युइ चाला छिमा लेइराङ ताङसोङ। 3 हिन्नाङ शाउल खिम खिमला स्युरे चर्चला सोएयापयि ला किन राङ धु। ख्युइ पिजा राङ पुमोला ढुकिन राङ झ्याल्ला झ्युकिन्दु।✝8:3 प्रेरित २२:४-५; २६:९-११

4 तेहि हति खा थोरते तातातातेबे फाला छुला पोरोला पुते वचन टाइक्ये क्याइसोङ।

5 फिलिपते सामरियायि भजार झिला पुते हतिबाला ख्रिष्ट टाइक्ये किन्दु। 6 फिलिपयि नानाइबि वचन थोइरे ख्युइ क्याक्याइबि हा:लाइयापयि लाइतेबा थोङदे, मियि तुमतेबे सम च्हि च्युङदे ख्युइ ताम ध्यान पिन्दे ङ्यानसोङ। 7 चिचालानाना लेइराङने भाभा आत्मातेबा क्ये धोनिन राङ थोनाला छेलसोङ, राङ लेइराङ स्हुयि चा मिघुलङानतेबे नाझा होएतातेबा राङ खोरियातेबा टासोङ। 8 हति च्वरा क्याइरे हति भजारला लेइराङ किप्पो च्युङसोङ।

9 सिमोन मिन क्याक्याइबि मिझि हतिया धु। ख्युइ ताङलाने राङ हति भजारला जादु क्याइरे हति सामरियायि मितेबाला हा:लाइतु च्युतु, रेँ राङला ङाराङ ना नाइरे ठानि किन्लो। 10 हति मिला टिमाने राङ छेया थु जु नाइरे मानि किनलो, "धि मि कजसुबायि हति शक्ति ना, काङतेला शक्ति हा:छेया नेन।" 11 हतिबे खोला नेनलो, चिचालानाना भेला लेइराङने क्युइ रेँ जादुयि मितेबाला हा:लाइतु च्यु छारतु। 12 हिन्नाङ जब हतिबे कजसुबे राज्य राङ येशु ख्रिष्टयि मिनयि लोन ल स्योएङान फिलिपयि ताम ला हिछे क्याइसोङ, तेहि पि:जा राङ पुमोतेबे बप्तिस्मा खेरसोङ। 13 सिमोन खुरि याङ हिछे क्याइसोङ। ख्युइ बप्तिस्मा खेरसोङ, राङ खो फिलिप ङ्याबो पुइसोङ, राङ हा:लाइयापयि लाइ राङ शक्तियि छेयाछेया लाइ क्याक्याइबा थोङदे खो हा:लाइदु।

14 सामरियायि मितेबे कजसुबायि वचन ङ्यानसोङ नाङान थोइरे यरुश्लेमला होएता लोब्टुतेबे पत्रुस राङ युहान्नाला हतिबे तेहा चाँसोङ। 15 हतिबा हतिया लेप्ते हतिबाला पवित्र आत्मा खुहोङ नाइरे हतिबे चाला मोनलाम क्यापसोङ। 16 चिचालानाना हतिथु हतिबे नाङने रेनयि थोला याङ खो लेलेबा मेता। हतिबे बप्तिस्मा प्रभु येशुयि मिनला मात्र च्युच्युङा होतो। 17 तेहि ख्योए रेँ लाक्पा हतिबे थोला पोरसोङ, राङ हतिबाला पवित्र आत्मा खुसोङ। 18 ता लोब्टुतेबे लाक्पा भोरितुइना पवित्र आत्मा खुयिन्दु नाइरे थोङदे सिमोनयि जु नेनराङ हतिबाला आलाइ तेराला छेलसोङ, 19 "ङाला याङ धि शक्ति नाङ, राङ काङ काङला लाक्पा पोर छारते च्येला हति पवित्र आत्मा खुहोङ।"

20 हिन्नाङ पत्रुसयि नाइसोङ, "ख्युइ आलाइ ख्योए ङ्याबो मासि सह, चिचालानाना कजसुबायि वरदान आलाइयि ङ्यो ङ्युइकिन नाइरे ख्युइ विचार क्यइदु। 21 धि भारेला न त ख्युइ भाग होतो न हिस्सा होतो, चिचालानाना कजसुबायि धुनला ख्युइ सम थारका मिधु।✝8:21 भजनसंग्रह ७८:३७ 22 हतिचाला ख्युइ अलयि चाला घ्योप्पा कि तेहि प्रभुला मोनलाम क्योप, राङ हा:लाम ख्युइ समयि धि च्वरा विचार माप होङ। 23 चिचालानाना ङा थोङिन्दु, ख्योए खाडेयि खाँखाँबा धु, तेहि तिक्पायि लाला धु।" 24 तेहि सिमोनयि नाइसोङ, "खिरि राङ ङाहि चाला प्रभुला मोनलाम क्योप, राङ क्युइ नानाइबि ताम च्याङ ङाहि थोला मायोङ।" 25 तेहि हतिबे साछि पिन छारते च्येला राङ प्रभुयि ताम नाइ छारते सामरियि लेइराङ युलला लोन ल टाइक्ये किन राङ हतिबा यरुश्लेमला लक्तेलो।

26 हति च्येला प्रभुयि तेङलायि लोन खेरङान झिकि फिलिपला नाइसोङ, "लाँरे च्याङ यहला यरुश्लेमने गाजा यहला ढोङानयि लामला क्यु। हतिया च्याङ मेते लाम धु।" 27 तेहि फिलिप लाँरे पुइसोङ, राङ इथियोपियायि फोलोमोलो झिला ठेसोङ, काङते इथिपिया देशयि क्यालमु कन्दाकिया पद छोम्मुवा राङ लेइराङ क्युयि कोषाध्‍यछ हिना। मो यरुश्लेमला आराधाना कितु पुइतु। 28 मो लक्ते हुन त्येतु, राङ रेँ ताङाला ताते यशैया ङोन्सेखिलङानयि किताब टकिन त्येतु। 29 तेहि पवित्र आत्मायि फिलिपला नाइसोङ, "क्यु राङ हति ताङा ङ्याबो क्यु।" 30 फिलिप हति तेहा स्युरे पुइसोङ, राङ खोला यशैया ङोन्सेखिलङानयि किताब टोङान थोइरे मुइ नाइसोङ, "ख्युइ टटबि ताम हा:कुन धुये?"

31 तेहि ख्युइ नाइसोङ, "सुयाङ मानाइबि ङाहि च्हिरु क्याइरे हा:को ज्याइ?" तेहि मुइ फिलिपला ताङायि थोला कालदे मो ङ्याबो त्योएयापयि स्युवा क्यापसोङ। 32 ता ख्युइ टकिन ताताति पवित्रशास्त्रयि लाइनते धि ना, ✝8:32 यशैया ५३:७-८ "च्हिरु क्याइरे लुला तुपयापयि चाला खेरिन, वा लु हति तुपङानतेबे धुनला च्यामाना तोकिन, हति च्वरा क्याइरे राङ क्युइ रेँ खा मापेसोङ। 33 ख्युइ ना च्याच्याति अवस्थाला खोला न्याय माखुसोङ। क्युइ पालियि मनङि सुइ क्याक च्याइ? चिचालानाना ख्युइ मिजे पिरथिविने मासि च्युङसोङ।"✝8:33 यशैया ५३:७-८

34 तेहि हति फोलो मोलोयि फिलिपला टिसोङ, "ङिङच्येरे ङाला नोइ, ङोन्सेखिलङानयि धि ताम सुला नानाइबा ना, ख्युइ खुरि भारेला कि स्यान सुगे भारेला?" 35 तेहि फिलिपयि रेँ खा पेरे पवित्रशास्त्रयि हति लाइनने राङ खोला येशुयि लोन ल स्येसोङ। 36 तेहि खो लामला ढुनढुन छ्यु टिझि होएते साला क्योप छारसोङ। हति फोलोमोलोयि नाइसोङ, "तोइ, ङिहा छ्यु धु, ङाला बप्तिस्मा होङयापला सुइ घा ङ्युकिन?" 37 फिलिपयि नाइसोङ, "तेम्बारे सम पोरोयि हिछे किना ख्युइ बप्तिस्मा खेरना हुन।" हति जवाक पिन्सोङ "येशु ख्रिष्ट राङ कजसुबायि पिजा ना नाइरे ङा हिछे किन होए।"

38 ख्युइ ताङा घायापयि आदेश पिन्सोङ, तेहि फिलिप राङ हति फोलो मोलो ङिकार छ्युला पुपसोङ, राङ ख्युइ हतिला बप्तिस्मा पिन्सोङ। 39 हिन्नाङ जब हतिबा छ्युने फिला थोन्दे, तेहि प्रभुयि आत्मि फिलिपला सुङदे खेरसोङ, राङ हति फोलो मोलुइ खोला याङ माथोङा, राङ हति केन राङ रेँ लाम स्युरे पुइसोङ।✝8:39 १ राजा १८:१२ 40 हिन्नाङ फिलिप अश्दोदला थोङसोङ, राङ कैसरिया माक्योप थु भजारतेबाला लोन ल स्योकिन राङ पुइसोङ।