1 येसुये नोरंलाई सात्रोङाम हैओडोवरं, "टोबो मीये येःङलं अङ्गुर रुपिडे चारकोनाङाम बार ओबारिव, अङ्गुर पेने टोबो कोलो ओठाङो। होकाम अङ्गुरलो उरीः ठाङ्ने टोबो खाल्टा ओघोव। होकाम टोबो टान्ड झैडे नोये अङ्गुर येःङ अडिया वानेराई याकुइटं राःडे, ओल छुटं डेसडे ओनाव। 2 अङ्गुर फ्याने बेलाकं हो मीये टोबो ओनौकरलाई अङ्गुर येःङलं अडिया वानेराई लेवङं ओभागला अङ्गुर चनाव उपरिःङो। 3 होकाम होराई नो नौकरलाई क्योःडे यापोःव होकाम रितो उकुइ यासोवलो। 4 फरि नोये नोराई लेवङ छुटं ओनौकरलाई उपरिःङो, होलाई पनि नोराई ओङैःटं पोःडे बिज्यात याझोयो। 5 हो येःङ साहुये फरि पनि टोबो ओनौकरलाई उपरिःङो, होकाम होलाई यासोःयो, होकाम उरु भ्यारंलाई पनि उपरिःङोरं, नोरंलाई पनि कोइरंलाई यापोःवरं कोइरंलाई, यासोःयोरं।

6 ओल्स टोबो उयुङ्का ओज़ा लेव, ‘नोराई ङाज़ालाई के मान योरंके’ वार्डे स्यान्टैराई भन्डा याछिन्डे नो ओज़ालाई उपरिःङो।

7 होकाम हो अडिया वानेरं ऐ वार्डे यापाङसिव, ‘आव के अङ्स ज़्याने ओज़ाची। गराच्योके, आवलाई गेसैःके होकाम ओसम्पति गेमीज़ टानेले।’ 8 होकाम नोराई होलाई क्योःडे सैःडे, हो अङ्गुर येःङलाम पाखाङ याख्यानाव।"

9 होकाम येसुये फरि हैओडोवर, "अङ्गुर येःङलो ओसाहु कै लेके? अङ्गुर येःङलो ओसाहु रानेले होकाम नो अडिया वानेरंलाई सैःनेरंले, होकाम अङ्गुर येःङ छुटंरंलाई यानेले। 10 जे सास्त्रटा आव बचन जिपरिव माले?

‘जो लुङलाई ज़ीःम झैनेराई फालिम याझोयो

हो लुङज़ उगुर लुङ ओटाव।✝

11 आव के स्यान्टैराई भन्डा घ्योव प्रभुङाम टाव ची,

होकाम गे गेरःङकं आव अचम्बलाची ले!’"

12 होकामटानि होराई येसुलाई क्योःने यापानो, कडालेकं आव सात्रो येसुये नोराई याबिरोडलं हैओवारो वार्डे याबुझिव। होकाम नोरं माहुल्ये मीरासं याछेवये नोराई येसुलाई होकंज़ राःडे यानाव।

13 होकाम छिन्डे येसुलाई ओल ओपाङो रोःटंज़ फसैने वार्डे नोराई फरिसीरं सोनो हेरोडीरंलाम कोइ-कोइ मीरं येसु लेवङं यापरिःङोरं। 14 नोरं होकं राडे येसुलाई हैयाडोव, "गुरबा गेलाई ठाज़ ले, नङ सत्यज़ नले, होकाम नङ मीराई कै वार्रके वार्ने रोःलो ओवास्ता नम्डोये कडालेकं नङ मी रःङडे येःन नम्डोये बुरु परमेस्वरलो ओयेम चावसं नपैरंये। हैगवार्ङनके, कैसरलाई सिरमा फोने टाये सै माटाये? 15 गे सिरमा फोने सै माफोने?"

येसुये नोराई याकैफट ठा सन्डे हैओडोवरं, "जे ङालाई कडाने जेजान्चिसङज़्याव? टोबो पैसा आकं रैडे सटन्च्यो।"

16 होराई टोबो पैसा यारोयो। होकाम येसुये होरंलाई हैओडोवरं, "आवटा लिज़्याव सुरुप सोनो छाप काङ्कालो?"

होराई येसुलाई हैयाडोव, "कैसरलो।"

17 होकाम येसुये होरंलाई हैओडोवरं, "कैसरलो कैसरलाई याच्यो, परमेस्वरलो परमेस्वरलाई याच्यो।" होरं येसुलो ओरोः ठैडे अचम्ब याटाव।

18 सिवलाम ज्युङडा माटारंये वार्ने सडुकीरं येसु लेवकं याराव, होकाम येसुलाई यापजोयो, 19 "गुरबा मोसाये गेलाई सर्डे नैड्यासिव, कोइ मीलो ओडाज्यु बिना सन्तान सिडे ओज्यालाई याख्यानोयोखे भने, ओभाइये नो मेमालाई लाङ्डे ओडाज्युलो ओसन्तान ओझोयोकं। 20 टोबो ज़ीःमलं सात भाइ लेवरं। जेठाये टोबो ज्या ओरोयो, होकाम हो बिना सन्तानज़ उसिव। 21 होकाम माईलाये हो मेमालाई बिह्याँ ओडोव, हो पनि बिना सन्तानज़ उसिव। होकाम साइँलाये पनि हो मेमालाईज़ बिह्याँ ओडोव। 22 होकाम सात भाइराईज़ हो मेमासं बिह्याँ याडोव हैनि पनि यासन्तान माटाये। होकाम छिन्डे हो मेमा पनि उसिव। 23 आबो सिवलाम ज्युङडा याटाकं हो मेमा काङ्कालो ओज्या टा के? कडालेकं हो मेमासं सात भाइराईज़ बिह्याँ याडोव।"

24 होकाम येसुये नोरंलाई हैओडोवरं, "जेअलमलिज़्याव आव कारन माङ्कडोरो, न जे सास्त्र जेसनये न परमेस्वरलो ओसक्तिलाई जेसनये? 25 कडालेकं सिवलाम नोरं फरि ज्युङडा याटाकं, नोरं खेपा मेमा काङ्काराई पनि बिह्याँ माडोरंये, होकाम होरं स्वर्गटा लेने स्वर्गटा कटंवाल स्यानाव टारंये। 26 सिवलाम ज्युङडा टाने रोःटं जे मोसालो ओपोस्टोकोटं जिपरिव माले? कैजैडे जे चाङज़्याव पठरक्यालो बारेलं सर्सिव खन्डलं परमेस्वरये मोसालाई हैओडोव, ‘ङा अब्राहामलो ओपरमेस्वर, इसहाकलो ओपरमेस्वर सोनो याकुबलो ओपरमेस्वर ची।’ 27 परमेस्वर सिवराई यापरमेस्वर माङ्कची, ज्युङडाराई यापरमेस्वर ची, जे चब्बनैज़ अलमल टाडे जेले।"

28 सास्त्रटा न्याम पैने मीरंलाम टोबो ओराव, होकाम नोरं या-याज़ यायुसिज़्याव ओठोयो। येसुये मीरंलाई मिलिव जबाफज़ ओयोज़्यावरं रःङडे हो मीये येसुलाई ओपजोयो, "स्यान्टै आग्या भरिलाम घ्योव आग्या काव?"

29 येसुये हैओडोव, "स्यान्टैराई भन्डा घ्योव आग्या आवज़ ‘ए इस्राएल आव ठै, स्यान्टैराई भन्डा घ्योव प्रभु गेपरमेस्वर टोबो याज़ ले। 30 नङ प्रभु नपरमेस्वरलाई स्यान्टै नयुङये, स्यान्टै नज्युये, स्यान्टै नडिमाकये सोनो स्यान्टै नसक्तिये मया डो।’ 31 होकाम डोस्रा मुख्या आग्या आवज़, ‘नङ नछिमेकीलाई नङस्यावज़ मया डो।’ आव भन्डा घ्योव आग्या छुटं माले।"

32 नो सास्त्रटा न्याम पैने मीये येसुलाई हैओडोव, "गुरबा नङ सत्यज़ नपाङखे, प्रभु परमेस्वर टोबो याज़ले, हो प्रभु परमेस्वरकाम छुटं काङ्काज़ माले। 33 परमेस्वरलाई स्यान्टै युङये, स्यान्टै डिमाकये, सोनो स्यान्टै सक्तिये मया डो, होसोनो नछिमेकीलाई नङलाई स्यावज़ मया डो वार्ने आग्यारं स्यान्टै सघाडे चरैसिव सोनो बलिडानरं भन्डा पनि बनै चाव ची।"

34 नो मी बनै बुड्यालो हिसापये ओपाङो ठैडे येसुये नोलाई हैओडोव, "नङ परमेस्वरलो ओराज्यकाम टाडा नम्ले।" होकाम येसुलाई कडि रोःरं पजैने काङ्कालो उहिक्मतज़ माराये।

35 होकाम येसुये प्रार्ठना डोने ज़ीःमलं ओपैज़्यारंकं हैओवारो, "ख्रीस्ट डाउडलो ओज़ा ची वार्डे सास्त्रटा न्याम पैने मीराई कैजैडे हैयावारो? 36 कडालेकं डाउडये ओल्ज़ चोखो आत्माङाम हैवार्डेले,✝

‘स्यान्टैराई भन्डा घ्योव प्रभुये ङाप्रभुलाई हैओडोव,

नङ वोःर्डेङा ङाकुइडे चुङङन,

जोका समं नसुतंररंलाई

नखङ पाइतला ढुङलं ङामनैरं।’

37 होकाम डाउडये ओल्ज़ होलाई ‘प्रभु’ याडोवखे भने, काङामटानि नो डाउडलो ओज़ा ओटाव?"

होकाम होला माहुल्ये मीराई येसुलो ओपाङ बनै खुसि टाडे याठोयो।

38 होकाम ओपैज़्यारंकं येसुये हैओवारो, "सास्त्रटा न्याम पैने मीरासं जोगैसिडे लेच्यो। नोरं खेव क्वा क्वाइसिडे आडे होडे डुलिने सोनो बजारलं ढो डैने, चाव ङप्सिरंये। 39 होसोनो यहुडीरं याडुप्सिने ज़ीःमला मान डैने पो सोनो भट्यारयालं मान डैने पो खिमरंये। 40 नोराई रान्डिनिराई याज़ीःम लुटिरंये, होकाम लोकोचार झैनेलो लागिटं टब्बनखिव प्रार्ठना डोरंये। ऐटाव मीराई बनै घ्योव डन्ड डैनेलेरं।"

41 होकाम येसु प्रार्ठना डोने ज़ीःमला भेटी चरैःने छ्योकं उचुङो, होकाम स्यान्टैराई भेटी चरैःने जालं भेटी याझाज़्याव ओरोःङो। भ्या ढनी मीराई भ्या पैसा याचरोःयो। 42 होकाम टोबो गरिब रान्डिनिये राडे ताम्बालो नेबऱ्याङ छिनछिने पैसा रैडे टपैसा झैडे ओचरोःयो।

43 येसुये उसिसरंलाई ओल लेवकं खुल्डे हैओडोवरं, "डस्साज़ ङा जेलाई हैङाडाच्यो, भेटी चरैःने जालं स्यान्टैराई भन्डा भ्या आव गरिब रान्डिनिये ओचरोयो। 44 कडावार्क स्यान्टैराई यासं भ्या लेव होकाम भ्याज़ याचरोयो, हैनि पनि आव मेमाये के ओल्स ओमलेवछन्डानि पनि स्यान्टै ओकमै भरि ओचरोःयो।"