1 Izhin amumun amuŋ, mne cɛr zhin mplɛ ilɛ kǝŋe te kǝr zhin bǝ na lalɛ ba, ate yi ndi inuŋ ne lalɛ, ta yi ne nuŋ ndi atei klɛ tama ayi ben Tetɛɛ, ayi Yesɔ Kristi. 2 A yi wa ne nek tu ituk amkpur te zuk ta shur ne lalɛ mɔr ben lalɛ yi gɔŋmimi bɔbɔk.

3 Iyi amɛ tane zhiu ndi ta te zǝ lɛ maa. 4 Waŋ ndi a te di, <<Wa ne zhiu,>> Tǝ ba zǝ lɛ maa ba, a timu, ilɛ didik ba yi ben abɔu ba. 5 Ama ate zǝ lɛ maa, inyɛr yi Arik iyi didik ben abɔu, waŋa ayi ankɔŋ awaŋ ndi ayi tane zhiu: 6 Iwaŋ ndi ate di wa atei zeu, abɛ na ndi Yesɔ atsǝn.

7 Izhin akpa amuŋ, bam cɛr zhin ki yayas ba ai ki yi rɛ kukub iyiŋ ndi izhin ne men wɔi ne kuti. 8 Neme mne na nek zhin nkanlɛ yayas, iyiŋ ndi iyi anenen ben Yesɔ, ben abɛ zhin, izhin bǝ zhi ibu gayir, ilaŋ didik ilaŋ shak amkpa.

9 Waŋ ndi a te di iwa ayi ne miŋ kɛ laŋ te akyak zumen, abɛ zhi te iwa anak ari yi ne miŋ kɛ bu. 10 Iwaŋ ndi a te nyɛr zumen, ayi ne miŋ kɛ laŋ, iki yi duŋu a tar za ba yime ba. 11 Iwaŋ ndi akyak zumen, ayi ne miŋ kɛ tsǝn ne bu, ba na zhi amkpa waŋ ndi iwa agara ba, ibu ne ku ayi te duŋu ayi amfik.

12 Izhin amumun amuŋ amɔtsɔtsɔb,

Mcɛr zhin te zhin bǝ zhi te di ne ka zuk zhin ashur ne sak kɛ Yesɔ.

13 Izhineba atetɛ mcɛr zhin te zhin bǝ zhiu,

Waŋ ndi ayime nak rɛ kpaŋ kɛ na goŋ mimi.

Izhineba anzak, mcɛr zhin te zhin bǝ zhi

Tǝ zhin ne li ru ne mkpaŋ mimin kǝŋe.

Mcɛr izhineba, amumun,

Tǝ zhin ne men zhi Arik kukub.

14 Mcɛr zhin anuŋkub,

Le zhin bɛ zhi te zhin ne bǝ zhi te zhin ne zhi Arik.

Mcɛr zhin Atetɛ te zhin bɛ zhi te zhi ai ŋɔwa ne kuti yiŋɛ

Mcɛr zhin Anzak te zhin bɛ zhi,

Tǝ zhin klik, ilɛ kɛ Arik iyi ne asusun amin,

Izhin ne na klik naŋ shetan.

15 Kǝr zhin bǝ duŋ nyɛr kiki yi gɔŋmimi ben ki yiŋ ndi yi ne miŋ maa ba. Abaŋ ndi ate tanyɛme ne ki iyi gɔŋmimi, inyɛr yi Tetɛɛ ba yi ben abɛba ba. 16 Tǝ kɔte nii ndi iyi ne gɔŋmimi nyɛr ki ben kiki yi gɔŋmimi, ben ki ndi ba kam aneshir ne yi ba, ba rɛ ben Arik ba ire ben gɔŋmimi. 17 Goŋmimi ben kiki maa, ama waŋ ndi ate zǝ lɛ kɛ Arik, atei sɔŋ mla ne klɛ tu.

18 Izhin amumun amuŋ, waŋa ayi mkpaŋ kɛ klɛ tu, ir keŋ ndi zhin ne wɔ, ine te zor ayou Yesɔ a tei nyɛ, azizaŋa ma abɛ te zor amaa ne ka nyɛ tetɛk, ta bǝ zhi te gɔŋmimi ne nyɛ klɛ tu. 19 Ne ru ne miŋ mɔr, nak men rɛ kukub bane yi amɔr ba, abɛ di ne yi amɔr, abɛ klɛ ben abɛta, iru mǝne ne tsar tedi ba yi amɔr ba.

20 Ama nɛ kin zhin anye irɛ ber nǝ yi tsetser, izhin ne na zhi ina didik. 21 Bam ne cɛr zhin te di ba zhin ne zhi ina didik ba izhin ne zhi, imu ba rurɛ ben ne na didik ba. 22 Ai ŋɔwa ayi ne timu? ayi waŋ ndi a tun Yesɔ te di ba yi Almasihu ba ir abaŋa ayi aba ayi abɛ te zor waŋ ndi ayi izu Tetɛɛ. 23 Ba waŋ ndi atun Yesɔ ndi ate yik Tetɛɛ, iwaŋ ndi a tanyɛme ben Yesɔ a yi wa atei yik Arik.

24 Izhineba iki yiŋ ndi izhin ne men wɔi ne kuti, izhin bǝ duŋǝ sɔŋ ne asusun amin. Izhin te na amɛ, izhin ku sɔŋ ben Yesɔ izhin na yi ben Tetɛɛ. 25 Waŋa ayi ki yiŋ ndi ne akpa ayi aŋyak ita vli kɛ yaŋ klɛ tu.

26 Mcɛr zhin ki yiŋɛ ne tu ayi abaŋ ndi a wɔb te aba bǝ kpur zhin te zhin bǝ duŋ ankɔŋ adidik. 27 A tei zhin ba, ndi ne shur zhin anyɛ te ta izhu yi tsetser bene abɔu. Iku sɔŋ bene abɛ zhin, ba zhin wɔb te nuŋ abɛ na tsar zhin ba. Ama ndi ne shur zhin anyɛ yiŋɛ itsar zhin kɔte nii, izhin yik ayi lɛ didik ba yi mu ba, ir keŋ ndi ne tsar zhin izhin bǝ sɔŋ ne miŋ ma.

28 Fe azizaŋa izhin amumun amuŋ zhin bǝ nak sɔŋ ne miŋ maa, Mkpaŋ kɛŋ ndi me te munru ta bǝ zhɔk susun bene abɛ zhin ba ta te yik ki nuŋ yi shisha ba ne bɛr yi ŋur kam maa ba.

29 Izhin te zhi ayi tsetser, izhin bǝ zhi waŋ ndi a te na ki didik ayi ŋli maa.