1 Neme, izhin bǝ duŋ cɔk sak ner la ne asusun amin, bǝn itimu, bǝn kam gli, ben te zɔr. 2 Izhin bǝyi ndi asen vǝvǝn ne tashi ŋli, iwaŋ ndi awɔb amayak, izhin bǝ wɔb lɛ kɛ Arik ndi itei duŋ zhin flu ne ta zhɔk min, 3 fe ndi izhin ne wɔ men kɛ didik kɛ Arik.

4 Izhin bǝ nyɛ ben Ŋgɔŋ, mkpaŋ tsetser, iyiŋ ndi aneshir ne kyagǝ, ama Arik ne hriau te nǝgu ŋgɔŋ. 5 Izhineba min yi, izhin yi ndi mkpaŋ tsitsir, ndi atei me ikɔb kɛ izhu tsetser te izhin bǝ yi abɛ na ndum ne kɔb kɛ Arik, te izhin bǝ nek atu amin ndi ibaŋ yiŋ ndi Arik ne tei ne atu yi Yesɔ Kristi. 6 Te ne cɛr ne ilɛ kɛ Arik te di:

<<Tɔ zhin, mne nyak mkpaŋ yi me,

Nǝ Siyona, mne hria mkpaŋ didik iyi nju ki,

Iwaŋ ndi atei tanyɛme ben Yesɔ

Ba tei te ishisha ba.>>

7 Azizaŋa izhineba ndi izhin ne tanyɛme, mkpaŋ yiŋɛ iyi didik. ama abaŋ ndi ba ne tanyɛme neyi ba,

<<Mkpaŋ yiŋ ndi abɛ me ne kyak gǝ bɔbɔk

Ai yi iyi mkpaŋ didik yi me,>>

8 Fe ilɛ kɛ Arik ne na bla,

<<Mkpaŋ yiŋ ndi iduŋ aneshir atar aza

Bǝn mkpaŋ yiŋ ndi iduŋ aneshir azhaku.>>

Ne kyak ilɛmɛ te tar aza waŋa ayi iki yiŋ ndi Arik ne ka nai aŋyak ba.

9 Ama izhineba ba yi aneshir abɛ hria, aneshir abɛ na Itum ŋgɔŋ ndum, ntun iyi tsetser, aneshir abɛ Arik, te izhin bǝ gbar Arik asak iwaŋ ndi ne zhɔ zhin arumɔ ne bu te gli zhin anyɛ amkpa agɔŋ adidik ane laŋ amaa. 10 Nǝ kukub ba zhin ne yi aner azhin ba, ama azizaŋa izhin yi aneshir abɛ Arik; kukub ba zhin ne yik lɔ susun ba, ama izhin ne yik kɛ azizaŋa.

11 Izhineba ba amunya, mben zhin, te izhin yi acɛn ne gɔŋmimi kǝŋe, izhin bǝ te shaan ne iki yi tik ayi yi gɔŋmimi, te itsǝk mgbu ne kiki iye asusun amin. 12 Izhin bǝ tsǝntsen didik ne miŋ kɛ abaŋ ndi ba ne zhi Arik ba, ate yi ndi atei di izhin na iki mimin, abɛ yik iki yi na min didik te bɛ nek Arik ŋgɔŋ maa ne bɛr yiŋ ndi Arik ate nyɛ.

13 Ne tu yi Arik zhin bǝ nek kɔte ŋɔwa ndi agli aneshir atu amin ne sak kɛ Arik: kɔ ben Itum waŋ ndi ayi ŋgɔŋ, te wa ayi ŋgɔŋ bɔbɔk, 14 izhin bǝ na nek atu amin ben igomneti, aba Arik ne shar ba abɛ nek aneshir abɛ lalɛ iyah, abɛ na gbar abɛ na iki didik asak. 15 Tǝ ayi na Arik nena iki didik min itei ku anu aneshir abɛ ye bliblik. 16 Izhin bǝ tsin ndi abɛ ta zhɔk, ama kǝr zhin bǝ ku goŋ ne ta zhɔk min te na zumimin ba; ama izhin bǝ tsin ndi agɛn abɛ Arik. 17 Izhin bǝ nek kɔte ŋɔwa atu amin: Izhin bǝ nyɛr amunya, klu zhin sisik Arik, nek zhin itum ŋgɔŋ maa.

18 Izhineba ba agɛn, izhin bǝ nek atukɔ amin atu min ne kɔte anii, ba abɛ na iki didik ankyak ba, ama ben abaŋ ndi ayi ŋaŋar ben abɛ zhin. 19 Neme ire te ineshir bɛ yik iyah ne atu yi Arik, te na vuŋ asusun Gli ne kɔte nii te ne zhi Arik. 20 Ama aye nii iki ŋur asa min ate tsik zhin ne na iki mimin te izhin te vuŋ susun neyii? Ama ate yi ndi izhin yik iyah ne na iki didik te vuŋ susun, waŋa ai yi ki yiŋ ndi Arik ne ta nyɛmɛ te nek anu adidik. 21 Neme ne zhɔ zhin, te Kristi ne yik iyah ne atu amin, ne duŋ zhin ankɔŋ ane zǝ, izhin bǝ zǝ ankɔŋ ane yik iyah maa.

22 <<Yesɔ bane la lɛ ba,

Ba nena timu ba.>>

23 Ne yenu, ba ne di kinuŋ ba, ne sagu iyah ba ne na di ikinuŋ ba. Ne me ne nek tu maa ben ine te ambuk tetɛɛ didik. 24 Kristi wa ne tu maa ne baŋ zumimin mɔr ne ku te kpaŋu ne kpok kuŋkun kɛ gen, te ta bǝ ku ne zumimin te yi atsitsir ne nyɛr ye Arik; Ne amkpaa amaa ne duŋ zhin rɛ. 25 Izhin ne yi ndi awanta abaŋ ndi ne dɔ, ama azizaŋa izhin ne kam nyak ben ne kyu zhin te aŋub zhin.