1 Icɛr yiŋɛ ire bǝn Nga Biturus, ne na ndum kɛ Yesɔ Kristi,

Abaŋ ndi Arik ne hria ba, abaŋ ndi ayi agɛn ne aklu aŋar te yi ne Fantas, bǝn Galantiya, bǝn Kafadɔsiya, bǝn Asiya, bǝn Bitiniya, 2 izhin ndi Arik Tetɛɛ amɔr ne hria zhin ne izhi maa, te ŋla ta ne Izhu tsetser ne ŋla ba ne azhizhi Yesɔ, te bɛ zǝ iki bla Yesɔ kristi ne shur azhizhi amaa:

Ta zhɔk bǝn sɔŋ kɛ sik bǝ yi ne atu min tetɛk

3 Tabǝ gbar Arik asak waŋ ndi wa ayi Tetɛɛ mɔr ayɔu Yesɔ kristi! Nǝ lɔ susun maa ne duŋ ana ŋli ta te ta bǝ tsǝntsǝn kɛ shur ayi ne lu Yesɔ ne bɛ, 4 te ta bǝ ta gadu kɛ yaŋ cɔkla, kɛ yaŋ dɔ bǝn yaŋ klɛ ndi ne nyak ta ne shu. 5 Taba abaŋ ndi Arik ne ku ta ne mgbyamgbyaŋ maa ne tanyɛme ne asusun amɔr te gar nkpaŋ kɛ ta ta zhɔk ne klɛ tu. 6 Nǝ yiŋɛ izhin bǝ nyɛr ŋgɔŋ, neme izhin te yik iyah watsɔb azizaŋa ndi atei tsar zhin neyi. 7 Iyiŋɛ tei na te bɛ yik itanyɛme ne susun min iyiŋ ndi ne naŋ ire kɛ zineriya, ikeŋ ndi cɔkla, ndi agɔŋ kɛ ne lu, te duŋ itanyɛme yi susun min bǝ duŋ anǝk ngɔŋ te na gbar zhin asak ndi Yesɔ te nyɛ. 8 Neme ndi bane zǝn yigu ba, izhin ne nye ru, ama ba zhin ne zen yigu ba, izhin ne tanyɛme ben abɔu tena nye ru ngɔŋ ndi nkanlɛ iye ne batei blai ba, 9 izhin ne ta idǝk min kɛ tanyɛme ben Yesɔ ne asusun, ita zhɔk yi asusun min.

10 Ne atu yi ta zhɔk, abɛ bla shar yi Arik, ne lɛ ne atu ayi iki didik ndi sɔŋ nyɛ, ne zǝb lɛ kɛ Arik ikɛ ta zhɔk kǝŋe ne hria ayi, 11 te wɔb te aba bǝ zhi mkpaŋ ben nkuŋkɔŋ yiŋ ndi Izhu tsetser yi Yesɔ kristi ndi yi ben abɛba ndi ne tsar te bla mkpaŋ kǝŋe ndi Kristi atei yik iyah ben ŋgɔŋ keŋ ndi itei zǝ. 12 Arik ne men abla abɛ bla shar maa tedi ba ana atu men gen ba ama ana izhineba ba, te lǝlɛ kiki yiŋ ndi neka blaa zhin neyi nenu abaŋ ndi ne du zhin lɛ didik ire ben Izhu tsetser iyi rɛ shu. waŋa ayi kiki yiŋ ndi abɛ shar ayou Arik ne zen wɔb te aba bɛ yige.

13 Neme, izhin bǝ na asusun amin nyak ayi na ndum; izhin bǝ vuŋ kpa; izhin bǝ shur ayi ne ikiki yiŋ ndi atei nek zhin neyi ndi Yesɔ kristi te nyɛ. 14 Ndi amumun abɛ nek atu, kǝr zhin bǝ zǝ kiki mimin iyi na min kukub ndi izhin ne yaŋ zhi Arik ba. 15 Ama yi tsetser ne kɔte ni ndi izhin nai ndi Arik ine zhɔ zhin ayi tsetser, neme izhin bǝ yi tsetser ne kɔte ni ndi izhin nai; 16 fe ndi ilɛ kɛ Arik ne di: <<Izhin bǝ yi tsetser te Nga Myi tsetser.>>

17 Ndi izhin zhɔ Tetɛɛ waŋ ndi izhin te ben Arik, atei ŋas ndum kɛ kɔte ŋɔwa, yaŋ nyɛr tu, izhin bǝ sɔŋ ndi acɛn ne gɔŋ mimi ne te sǝsǝk. 18 Izhin ne zhi te bane atazhin azhɔk ne kiki yi na min kukub yi yaŋ rɛ ndi ibaŋ rɛ ben atsintsim amin ba. Bǝn kiki iyi yaŋ cɔkla ndi zineriya bǝn azurfa ba, 19 ama ayi azhizhi ayou Yesɔ ane rɛ ŋgɔŋ, nklu ndi ayi keke. 20 Waŋ ndi ne hriau teshe na gɔŋmimi, ayi wa ne gliu aru zhine ne klɛ tu. 21 Ne atu amaa izhin ne zhi Arik, waŋ ndi ne lɛgu ne bɛ te nǝgu ŋgɔŋ, neme itanyɛme min ben shur ayi min bǝ klik ne zǝ Arik.

22 Neme ndi izhin ne duŋ asusun amin ayi tsetser ne zǝ iki didik ne tanyɛme ben zumin, te na tanyɛ ben anuŋ, ne asusun amin. 23 Tǝ ne akama ŋli zhin, ba ne bǝbǝ yi cɔkla ba, ne lɛ kɛ Arik tsitsir kɛ yaŋ klɛ tu. 24 Tǝ,

<<Bɔbɔk aneshir ayi ndi agǝga,

Ire men iyi ndi gbar kuŋkun iyi zizik;

Agǝga aklu fe dɔ kuŋkun izu,

25 Ama ilɛ ikɛ men kɛ Arik ba yi ne klɛ tu ba.>>

Waŋa ayi lɛ keŋ ndi ne du zhin ne kɛ.