1 Izhu tsetser ne bla tedi, mkpaŋ tei nyɛ anuŋ atei duŋ tanyɛmɛ ne asusun amen te zǝ anerim abɛ timu, ben tsar yi mu. 2 Itsar yi timu yiŋɛ ire ben abǝ na iyik ayi iyi mu, ndi idur mǝne neka te ndi ne goŋǝ ne adagi. 3 Aba ayar aneshir ta amba ben li kiki yi li nuŋ, ndi Arik ne nai te bɛ tei ne nyɛr ben abɛ baŋ ndi ne tanyɛmɛ tena zhi lɛ kǝ zub. 4 Iki yiŋ ndi Arik ne nai irɛ, amɛ kǝr abɛ kyak kinuŋ ba te yi ndi ne tei ne nyɛr, 5 te neka duŋǝ iyi tsetser ne lɛ kɛ Arik bǝn iben.

6 Te yi ndi utǝ bla abǝ zǝ Arik lɛ kǝŋe utei yi gɛn didik nǝ na ndum kǝ Kristi Yesɔ, waŋ ndi ne te ngɔŋ ne lɛ kɛ Arik ne tsar lɛ ma didik ikeŋ ndi uzǝ kɛ. 7 Kǝr ubǝ zǝ lǝlɛ yi sha bǝn yiŋ ndi ba tei duŋu flu ne lɛ kɛ Arik ba, ne me ubǝ vuŋ kpa mi gli te zǝ Arik. 8 Ina ndum kɛ var azhizhi ne kpa inǝk iki didik ne kpa, ize Arik inǝk ki didik ne kɔte ni, te yi ki kpa nyak yi nek vli kɛ azizaŋa ben gar ti.

9 Ilɛ kǝŋe iyi lɛ didik, irɛ te abɛ takɛ bɔbɔk 10 ne lɛ kǝŋe ta yik iya, te yaŋ li tǝ ta ne zhɔk susun bǝn Arik amɔr ndi ayi tsitsir, waŋ ndi ayi wa ne ta aneshir ashur bɔbɔk, ne tu abaŋ ndi ne tanyɛmɛ ne lɛ kɛ Arik.

11 Be nek lɛ te na tsar kiki yiŋɛ. 12 Timoti kǝr ubǝ duŋ nuŋ ayaŋ tɔu ashak ayi ba tɛ yik tǝ uyi vǝvǝn vǝtsɔb, ama ubɛ yi abɛ zǝ Arik iki tɔ, ne lɛ mi, ne tsǝn mi, bǝn kiki yi na mi, bǝn Nyɛr, tanyɛmɛ bǝn tsetser. 13 Iŋub mkpaŋ kǝ nyɛ muŋ, ubǝ nǝk itu mi nǝ bla aneshir lɛ kɛ Arik, ubǝ du kɛ tǝna tsar ba ne kǝ. 14 Kǝr ubǝ duŋ zhi yiŋ ndi Arik nɛ nǝgu neyi ba, ndi nɛ nǝgu neyi ne bla yi ti, ndi angɔngɔŋ abǝ gli amkpa anǝ ben Arik nɛ sagu aŋɔk amɛn.

15 Ubɛ yi mgbemgbebɛ ne kiyiŋɛ, ubǝ nek tu mi bɔbɔk ne kiki yiŋɛ te kɔte ŋɔwa atei yik iliti mi. 16 Ubɛ nak tɔ tsǝn mi ben tsar mi. Ubǝ zǝ lɛ kɛ tsar mi, utǝ na amɛ utei ta tu mi zhɔk bǝn abaŋ ndi awɔ lɛ kǝ tsar mi.