1 Mplɛ cɛr kǝŋe ayi iki yiŋ ndi Yesɔ Kristi nɛ tsari. Arik ne tsa ru ikiki suyir yi nyɛ ne ti te abɛ tsar igen amaa iki yiŋ ndi tei na azizaŋa. Kristi ne tsar igen amaa Yɔɔna ikiki yiŋɛ te shar ineshar ayou Arik ben abɔu, 2 ankyak Yɔɔna ne bla bɔbɔk iki yiŋ ndi wa ne yige. Waŋa ai ilɛ kɛ bla maa keŋ ndi ire ben Arik ai ilɛ didik keŋ ndi Yesɔ Kristi ne bukɛ aglɛ rumɔ. 3 Anu adidik ayi bǝn iwaŋ ndi ne bu mplɛ kǝŋe atɔ, anu adidik ana yi bǝn waŋ ndi ne wɔ ilɛ kɛ ine shar ayou Arik te zǝ iki yiŋ ndi ne cɛrǝ ne mplɛ kǝŋɛ! Te mkpaŋ nǝ ka nyɛ ndi kiki yiŋɛ itei na bɔbɔk.

4 Icɛr yiŋɛ ire bǝn Yɔɔna te gar bǝn nkun abɛ zi Arik amɛ taŋgba abɛ yi ne igar kɛ Asiya:

Iki didik ben isik susun ire bǝn Arik te gar ben abɛ zhin, waŋ ndi ayi azizaŋ, ndi ne na yime kukub, waŋ ndi ate na nyɛ, bǝn izhu me taŋgba ndi iyi angus mben yi sɔŋ maa, 5 te rɛ bǝn Yesɔ Kristi, waŋ ndi ayi ne bla ilɛ blabla didik, waŋ ndi ne kuti alu ne bɛ te na yi ne gli atum abɛ gɔŋmimi.

Anyɛr ta, ne nek tu maa te ku te ta ta shur ne zumimin mɔr. 6 Te duŋ ta yi abɛ gli amaa bǝn abɛ na ndum kɛ Arik Tetɛɛ amaa. Ŋgɔŋ bǝn mgbyamgbyaŋ bǝyi ben Yesɔ Kristi yaŋ klɛtu! Ibǝ yi amɛ.

7 Tɔ, anyɛ ne akpa! kɔte ŋɔwa atei yigu, te vuŋ abaŋ ndi ne turu ne kab. Bɔbɔk ntun yi igɔŋmimi atei zhin ne atu amaa. Fe itei yi amɛ! 8 Arik Ngɔŋ ne mgbyamgbyaŋ adi <<Nga myi kuti ben klɛtu,>> waŋ ndi ayime azizaŋa, ai wa ayi ne yi kukub, waŋ ndi atei nyɛ.

9 Ai nga Yɔɔna, izumin, ikpa min ne zi Yesɔ ne vuŋ susun ne iyah iyiŋ ndi iye ben abaŋ ndi ayi ne kɔb Arik. Ne nyak me ne ve gɔŋmimi kɛ atsutsu amashir ndi azhɔk te Batamusa te mne du ilɛ kɛ Arik tena bla ilɛ didik keŋ ndi Yesɔ gli kɛ arumɔ. 10 Ne bɛr yi ben Arik Izhu ne glim, ankyak mwɔ ikɔr ngɔŋ, iglɔ ndi mpluŋ, ilɛ ne igɔŋ muŋ. 11 Ikɔrɔ di, <<Cɛr iki yiŋ ndi une yige, tɛna shar mplɛ cɛr gar ne Akabaŋkɔŋ ndi ayi ne ntuntun me taŋgba: Afisa, Simirna, Birgama, Tayatira, Sardisu, Filadefiya, ben Laudikiya.>> 12 M kamtɔ te mbǝyik ayi ŋɔwa alɛ ben abɛm, fe myik iki sak lu yi Zinariya ime taŋgba, 13 ne atsutsu amene ikinuŋ klikli ndi ineshir, ne su iki ndi tɔm tar ne aza, ne aku asa maa ne lak kɛ ne zinariya. 14 Mfumfuktu maa iklak ndi aruru, ayi amaa ayi ndi lǝlɛn ilu; 15 aza maa alaŋ ndi izɔb keŋ ndi ne ren kɛ te kin kɛ anyɛ, ikɔr maa iglɔ ndi amashir ane gbub ngɔŋ. 16 Agli Icinces me taŋgba ne ŋɔk li maa, anzi gba akɛ li agara yaa aru are anu amaa. Iti maa ilaŋ ndi arik atsutsu. 17 Ndi mne yigu me zhaku ne aza maa ndi ikum ineshir. Ne sak ŋɔk li ma ne atɔ amuŋ tedi, <<Duŋ klu sisik ba! Nga myi ne kuti ben klɛtu. 18 Me yi tsitsir! Mne ku, ama azizaŋa Me yi tsitsir gar klɛtu. Me yi ne iki bu ankɔŋ ne atu yi ku ben Igɔŋmimi kɛ ku. 19 Neme, ubǝ cɛr iki yiŋ ndi une yige, iki yiŋ ndi yi azǝzaŋa ben iki yiŋ ndi tei na ne ti. 20 Tɔ ikiki yi suyir yi cinces taŋgba ndi une yige ne ŋɔk li i muŋ, ben kiki yi laŋ lu me taŋgba: Icinces me taŋgba yiŋɛ ai abɛ shar ayou Arik abɛ Akabaŋkɔŋ amɛ taŋgba, iki yi laŋ lu me taŋgba yiŋɛ ai Akabaŋkɔŋ amɛ taŋgba.