1 Ankyak me yik ne shar ayou Arik azǝ are gbarshu, agli iki bu ankɔŋ ne ŋɔk maa kɛ idudu lǝlɛ kǝ yaŋ klɛtu bǝn atsitsaŋ ayi luk ne aŋɔk amaa. 2 Ne vuŋ iwa ma, iwa iyi yi asese, iyiŋ ndi ai ishetan, kɔ shetan, te kpau ne atsitsaŋ ase azhin tetɛk. 3 Ine shar ayou Arik atugu azhɔk ne dudu lǝlɛ kǝ yaŋ kletu, te ku aŋyak, te tarkɛ aku, te kǝr abɛ na lum aneshir abɛ gɔŋmimi ba se ase azhin tetɛk ayige ne gayir. Ndi iyiŋɛ te gayir atei na buu azhɔk mkpaŋ watsɔb. 4 Fe mǝne yik mben yi sɔŋ itum, ben abaŋ ndi akɔ sɔŋ ne mbene nɛ nek ba mgbyamgbyaŋ kɛ te ambuk. Mǝne na yik asusun kɛ abaŋ ndi ne ŋlɔk ba atu yi du ilɛ kɛ bla izub ndi Yesɔ ne bui aŋyak andala ndi ayi ilɛ kɛ Arik. Ndi bane zekur inarum kɔ izhu maa ba, bane na duŋ a ŋar ba ira ne anuti amen ben aŋɔk amen ba. Ne kama si te vli te Gli aneshir ndi itum ben Kristi ase azhin tetɛk. 5 (Anki abɛ kumɔ bane lu ba se ndi ase azhin tetɛk ne gayir.) Waŋa ayi kuti ilu aneshir ne bɛ. 6 Abaŋ ndi te te yi abɛ kuti lu ne bɛ ayi ate nyɛr tena ta anu adidik. Iku kɛ yaa ba yi ne mgbyamgbyaŋ ne atu amen ba; atei yi abɛ na ndum Arik ben abɛ Kristi, atei na Gli aneshir ben abɔu ase azhin tetɛk. 7 Ndi ase azhin tetɛk ayiŋɛ ate gayir, ine shar ayou Arik atei zuk shetan azhɔk ne miŋ jaru, 8 ankyak atei kama gar igɔŋmimi te kɔte cɔk aneshir abaŋ ndi ne se var ne gɔŋmimi bɔbɔk, waŋa ayi, Gɔg bǝn Magɔg. Shetan atei Gli ba nyɛ amkpa azhin te abɛ tɛ ikum ben abɛ ba, iklɛ Imenɛ iyi ndi ablubluk ayi kɔtɔŋ inǝk. 9 Ne ŋar ashak gɔŋmimi te na kama ntsan aner abɛ Arik azik bǝn ntun yiŋ ndi anyɛri. Ama ilu ne rɛ igbarshu te gɔŋ ba ŋlɔk. 10 Ankyak shetan, waŋ ndi ne cɔk ba ma, ne baŋu atyak azhɔk ne lu kɛ dudu lǝlɛ, amkpa awaŋ ndi inarum bǝn abɛ timu te di aba bla ilɛ kɛ shar Arik ne tyak ba azhɔgɔ; fe atei naga yik iyah aririk bǝn ibu yaŋ klɛtu.

11 Ankyak mǝne yik mben yi sɔŋ itum klikla bǝn iwaŋ ndi akɔ sɔŋ aneyi. fe igɔŋmimi bǝn igbarshu inaŋdɔ ne ti maa bane na yik kɛ ba. 12 Fe mǝne na yik abaŋ ndi ne ku, angɔŋgɔŋ bǝn amuɔtsɔtsɔb, aklɛkli ne iti kɛ Iben yi itu mɔ. Ne bu amplɛ, fe ne na bu mplɛ inuŋ, ayi mplɛ kɛ abɛ atsitsir. Ne te abɛ ku ambuk ne ikiki yi na men, ndi ne cɛrǝ ne amplɛ me. 13 Ankyak inǝk ne nek abaŋ ndi ne ku ne miŋ maa. Iku bǝn igɔŋmimi ne na nek abɛ ku abaŋ ndi ayi bǝn abɛ ba. Fe bɔbɔk mǝne ne te ba ambuk ne iki yiŋ ndi ne nayi. 14 Ankyak ne tyak iku bǝn amkpa ne sɔŋ abɛ ku azhɔk ne ibubwar lu. (Ibubwar lu kǝŋe ayi iku kɛ iyah.) 15 Iwaŋ ndi ba tei yik isak maa ne cɛr kɛ ne mplɛ kɛ abe yi tsitsir ba atei tyagu azhɔk ne miŋ ibubwar lu kǝŋe.