1 <<Ube cɛr ne shar ayou Arik ndi ayi ben abɛ zǝ Arik ndi ayi ne Afisa: <<Waŋa ayi ishar yiŋ ndi ire ben waŋ ndi agli cinces me taŋgba ne ŋɔk li maa te ana tsǝn ne atsutsu akɛ iki yi sak laŋ lu me taŋgba. 2 Mǝne zhi iki yiŋ ndi une nai; Mǝne zhi ir keŋ ndi ne tsi kli ben ir keŋ ndi une vuŋ susun. Mǝne zhi bau te tanyɛmɛ ben abɛ na zumimin ba ben ir keŋ ndi izhin ne tsar abaŋ ndi adi aba yi abɛ du lɛ kɛ Arik ama ba yi amɛ ba, ayi abɛ timu. 3 Uyi ne vuŋ susun, une yik iyah ne atu muŋ, bau ne dǝk ba. 4 Ama mne nǝgu la lɛ ne iki yiŋ: bau ne nyɛr me ndi ikuti ba. 5 Ubɛ lɛ ne susun tɔ ndi une ŋurkam angɔŋgɔŋ! Ubɛ duŋ na zumimin te na iki yiŋ ndi une nai ne kuti. Bau te duŋ na zumimin ba, Me tei nyɛ ben abɔu te Mbaŋ ilu kɛ laŋ mi yaru ma. 6 Ama ne yiŋɛ une na didik: une kyak iki yiŋ ndi Nikɔlatawa anai, Nga muŋ yi mkyak yi. 7 <<Utǝ yi ne atɔŋ, ubɛ wɔ iki yiŋ ndi Izhu ibla abɛ zǝ Arik neyi! <<Abaŋ ndi ne lieru mtei duŋ ba ama idɔ kuŋkun kɛ nek ivli ndi ne tɔ ne ahwaŋ ayi Arik.

8 <<Ubǝ cɛr ne shar ayou Arik ndi ayi ne Simirna: <<Waŋa ayi shar ndi ire ben iwaŋ ndi wa ayi ne kuti ben ne klɛtu, waŋ ndi ne kuh tena yime tsitsir. 9 Mne zhi iya iyiŋ ndi uyigǝ; Mne zhi uyi ne yaŋ ki, ama uyi ne adudunki! Mne zhi ilɛ mimin keŋ ndi a bla kɛ ne atu mi ire bǝn abaŋ ndi adi aba ayi Yahudawa ama ba yi amɛ ba; ai tsǝn aneshir abaŋ ndi ayi abɛ ishetan! 10 Kǝr bɛ te sisik iyah yiŋ ndi utei yige. Uwɔ ni! shetan te sak zhin iyah te duŋ avu anuŋ ashur ne jaru, izhin tei yik iber wur. Ubǝ vuŋ susun Gli ne atu amuŋ, kɔ te di atei ŋunu, mtei nǝgu ivli kɛ dǝk kɛ lieru mi. 11 Waŋ ndi ate yi ne atɔŋ, abɛ wɔ iki yiŋ ndi Izhu ibla abɛ zǝ Arik! <<Waŋ ndi ate lieru iku kɛ yaa batei vuŋɔ ba.

12 <<Ubǝ cɛr ine shar ayou Arik ndi ayi ne Birgama te di: <<Waŋa ayi shar ndi ire ben waŋ ndi ayi anzi gba akɛ li agar ayaa. 13 Mne zhi amkpa awaŋ ndi usɔŋɔ, ayi amkpa awaŋ ndi Iben yi shetan iyime. Une kli mgbamgbaŋ ben abɛm, bau ne duŋ tanyɛme bene abɛm ba ne mkpaŋ keŋ ndi Antibas, ne bla ilɛ muŋ anenen, ndi ne ŋunu ne amkpa waŋ ndi shetan isɔŋɔ. 14 Ama mǝne nugu lalɛ ne muɔ kiki nuŋ: anuŋ ne miŋ min azǝ itsar yi Balaam, ndi ne tsar Balak ankɔŋ awaŋ ndi atei gbur Isrela asur ne na zumimin te lom ba te duŋ ali ikili yiŋ ndi ne na mkpɔk kuŋkun neyi te na duŋ ba akur ben amba abaŋ ndi ba yi amen ba. 15 Ne ankɔŋ azhin awaŋa anuŋ ne miŋ min azǝ itsar yi Nikɔlatawa. 16 Neme izhin bǝ duŋ na zumimin min! Mba zhin te duŋ ba, M tei nyɛ ben abɛ zhin andanda te te ikum ben aneshir abaŋa ne anzi gba ndi aru are anu amuŋ. 17 <<Iwaŋ ndi ayi ne atɔŋ, abɛ wɔ iki yiŋ ndi Izhu ibla abɛ zǝ Arik! <<Te abaŋ ndi ne li aru mtei nek ba manna keŋ ndi ne suyir. Mtei na nek kɔte ŋɔwa mkpaŋ klikla yiŋ ndi ne cɛr sak yayas keŋ ndi ba nuŋ ne zhi kɛ ba, se waŋ ndi ne ta yi.

18 Ubǝ cɛr ne shar ayou Arik ndi ayi ne Akabaŋkɔŋ ane Tayatira te di: <<Waŋ ayi ishar ndi ire ben Izu Arik, waŋ ndi ayi amaa awu ndi lǝlɛn ilu, aza maa ayi glaŋglaŋ ndi mkpaŋ yiŋ ndi ne kɔi. 19 Mǝne zhi kiki yi na mi. Mǝne zhi nyɛr mi, mǝne zhi ina didik mi, ina ndum mi, ben vuŋ susun mi. Mǝne zhi ikiki yi na mi azizaŋa inaŋ yi kuti. 20 Ama mǝne nugu lalɛ ne kiki yiŋ: une vuŋ susun ben iwa waŋa ndi azhɔu te Jezebɛl, ndi azho tu maa igen ayou Arik. Itsar maa ne cɔk agɛn amuŋ te duŋ ba ate bubu tiŋ te na li ikili yiŋ ndi ne na kpok kuŋkun nayi. 21 Mǝne nugu nkpaŋ te abɛ duŋ zumimin maa, ama ne kyak duŋ zumimin maa yi zǝ alulum. 22 Neme M tei tugu zhɔk ne ki kur ndi wa ben abaŋ ndi ne kur ben abɔu atei yik iyah ngɔŋ. Mtei na amɛ azizaŋa se ate yi ndi ne duŋ na zumimin yiŋ ndi ne nai ben abɔu. 23 Mtei na ŋlɔk abaŋ ndi azeu, neme abɛ zǝ Arik bɔbɔk atei zhi te di mne zhi ilɛ kɛ susun ben iki wɔb aneshir bɔbɔk. Mtei nek aneshir bɔbɔk idǝk kɛ iki yiŋ ndi ne nai. 24 <<Ama nki min ndi ayi ne Tayatira ndi ba ne zǝ itsar mimin yiŋɛ ba; ba tei zhi iki yiŋ ndi anuŋ azhɔi te <iki yi suyir iyi shetan.> Mǝne di zhin bam tei nek zhin ihru kɛ luk ba. 25 Ama izhin bǝ Gli iki yiŋ ndi izhin yime neyi gbamgbaŋ, se Mne nyɛ. 26 Teyi abaŋ ndi ne yik lieru, ndi azǝ iki yi wɔb muŋ gar klɛtu, Mtei nek ba mgbyamgbyaŋ keŋ ndi mǝne ta kɛ rɛ ben Tetɛɛ: 27 Mtei nǝk ba mgbyamgbyaŋ ne atu ayi aneshir, tǝ abɛ gli ba nkpɔk ki kɛ zɔb te na tsik ba amlik amkpɔmkpɔk ndi mkpalin yi na ne mimi. 28 Mtei na nek ba ncinces yi amblimblɛ.

29 Iwaŋ ndi ayi ne atɔŋ, abɛ wɔ iki yiŋ ndi Izhu ibla abɛ zǝ Arik ne yi!