1 Ndi iyiŋɛ ne gayir mǝne wɔ ikɔr glɔ ndi ntsan aneshir ne gbarshu, idi, <<Igbar asak yi Arik! ita zhɔk, Inǝk ngɔŋ, bǝn mgbyamgbyaŋ iyi kɛ Arik amɔr! 2 Izub bǝn anenen ayi ambuk amaa ayi! Ne cɔk iwa ne zǝ alulum ala ndi acɔk gɔŋmimi ala ne zǝ alulum. Arik ne nǝgu iyah te ne ŋun agɛn amaa.>> 3 Ankyak ne ŋar akɔr te di, <<Gbar Arik sak! Ntsiŋ yiŋ ndi ire ilu keŋ ndi ne gɔŋ ntun ngɔŋ ne lu kɔmɔ ne shu yaŋ klɛ tu!>> 4 Anǝŋkub sɔk yaa ane nas bǝn ikiki yi vli me nas ne zekur Arik, waŋ ndi akɔ sɔŋ ne mben maa. Te di, <<Be yi amɛ! Abɛ gbar Arik asak!>>

5 Ankyak ikɔr ire mben yi tum ne glɔ, te di, <<Gbar Arik amɔr asak, agɛn amaa bǝn aneshir amaa bɔbɔk, angɔŋgɔŋ bǝn amɔ tsɔtsɔb, abaŋ ndi anegu ngɔŋ maa!>> 6 Fe mǝne wɔ ikɔr ndi ntsan aneshir ngɔŋ, ndi amashir ane gbub, ndi izhin inas. Me wɔ ba di, <<Abɛ gbar Arik asak! Te Ŋgɔŋ, Arik amɔr Ŋgɔŋ, ayi Itum. 7 Ta bɛ nyɛr te na mlak nyɛr; Ta bɛ na gbar Ŋgɔŋ maa! Tǝ mkpaŋ neka te kɛ kpa ŋa yi Nklu mɔ, te iwa yayas amaa neka su iki yi kpa ŋama. 8 Arik ne nugu anklu tsetser akɛ yi klaklak te abɛ su.>> (Anklumɔ ayi iki didik yi na aneshir abɛ Arik.)

9 Fe ine shar ayou Arik adim, <<Cɛr iki yiŋɛ: Nyɛr iyi abaŋ ndi ne zhɔ ba li igyaŋ yi kpa ŋa yi Nklu mɔ.>> Ine shar ayou Arik ana di, <<Waŋa ayi lǝlɛ didik kǝ Arik.>>

10 Ankyak m zhaku ne aza maa te zekuru, ama ne dim, <<Kǝr ubɛ na amɛ ba! Me yi igen ndi wa bǝn abɛ zǝ Yesɔ, bɔbɔk abaŋ ndi ne zǝ ilɛ didik keŋ ndi Yesɔ ne gli kɛ arumɔ. Zǝkur Arik!>>

11 Ankyak myik Igbarshu ibu, fe nǝ ti muŋ myik nŋa klikla. Inǝ sau ma azhɔu te Didik bǝn Izub, ate ŋas didik te na te ikum maa. 12 Ayi amaa ayi ndi aŋɔk lu, ne su atu anku tetɛk ne tu maa. Ne cɛr sak ne tu maa, ba nuŋ ne zhi iki yiŋ ndi ne cɛr ba anak wa kiki maa ne zhi. 13 Anklu akǝŋ ndi ne su kɛ ne dib kɛ ne azhizhi. Azhɔ sak maa tǝ <<Ilɛ kɛ Arik>>. 14 Abɛ kpaakpa abɛ shu azeu, ne su anklu aklikla te sɔŋ sa ane nŋa klikla te su kluŋklu zezen akɛ yi aklikla. 15 Anzigba ake li aru rɛ anu amaa, akǝŋ ndi atei ŋlɔk aner abɛ gɔŋmimi. Atei gli ba ne mgbyamgbyaŋ maa, atei na ru tsin ne nguŋgu yi fuk ngɔŋ ne mfu ngɔŋ kɛ Arik. 16 Ne anklu amaa ne cɛr sak maa ne mbaŋza maa: <<Itum ane atum bǝn Arik ne arik>>.

17 Ankyak mǝne yik ne shar ayou Arik aklɛ kli ne arik. Ne ŋar ikɔr ngɔŋ bǝn bɔbɔk aŋliŋlɔ ndi abwak ne shu: <<Izhin bɛ nyɛ biŋ amkpa zhiin ne igyaŋ yi Arik ngɔŋ! 18 Izhin bɛ nyɛ te ta ina kɛ atum, angɔŋgɔŋ abɛ kpaakpa, bǝn abɛ kpaakpa, ina kɛ ane nŋa bǝn abɛ sa ba, ina kɛ aneshir bɔbɔk, igen bǝn iven ne kɔb, vǝtsɔb bǝn ngɔŋ!>> 19 Fe mǝne yik inarum bǝn itum ne gɔŋmimi bǝn abɛ kpaakpa ane tuŋ biŋ te kum iwaŋ ndi sɔŋ asa nŋa bǝn abɛ kpaakpa amaa. 20 Fe ne vuŋ inarumɔ aku, bǝn abɛ timu te di aba abɛ bla shar Arik ndi ne na ikiki vuŋ anu ne ti maa. (Ne na ikiki yi vuŋ anu yi ne cɔk abaŋ ndi ayi ne ira yi inarumɔ bǝn abaŋ ndi ne zekur izhu yi inarumɔ.) Inarumɔ bǝn abɛ timu tedi aba ayi abɛ shar Arik ne tuk ba bɔbɔk mǝne ashur nǝ dudu lu kɛ lɛn yaŋ klɛtu. 21 Ne ŋlɔk abɛ kpaakpa amen ne anzigba ndi arɛ anu kɛ iwaŋ ndi sɔŋ sa nŋa; ankyak aŋliŋlɔ bɔbɔk ne ta ina men ndi ne ya ta ma.