1 Fena ikinuŋ ngɔŋ yi nek sisik munru ne gbarshu. Ne mwɔ iwanuŋ, iwaŋ ndi iduŋ maa ai arik ane laŋ, ben ihwa ne angus aza maa ben itu anku kɛ andǝs amɛ awur ane yaa ayi ne tu maa. 2 Ba tei baŋ mkpaŋ ba te ŋli, ŋli kɛ lɛn susun te aŋu aŋin te zhin mgbɔmgbɔŋ.

3 Ikinuŋ ngɔŋ iyi nek sisik imunru ne shu. Ayi tsetsaŋ sesen ngɔŋ iye ne atu amɛ taŋgba ben nju me wur ben itu anku ne kɔte tu takɛ. 4 Nǝ bǝbɛ maa ne gbur andǝs ntǝk ntar ne miŋ kɛ andǝs se atibe ne shu te tur ba shur ne gɔŋmimi. A klɛ ne ti kɛ iwama, te wa abɛ ta vǝvǝn amaa waŋ ndi ate naga ŋliu. 5 Fena aŋli vǝvǝnlum, iwaŋ ndi atai gli ntuntun bɔbɔk ne asanda ne zɔb. Ama ne kyer vǝvǝne ata aglii Arik ge ne mben yi ngɔŋ maa. 6 Iwama abwak akɔmɔ ne ahwaŋa ndi Arik ne nau anyagu, ndi atei amɔ bɛr 1,260. 7 Fe ikum iku zhaku ne shu. Mikel ben abɛ shar amaa atsik mgbu ben iwah mimin iyi zhɔ te tsetsaŋ, ndi iyi na tsik mgbumɔ ben abɛ shar amaa; 8 ama nɛ tsik tsetsaŋ anaŋ, fe iwa bǝn abɛ shar amaa ne yar ba agleru nǝ shu. 9 Iwah ngɔŋ nuŋ yi zhɔ te tsetsaŋ abaŋǝ atyak azhɔk ndi ne men yime ire kukub, azhɔi te shetan, kɔ ne shetan, ndi alɔm aner abɛ gɔŋmimi. Ne tyagu azhɔk ne gɔŋmimi, ben abɛ shar amaa bɔbɔk. 10 Ankyak Mǝ wɔ ikɔr ngɔŋ ne shu idi, <<Azizaŋa ita zhɔk iye Arik ne nyɛ! Azizaŋa Arik atsar klik maa iyi Tum! Azezaŋa wa Mezaya maa atsar ngɔŋ maa! Tǝ iwaŋ ndi ne klɛ ne ti kɛ Arik te zor ben abɛ zǝ Arik ne bu ben aririk ne tyagu azhɔk are shumɔ. 11 Ne li ikum ne atu amaa ne azhizhi ayou nklu ben ilɛ didik ndi ne kli me; tena nek atu ben iku. 12 Nǝ yiŋɛ nyɛr zhin, izhineba ishu ben kiki yiŋ ndi iyi ne miŋe! Ama iyah ne vuŋ zhine ba abɛ gɔŋmimi ben inǝk ngɔŋ! Tǝ shetan ne zi anyɛ ben abɛ zhin, anyɛ ne mfu ngɔŋ, ne zhi te mkpaŋ maa ne dǝk watsɔb.>> 13 Ndi iwa ngɔŋ iyi zhɔ te tsetsaŋ ne zhi te ne tyak wa azhɔk ne gɔŋmimi, akɔ yar iwa waŋ ndi ne ŋli vǝvǝn lumɔ. 14 Arik ne nek iwama amgba ayaa aye akuntuk tǝ bɛ bwak te kɔmɔ ne ahwaŋa ngɔŋ, te bɛ yɔk tu maa amɔ ase tar ne nki, te lieru ne aŋɔk ayi daragɔnɔ. 15 Fena nenu amaa tsetsaŋ aser amashir anca te abɛ ku iwama te baŋu azhɔk adɔmɔ. 16 Ankyak mimi izɔk iwama; ibu anu te mli amashir awaŋ ndi ne ru are anu tsetsaŋ. 17 Mfu ngɔŋ ne vuŋ tsetsaŋ ne atu ayi iwama te kama gar ben nki nga ŋli kɛ iwama, bɔbɔk abaŋ ndi azǝ ilɛ kɛ Arik tena klɛ mgbamgbaŋ ne zub yiŋ ndi tane tei ben Yesɔ. 18 Fe tsetsaŋ aklɛ ne kɔtɔŋ nek ngɔŋ.