1 Ndi iyiŋɛ ne gayir Mnǝna yik inǝ shar ayou Arik nuŋ azǝ arɛ shu. Ayi ne mgbyamgbyaŋ ngɔŋ, bǝn ilaŋ amkpa anǝ yimɛ maa alaŋ aku gɔŋmimi. 2 Inǝ shar ayou Arik ge aŋar zhin ne kɔr ngɔŋ: <<Neka zhaku! Babila ntun ngɔŋ ne zhaku! shetan azǝn shigǝ wɔb bǝn izhu mimin; kiki mimin yi rik bǝn aŋliŋlɔ amimin asɔŋ nǝ kpa maa. 3 Tǝ ntuntun ne sɔ ne ki rǝrǝ maa iki rǝrǝ yi klik iyi te bubu. Atum abɛ gɔŋmimi ne wɔb ina kiki iyi bubu tiŋ bene bɔu, neme abɛ wɔb adudunki ayi gɔŋmimi ne yik nyaŋa ne yik bubu tiŋ maa.>>

4 Fe Mwɔ ikɔr nuŋ na rɛ shu, tedi,

<<Ru zhin, aneshir amuŋ! Ru zhin ne miŋ maa!

Duŋ na zhin ki mimin maa;

Duŋ zhine wu yik ya ne zub mimin maa!

5 <<Tǝ ilalɛ maa nǝ tsik biŋ te tɔm ndi gbarshu,

Ankyak Arik ashu azhi ki mimin iyi na maa.

6 Izhin bǝ nau ir keŋ ndi na naa zhine;

Naa zhin ne wu inaŋ ki yiŋ ndi ane nai ma.

Duŋ agbǝgba ane sɔ amaa abɛ shaga amkpaŋa ayaa ne klik

Ndi iki sɔ iyiŋ ndi ne nai anyaak zhin.

7 Nǝgu iyah ngɔŋ bǝn len susun

Ndi inǝk ngɔŋ bǝn ir keŋ ndi ane nek tu maa isɔŋ kɛ men.

Tǝ zen bla tu maa:

<Tɔm Mku sɔŋ, iwa ngɔŋ!

Bam yi iwakɔ ba, bam M tei zhi iluk susun ba!>

8 Ndi amɛ, ne iber zhiin atei shur Babila ilɔ tetɛk

Ilɔ, iluk susun bǝn izhɔŋ.

Fe atei gɔŋu ne lu,

Te Ŋgɔŋ Arik, inǝ teu ŋas, ayi ŋgɔŋ.>>

9 Atum abɛ gɔŋmimi ndi ne ne nǝk atu amen ne zǝ alulum maa bǝn te bubu atei zhin tena zhin ne atu ayi ntun yi Babila ndi ate yik ita lu kǝ gɔŋǝ. 10 Aklɛ gbagbaŋ, te aklu sisik ir keŋ ndi iyah iyi yik maa bǝ duŋ vuŋ ba ba. Adi, <<Waŋa ayi iyah ngɔŋ! Iyi nek sisik! Waŋa ayi ngɔŋ ben ntun ngɔŋ iyi Babila! Nǝ mkpaŋ zhiin ne nǝgu iyah!>>

11 Abɛ adudunki abɛ gɔŋmimi menyi azhin te lɛn asusun ne atu amaa, te inuŋ ba na lɛb kiki iyi dub mǝne ba; 12 inuŋ ba lɛb azurfa, izineriya, mkpaŋ yi te anyaŋ, iwulu kɛ klak; kluŋklu iyi rɛ, kluŋklu ndindilim, iyi kɔ, bǝn ŋa ŋklu aklikla; bǝn iki iyi sub ne kuŋkun iyi te anyaŋ bǝn ikiki bɔbɔk ndi ne nai ne kuŋkun, idalma, izɔb, bǝn mkpaŋ iyi baŋ ayi; 13 bǝn kiki men iyi sinamɔn, bǝn iki iyi na ya zhi, bǝn iyi vuk ne akliŋklalu, iwurdi, imur, iki rǝrǝ bǝn anyɛ, mumuŋ bǝn alikama, alandɔŋ bǝn awanta, aneŋa bǝn kiki iyi saa, agɛŋ, te bǝn aneshir abe na Arik. 14 Abɛ Gli iki yi lɛb ne dub adiu, <<Bɔbɔk kiki didik ndi unǝ shur ayi te bǝ yi mi nǝ naŋ dɔ, bǝn adudunki ami bɔbɔk bǝn kiki iyi na nyak mi ne kɔmɔ, fe ba utei na yigǝ!>> 15 Abɛ dub, abaŋ ndi ne yi abɛ adudunki ne li dub men ne ntun yuŋɔ, atei kli shaan, te aklu sisik iyi gab iyah iyi zen yik maa. Atei zhin bǝn lɛn asusun, 16 te di, <<Waŋa ai ki mimin! Iyi te sisik ne atu yi ntun ngɔŋɔ! Nǝ bere aneshir nǝ Babila aduŋ ne kiki yi rɛ tɔ, ndindilim, bǝn anklu akɛ yi kpa maa ikpyɛ, te ku tu maa ne anklu zineriya, mkpaŋ iyi te anyaŋ, bǝn iwulu! 17 Ankyak ne mkpaŋ zhin adudunki ami bɔbɔk ne dɔ!>>

Bɔbɔk abɛ yi ne agu bǝn abɛ yi ne miŋ agu mɔ, abɛ dene bǝn abaŋ ndi ana ndum te aya ba amɔ, akli shaan, 18 te aŋar zhin ndi ne yik ntsiŋ iyi ilu kɛ zen gɔŋ Babila: <<Bane na yik ntun nuŋ ndi ntun ngɔŋ yuŋɔ ba>> 19 Avu ntɔŋ ashur ne atu amen, azhin te lɛn asusun te di,<< Waŋa ayi ki mimin! Ayi ki yi te sisik ne atu ntun ngɔŋɔ! Iwama wa ayi ntunɔ iwaŋ ndi abɛ yi ne agu abɛ dene bǝn nek ngɔŋ te yi ne adudunki! Fe ne mkpaŋ zhin kɔte nii ne naŋ dɔ!>>

20 Ubɛ nyɛr igbarshu, tǝ nɛ zir ntun! Ubɛ nyɛr, aner abɛ Arik bǝn abɛ bla tɔ ti nǝ lɛ maa! Te Arik ne cɔk kiki iyiŋ ndi iwama ne naa zhin! 21 Ankyak ngɔŋ inǝ bla shar yɔu Arik abaŋ mkpaŋ ngɔŋ te tuge azhɔk ne nǝk ngɔŋ, te di, <<Waŋa ai ir keŋ ndi ntun ngɔŋ iyi Babila atei baŋǝ ames a tyak azhɔk ndi ba tei na yige ba iyaŋ klɛtu! 22 Asem ayi ŋur tentaŋ bǝn akɔr aneshir, te vuŋ abaŋ ndi avli ayiyaŋ bǝn mpluŋ ba tei na wɔ ba ba! Batei na yik ine na ndum ne idub nuŋ ba; tǝ igu iyi nena kɛ kɔk gɔ ba tei na wɔi ba. 23 Ba tei na yik laŋ lu bitila bǝn bɔu ba; akɔr abǝ ta iwama bǝn iwa yaya sa ba tei na wɔi bǝne bɔu ba. Kiki iyi tǝ ikum mi bǝn yi iyi klik ngɔŋ ne goŋmimi, te vuŋ ina kiki lɔm aneshir ndi une naa ba te lɔm aneshir bɔbɔk abɛ gɔŋmimi! 24 Ne nek ntun Babila iyah te azhizhi abɛ bla tɔ ti abɛ Arik bǝn aneshir abaŋ ndi ne ŋlɔk bɔbɔk ne gɔŋmimi.