1 Ndi Nklu mɔ ne bu ngir kɛ taŋgba, amkpa ne tǝ gum nǝ shu iyar minti sɔktar.

2 Fe Mne yik abɛ bla shar Arik amɛ ataŋgba ma aklɛkli ne ti kɛ Arik, ankyak ne nǝk ba mpluŋ me taŋgba.

3 Ine bla shar Arik nuŋ, iwaŋ ndi agli ŋaatsa ndi ne nakǝ nǝ zineriya akɛ shur aŋkliŋkla lu ayi ntsiŋ, anyɛ kli ne bagedi. Ne nǝgu mbumbur ki shushum iyi shur ne aŋkliŋklalu tetɛk iyi gɔŋ te ben aneshir Arik te gɔŋǝ ne min amkpa anǝ tsik ibaŋ ndi ne nau nǝ zineriya tɛ aklɛkli ne ti kɛ mben ngɔŋɔ. 4 Ntsiŋ iyi gɔŋ mbumbur ki shushumɔ ilu nab kɔmɔ ne shu bǝn Iben Arik iye aneshir ne aŋɔk ayi ne bla shar Arik ndi aklɛkli ne ti kɛ Arik. 5 Ankyak inǝ bla shar Arik abaŋ ŋaatsa akǝ shur mbumbur ki shushumɔ, ashur aŋkliŋklalu ne bagedime, te tuge ashur ne gɔŋmimi. Ankyak ŋguŋgu ben ili nas, bǝn izhaŋ gɔŋmimi.

6 Fe abɛ bla shar Arik amɛ ataŋgba ma ndi agli mpluŋ anakli iyi tei vlǝi.

7 Ine shar bla ilɛ kɛ Arik ine kuti avli mpluŋ maa. Mkpaŋ alu ben ilu ibiŋ ne azhizhi, fe atugǝ ashur ne gɔŋmimi. Ntǝk kɛ ntar kɛ gɔŋmimi ne gɔŋ, ntǝk kɛ ntar kɛ kuŋkun ne gɔŋ, ben agǝga ashushu ne gɔŋ.

8 Inǝ bla ishar Arik ine yaa ne vli mpluŋ maa. Ikinuŋ yiŋɛ iyi ndi igbu ngɔŋ tena tɔm te ta lu a tyagǝ azhɔk ne Inǝk ngɔŋ. Ntǝk kǝ ntar kǝ Inǝk ngɔŋɔ ikam tǝ azhizhi, 9 ntǝk kɛ ntar iyi vli ndi iyi ne miŋ Inǝk ngɔŋɔ ne ku, bǝn ntǝk kɛ ntar iyi igu ngɔŋgɔŋ iye inege ne shuri adɔmɔ.

10 Ankyak ine bla shar Arik ine ntar ne vli mpluŋ maa. Ncinces ngɔŋ, igɔŋ ndi lilɛn lu, izhaku ire shu te ku ne ntǝk kɛ ntar kɛ inǝk bǝn mgbashe ayi yaŋ gbur amashir. 11 (Isak kɛ ncincese azhɔkǝ te <<Ilik>>) Ntǝk kɛ ntar kɛ amashire ikam lik, fena aneshir tetɛk abɛ so amashire ne ku, te amashire ne akama alik.

12 Fe ine bla shar Arik ne nas avli mpluŋ maa. Ntǝk kɛ ntar kɛ laŋ arik, ntǝk kɛ ntar kǝ hwa, bǝn ntǝk kǝ ntar kǝ ncinces, ilaŋ mǝne itei zi nyak ntǝk ki ntar ne yaŋ laŋ; Amkpa ba tei laŋ ba ne ntǝk kɛ ntar kɛ aririk ben ntǝk kɛ ntar ikɛ bu maayi.

13 Fena Mnǝ ntɔ, te wɔ agamdi ndi azǝn bwak gbagbaŋ nǝ shu adi ne kɔr ngɔŋ, <<Wɔ zhin iki mimin tei nyɛ gɔŋmimi! Ba tei men ba netu aye aneshir abǝ yi ne gɔŋmimi ndi ate wɔ vli mpluŋ kǝ nki abǝ bla shar Arik amɛ tar ma!>>