1 Fe mǝne yik Igbarshu yayas ben gɔŋmimi yayas, te Igbarshu kɛ kuti ben gɔŋmimi kɛ kuti ne naŋadɔ, inǝk ne naŋadɔ. 2 Fe mǝne yik Ntun tsetser, Urshelima yayas, izi rɛ igbarshu ire ben Arik, ana aŋyak anenen, ndi iwa yayas ne duŋ te sɔŋ aŋub ilu maa. 3 Mǝne wɔ ikɔr ngɔŋ ilɛ irɛ mben yi sɔŋ yi itum idi: <<Azizaŋa ikɔb kɛ Arik iyi bǝn aneshir! Atei yi bǝn abɛba, aba atei nayi aneshir amaa. Arik wa ne tu maa atei na yi ben abɛba, atei yi Arik amene. 4 Atei yis amayi ne amen bɔbɔk. Iku batei na yime ba, ilɔ susun batei na yime ba kɔ izhin kɔ ilɔ. Ikiki yi ikukub ne naŋadɔ.>> 5 Ankyak Arik iwaŋ ndi akɔ sɔŋ ne mben yi itu mɔ adi, <<Neme Mǝne na ikiki bɔbɔk bɛ yi yayas!>> Ne na dim, <<Cɛr yiŋɛ, ililɛ ayi ilɛ didik bɛ na tanyɛme ne kǝ.>> 6 Fe adi, <<Ne ka klɛ! Nga Me yi Alfa bǝn Omega, Me yi ne kuti bǝn Iklɛ tu. Iwaŋ ndi ihriɛ iteu me tei nǝgu amashir ane munru ndi anǝk ivli di ba tei ya ba. 7 Abaŋ ndi atei lieru ate ta iyiŋɛ ben abɛm: Metei yi Arik amen, aba atei na yi amumun amuŋ. 8 Ama abǝ tǝ sisik, abǝ yaŋ na iki didik, abǝ na iki shisha, abǝ ŋlɔk aneshir, abǝ kur bǝn amba bǝn alulum ndi ba yi amɛn ba, abǝ tǝ amacincii, abǝ zǝ kpok tu kuŋkun, abǝ timu, amkpa amǝne ayi ikɔb lu kǝ ta nǝ dudu ngoŋ, waŋa ayi iku kǝ yaa.>>

9 Izhiin nǝ miŋ kɛ ataŋgba abɛ shar ayou Arik waŋ ndi agli agbǝgba amɛ taŋgba ndi iyah ntǝk taŋgba yi klɛtu ne shaga ne ye ben abɛm tedi, <<ye, metei tsa ru iwa yayas, iwa Nklu mɔ.>> 10 Izhu ne glim, fe ne shar ayou Arik abaŋ me te gar itu gbu lǝlɛ. Ne tsar me Urshelima, ntun ndi yi tsetser, izi rɛ gbarshu ben Arik 11 te yi klaklak ne ngɔŋ kɛ Arik. Ntunɔ itsar laŋ ndi jespa, te yi zenzen ndi kreta, 12 Ntunɔ yi ne kɔntsin ngɔŋ, lǝlɛ te yi ŋkuŋkɔŋ me wur ane yaa ben abɛ shar ayou Arik amɛ awur ane yaa ndi ablɛ nkuŋkɔŋɔ. Nǝ kuŋkunɔ ne cɛr asak nga ŋli me wur ane yaa kɛ Isrela. 13 Kuŋkɔŋ me tar iyi ne kɔte gar takɛ: Itar ne atu anzaŋ, itar ne amgbalu, itar ne gar kɛ kab anzaŋ, itar ne gar kɛ kab amgbalu. 14 Ntsan kɛ ntunɔ ne mɛ kɛ ne tanda kɛ yi ne mkpaŋ me wur ane yaa, ndi ne cɛr asak abɛ zǝ Yesɔ amɛ awur ane yaa. 15 Inǝ shar ayou Arik ndi ne lɛ bǝn abɛm agli ririk kɛ zineriya kɛ tsar ntunɔ, bǝn inɔkɔŋɔ, bǝn ntsan. 16 Ntunɔ yi anju anenen, imwe tena tɔm. Ine shar ayou Arik ne tsar ntunɔ ne asanda: itɔm maa neyi igab azhiin angɔŋ ayaa ben azhin amuɔtsɔtsɔb anas itɔm maa bǝn imwe maa iyi anenen. 17 Ine shar ayou Arik ne na tsar ntsene, itɔm maa neyi aza 216, ir keŋ ndi ne zen tsar ne mkpaŋ men. 18 Ne me ntsine ne jasfa, ntunɔ nak yi zineriya bɔbɔk, iyi glaŋglaŋ ndi glas. 19 Itanda kɛ ntsine ne mɛ kǝ ne mkpaŋ yi te anyaŋ. Itanda kɛ kuti ne mɛ kǝ ne mkpaŋ jɛspa, kɛ yaa ayi safaya, kɛ ntar ayi agat, kɛ nas ayi zumurudu, 20 ike tuŋ ayi onis, kɛ tani ayi yakutu, kɛ taŋgba ayi kirisolat, kɛ tender ayi bɛril, kɛ teres ayi tɔfas, kɛ wur ayi kirisofaras, kɛ wur ane zhiin ayi tokwas, kɛ wur ane yaa ayi ametis. 21 Nkuŋkɔŋ iwur ane yaa maa yi lu ulu u, ne na kɔte anɔkɔŋ atakǝ ne nakǝ ne lu ulu u, kɔte anɔkɔŋ atakǝ ne na kɛ ne lu ulu u izhiin. Ikukɔŋ yi zǝ inak yi zinariya ankyak, iglas ne tɔ caŋɔr. 22 Bam ne yik Akabaŋkɔŋ ne miŋ ntunɔ ba, te akabaŋkɔŋ ayi Ŋgɔŋ Arik ben Nklu. 23 Ntunɔ ba wɔb laŋ arik ba kɔ ihwa, ŋgɔŋ kɛ Arik ilaŋ shak amkpama, fe Nklu mɔ anak ayi ilaŋa. 24 Aner abɛ gɔŋmimi atei tsin ne laŋ maa, fe atum abɛ gɔŋmimi atei gliu adudunki. 25 Inɔkɔŋ yi ntunɔ te nak kur bu ire amblimblɛ te gar amgbalu yaŋ ku, te ibu ba tei yime amɔ ba. 26 Atei gli irɛ bǝn adudunki kɛ aner abɛ gɔŋmimi agliu anyɛ ntunɔ. 27 Ama iki yiŋ ndi ba yi tsetser ba itei yir ntunɔ, ba nuŋ ndi ana iki yi shisha bǝn timu, anak ayi abɛbaŋ ndi ne cɛr asak amen ne mplɛ abɛ vli atei yir ntunɔ.