1 Fe uwa, izu muŋ, ubǝ tsi klɛ ne iki didik yiŋ ndi yi ne Yesɔ Kristi. 2 Ikiki yiŋ ndi une wɔ mne mblai ne ayi aneshir tetɛk ubǝ baŋǝ saga aneshir abaŋ ndi ate sisik Arik abaŋ ndi atei zhi tsar anuŋ. 3 Ubǝ vuŋ susun Gli ben abɛ ta ndi ne kpaakpa didik ayou Yesɔ Kristi. 4 Ine kpaakpa ba nek tu maa ne ikiki yi gɔŋmimi ba, anǝk tu te wa abɛ na iki yiŋ ndi ŋgɔŋ amaa atei nye ru. 5 Neme, waŋ ndi ayi ne miŋ kɛ abɛ klu yara akpa, ba tei ta idǝk maa ba se ne zǝ nkunkɔŋ yi klu mɔ. 6 Ine na ndum kɛ ahwaŋ ŋgɔŋ ayi wa atei kuti ali ikili yi ahwaŋ amaa. 7 Ubǝ shu zhi iki yiŋ ndi mblau ne yi, te Arik atei nǝgu izhi iki yiŋɛ bɔbɔk.

8 Ubǝ shu Yesɔ Kristi zhi, waŋ ndi ne lɛgu ne bɛ, ndi ayi ŋli kɛ nga kɛ Doda. Waŋa ayi lɛ didik muŋ, 9 waŋa ayi ki yiŋ ndi myik iyah ne tu maa te ne kpam ndi myi ne lalɛ. Ama ba ne kpa lɛ kɛ Arik ba. 10 Neme mne mvuŋ kpa ngli ne kɔte ni ne atu abaŋ ndi ne hria ba, te aba menyi abɛ yik ta zhɔk iyi Yesɔ Kristi, ben ŋgɔŋ kɛ yaŋ klɛ tu.

11 Waŋa ayi lɛ didik:

Ndi ta te ku ben abɔu,

Ta tei na lu ben abɔu;

12 Ta te vuŋ susun Gli,

Ta tei na sɔŋ ben abɔu.

Ta te kyagu,

Iwa maayi atei na kyak zhi ta;

13 Mba ta te tsǝn anenen ba,

Iwa atei naga yi anenen,

Ba tei kyak itu maa ba.

14 Ubǝ nak duŋ abɛ zǝ Arik abɛ ben ashu azhi ikiki yiŋɛ. Ubǝ gbaŋ ba atɔŋ ne tii kɛ Arik abɛ duŋ te antam; te ba yi iki didik ba, anaga cɔk abɛ wɔ ba la ankyak. 15 Ubǝ tsǝ klɛ te nek Arik itu mi ndi ne na ndum waŋ ndi ne tanyɛme ben abɔu waŋ ndi ba te shisha ba te na bla lɛ kɛ Arik anenen. 16 Ubǝ te shaan ne lǝlɛ yi la sak kɛ Arik, te abaŋ ndi alɛ lǝlɛ yiŋɛ izhi Arik ite shaan ben abɛba. 17 Lǝlɛ mǝne ibu ndi mkpaa ŋgɔŋ. Ane Himinayas bǝn Filitas ayi amɛ ne miŋ mǝne, 18 abaŋ ndi ne kyak zǝ lɛ didik. Adi ilu ne bɛ ne ka gayir, tena cɔk itanyɛme yi susun kɛ anuŋ ala. 19 Neme, itanda kɛ klik kɛ Arik klikli mgbamgbaŋ, ne te kɛ ngir ne lɛ kǝŋe: <<Ŋgɔŋ ne zhi abaŋ ndi ayi amaa,>> neme, <<Waŋ ndi ne tanyɛme ne sak kɛ Arik atei duŋ na zumimin.>>

20 Nǝ kɔb ŋgɔŋ kɛ ner ne adudunki iyi ne kiki ba zineriya bǝn azurfa ankyak ba, ama iyi nkunkun bǝn ntentɛm; inuŋ iyi na ikiki didik, inuŋ ba yi na ikiki didik ba. 21 Fena waŋ ndi ne duŋ tu maa tsetser ne ikiki yiŋɛ, atei yi ne na ndum didik ben Arik, tsetser, atukɔ maa atei duŋu ana kɔte ndum didik ta kɛ.

22 Klu iki yi tik ayi iyi nzak mi, te na ndum didik, itanyɛme ne susun, nyɛr akpa ben sik susun, ben abaŋ ndi aben Arik ne susun tsetser. 23 Ubǝ kyak te antam ne kinuŋ iyi isha te ba gli iki didik anyɛ me ba, ubǝ zhi te inak gli ivǝh gli nyɛmɛ. 24 Waŋ ndi ana ndum kɛ Arik ba vǝ ba; neme, abɛ zi tu azhɔk bǝn kɔte ŋɔwa, abɛ zhi tsar lɛ kɛ Arik, te na vuŋ susun. 25 Abɛ gli abaŋ ndi akyagu aŋyak ankɔŋɔ ne zi tu zhɔk, ne zhɔk susun te Arik atei duŋ ba duŋ zumimin te kam azǝ lɛ didik, 26 te bǝ gli asusun amen akam nyak ankɔŋ adidik te afir aru ne atabɛrbɛr ayi shetan, ndi ne duŋ ba yi agɛn amaa te bɛ na iki wɔb maa.