1 Icɛr yiŋɛ ire bǝn Bulus inǝ du ilɛ kɛ Arik, iwaŋ ndi ba neshir nuŋ ne sharu ba, ama ai Yesɔ Kristi bǝn Arik Tetɛɛ amɔr waŋ ndi nɛ lu nǝ bɛ. 2 Bɔbɔk abǝ zǝ Arik abaŋ ndi ayi ayaŋa nɛ lɔk mǝ nǝ ishar yi tǝk abɛ akabaŋkɔŋ ayi Galantiya: 3 Tǝ Arik Tetɛɛ amɔr bǝn Ŋgɔŋ Yesɔ Kristi be zhin itazhɔk bǝn isɔŋ kǝ sǝk. 4 waŋ ndi nɛ nǝk tu maa nǝ lalɛ mɔr tǝ bɛ ta ta shur nǝ kab kǝ na ki mimin, Kristi nɛ nǝk tu maa nǝ lalɛ mɔr, nǝ zǝ lɛ kǝ Arik bǝn Tetɛɛ amɔr. 5 Arik be yi nǝ gbar iyaŋ klɛtu bǝn yaŋ klɛtu! Bǝ yemɛ.

6 Ilɛ mɛ duŋ me sak ŋɔk nɛ nu ndi Mnǝ wɔ izhin kam gɔŋ nǝk waŋ ndi nɛ zhɔzhin nǝ iyaŋ klɛtu nǝ tazhɔk iyi Kristi tǝ kam zǝ lɛnuŋ kǝ sha, 7 keŋ ndi ba yi lɛ didik ba. Anuŋ ne yik ndi akam zhin ate kpukpur, tena wɔb te ba abɛ ŋun lɛ didik kɛ Kristi me. 8 kɔ ate yi ndi ayi taba kɔ inǝ shar ayou Arik inǝ rɛ gbarshu te du lɛ didik kǝ men keŋ ndi bata ne du zhin ne kǝ ba, iki mimin bǝ vuŋu! 9 Ndi ta neka bla, neme, nga Bulus mna ndi: Te yi ndi ner nuŋ ate du zhin lɛ didik kǝ men inaŋ keŋ ndi izhin ne ta nyɛmɛ ne kǝ, iki mimin bǝ vuŋu!

10 Ka iyiŋe na ndi ngam wɔb tǝm baŋ asusun aye aneshir nǝ tanyɛmɛi? Bai tǝ ame ba! Iki yi wɔb muŋ ai tanyɛmɛ ye Arik! Ka Ngam wɔb tǝ aneshir bɛ nyɛr mǝ? Ate yi ndi M zǝn wɔb na amɛ, bam na yi gɛn ayou Kristi ba.

11 Duŋ mǝ bla zhin, akpa amuŋ, tǝ lɛ didik kǝ men keŋ ndi mne du kɛ bai ki ndi neshir ne nakǝ ba. 12 Bam ne takɛ rɛ ben nuŋ ba, kɔ nuŋ ne tsar me ne kǝ ba; ne yiŋɛ, mne nta kǝ ne rimla rɛ ben Yesɔ Kristi.

13 Ndika izhin ne wɔ kiki yi na muŋ nɛ ankɔŋ anǝ zǝ anǝ Yahudawa, ndi Mnǝ wɔb akla tǝm sak abǝ zǝ Arik iya tǝm var ba ntǝ ntɛn. 14 Mnǝ yi nǝ ti kɛ anǝ Yahudawa anuŋ ndi ayi asǝsa amuŋ nǝ zǝ tsar zhi Arik, tǝna nǝk tu ŋgɔŋ nǝ zǝ kiki yi taada iyi na atetɛ amɔr. 15 Fe ndi Arik, waŋ ndi ne kam me anyak ire ŋli muŋ tɛ zhɔm ndi nǝ tǝu nǝ tazhɔk maa, ne teu ma 16 tɛ tsar mǝ Izu maa, tǝ mbǝ du lɛ didik kǝ men nɛ atu maa nǝ miŋ aneshir abaŋ ndi ba yi ŋli kǝ Yahudawa ba, bam ne ntǝ rib nuŋ ba, 17 kam ne yuŋ gar Urshelima tem ntǝ yik abǝ du lɛ kɛ Arik ndi ne kum ti. Ama mne nku ngar iŋa kɛ Arabiya andanda te shi ŋur nkam kɔmɔ ne Damaskɔ.

18 Ankyak ndi ase tar ne gayir, mne gar Urshelima te yik Biturus te ntǝ bɛr wur ane tuŋ bene bɔu. 19 Bam nǝ yik inuŋ nǝ min kɛ abǝ du lɛ kɛ Arik ba, anaga yi Yakubu izumen anǝ Ŋgɔŋ ankyak. 20 Mbla zhin ne ti kɛ Arik te ki yiŋ ndi mcɛr zhin neyi bai mu ba. 21 Ndi iyiŋɛ ne gayir, Mne ŋgar Suriya ben Kilikiya. 22 Abǝ zǝ Arik ndi Kristi ayi bene bǝba ne Yahudiya bane zhim ba. 23 Ne naga wɔ lɛ ne tu amuŋ: <<Tǝ Shaulu waŋ ndi ne bene sak ta iya azǝzaŋa ataga yi iner ne du lɛ kɛ tanyɛmɛ keŋ ndi ane wɔb zhɔk kɛ adɔmɔ.>> 24 Fe ne gbar Arik asak ne ta Arik muŋ.