1 Yesɔ ben abɛ zeu tsin ne glɔ goŋ nek ne Galili te gar igar kɛ Garisinawa. 2 Ndi Yesɔ ne ru ne miŋ gumɔ iner nuŋ ndi ayi ne anerim aru rɛ amkpa ane ru aneshir te anyɛ yigu. 3 Iner waŋa akur ne amkpa ne ru aneshir, inuŋ ba mla te abɛ kpau ne tsǝtsaŋ ba. 4 Nak men rɛ kukub akpau ne tsǝtsaŋ aŋɔk ben aza ama ana gbur atsǝtsaŋa akluk inuŋ ba yi ne mgbyamgbyaŋ kɛ vuŋu gli ba. 5 Ibu bǝn aririk ne amkpa ne ru aneshir bǝn atu mkpaŋ a ŋarzhin te vu mkpaŋ aŋar kpa maa.

6 Ndi ne yik Yesɔ gbagbaŋ, alu klu te tar agbarum ne ti maa. 7 Inere aŋar kɔr te di, <<Uwɔb anii bene bɛm, Yesɔ, Izu Arik Ŋgɔŋ me biŋu ben Arik duŋ sak me iyah ba!>> 8 Te Yesɔ ne adiu te di, <<ru ne kpa kɛ ner waŋa wa izhu mimin!>>

9 Fe Yesɔ aribu te di, <<azhɔu te ŋɔ?>>

Adi, <<Azhɔm tǝ lǝjɔn, watɔ tetɛk, tǝ ta yine du.>> 10 Ankyak aben Yesɔ tena benu kǝr abɛ gli ba aru ne amkpa waŋa ba.

11 Ayok ntsan ane gluk abɛ kɔb tetɛk ne kɔn tiŋ gbu. 12 Ankyak anerime aben Yesɔ te di, <<shur ta ne miŋ ane gluk abɛ kɔb abaŋa te duŋ ta bǝ yir miŋ mǝne.>> 13 Fe aduŋ ba aru, ankyak anerime akɔ ru te yir miŋ ane gluk abɛ kɔbɔ. Idu mǝne iyi azhin ayaa, ne ru ahrie ne miŋ nek ŋgɔŋ te mli amashir.

14 Abaŋ ndi a yɔk ane gluk abɛ kɔbɔ aklu te kɔte bla aneshir ne miŋ ntun ŋgɔŋ ben ntuntun mwɔtsɔtsɔb, ankyak aneshir akɔ ru te kɔte tɔ iki yiŋ ndi Yesɔ ne nai. 15 Ndi ne nyɛ bǝn Yesɔ, ne yik iner waŋ ndi azhɔu te lǝjɔn ndi anerim tetɛk ne yir kpa maa, akɔ sɔŋ ne su iki ne kpa maa alambur tu amaa ayi bǝn abɔu sisik ku vuŋ ba. 16 Abaŋ ndi ne yik ne ayi men ne bla ki yiŋ ndi ne vuŋ waŋ ndi anerim tetɛk ne yir kpa maa ben ki yiŋ ndi ne vuŋ ane gluk abɛ kɔbɔ. 17 Fe aneshire akɔ ben Yesɔ abɛ duŋ gar mǝne.

18 Ndi Yesɔ ayi ne miŋ kɛ yir igu, iner waŋ ndi ane yi ne anerime aben te wa abɛ zeu. 19 Yesɔ bane tanyɛme ba, ama diu, <<kɔmɔ te bla aner abɛ kɔmin ki yiŋ ndi Arik Ŋgɔŋ ne nau aneyi ben ir keŋ ndi ne lɔ susun mi.>> 20 Fe neshire akɔ ŋur akam akɔmɔ te zen bla ba ne Dikafoli kiki yiŋ ndi Yesɔ ne naa wa aneyi. Ankyak aneshir aku vuŋ anu.

21 Ndi Yesɔ ne glɔ goŋ nek ngɔŋ ne igu, ntsan aneshir ne kamu zhɔk ne atsutsu ne goŋ nek. 22 Inuŋ ne miŋ kɛ angɔgɔŋ abɛ tsik ibaŋ ne akaba, azhɔu te Yarus, anyɛ amkpama. Ndi ne yik Yesɔ, te zhaku ne aza amaa 23 te benu ngɔŋ, <<Iva muŋ vǝtsɔb aku. Mbenu kɔte sagu aŋɔk te duŋu abɛ rɛ te bɛ yi tsitsir.>> 24 Fe Yesɔ akɔ zeu.

Ntsan aneshir azhɔgu ne atsutsu te mɔu. 25 Ankyak wa nuŋ ndi ne te ase awur ane yaa te zen zi azhizhi. 26 Nǝ yik iya tetɛk ne ŋɔk abɛ na kǝka te ŋlɔk ki yi ŋɔk maa, ndi abɛ rɛ ilɔmɔ ikyak te te ŋgɔŋ. 27 Ndi ne wɔ lɛ ne tu Yesɔ, akama zǝ gɔŋ maa te sak ŋɔk ne anklu akɛ gen amaa, 28 adi ne susun maa, <<Mte sak ŋɔk ne anklu amaa, M tei rɛ.>> 29 Nǝ amkpamkpama iru azhizhi me igburkli ankyak iwama awɔ ne kpa maa wa ne ka li aru ne ya maa.

30 Nǝ amkpamkpama Yesɔ awɔ mgbyamgbyaŋ ne ru ne kpa maa. A kama tɔ ntsan aneshire te rib ba te di, <<Ayi ŋɔwa a sak ŋɔk ne anklu amuŋ?>> 31 abɛ tsene maa mtanyeme, <<Uyik ntsan aneshir ne kamu azhɔk ne atsutsu, urib te di ai ŋɔwa asagu ŋɔk?>>>

32 Ama Yesɔ akyak te blɛ amkpa tɔ te iwa abɛ yik ayi ŋɔwa ne cɔk wa ŋɔk. 33 Fe iwama, ne zhi ki yiŋ ndi nena ne kpa maa, anyɛ te zhaku ne aza amaa ne rɛ kpa ben sisik te blau zub. 34 Yesɔ a diu, <<Va muŋ, itanyɛmɛ mi ne duŋu rɛ. kɔmɔ ne sik susun une li ru ne iyah mi.>>

35 Ndi Yesɔ anaga ri yi ne miŋ kɛ lɛ aneshir anuŋ are kɔb kɛ Yarus ngɔŋ ne akaba. A blau te di <<Va mi ne ku,>> U na wɔb Yesɔ ne nii?>>

36 Yesɔ bane kama tɔ kɛ yiŋ ndi ablai ba, adi ngɔŋ ne akaba ma, <<Duŋ te sisik ba nak tanyɛmɛ.>>

37 Yesɔ bane duŋ nuŋ azeu ba anaga yi ane Biturus, Yakubu ben Yɔɔna amunzumen ane Yakubu. 38 Ndi ne yir kɔb ngɔŋ ne akaba ma, Yesɔ awɔ yaa atɔŋ aneshir azǝn zhin ngɔŋ. 39 Yesɔ ayir miŋ kɔbɔ te di ba, <<aye nii duŋ zhin ya tɔŋ te zhin amɛ? Vǝvǝne bane ku ba ayi tsitsir.>> 40 Ankyak amlagu.

Ndi ne yar ba rumɔ bɔbɔk, aduŋ Tetɛɛ me ben iyah maa vǝvǝne ben abɛ zeu tsǝn ndi ayi bene bɔu, te yir amkpa waŋ ndi vǝvǝne akɔkurɔ. 41 Yesɔ avuŋ ŋɔk maa te di vǝŋɔ <<Talita kum!>> Kǝŋ ilɛmɛ di, <<Vǝnwa vǝtsɔb, mdi lu sɔŋ!>> 42 Ne amkpamkpama vǝnwama alu klɛ te tsǝn (ayi ase wur ane yaa.) Ki yi na maa duŋ ba vuŋ anu. 43 Yesɔ ne di ba kǝr abɛ duŋ bla nuŋ ki yiŋɛ ba tena diba abɛ nugu kili ata li.