1 Waŋa ayi ilɛ didik netu ayi Yesɔ Kristi, Izu Arik.

2 Icɛr yi Ishaya ine bla shar yi Arik tedi:

<<M tei shar ine shar amuŋ te abɛ lii zhin ti,

Iwaŋ ndi atei na ankɔŋ aŋyak zhin>>

3 <<Ikɔr nuŋ izhɔ rɛ ahwaŋ,

<Na zhin ankɔŋ nyak zhin Ŋgɔŋ,

Nab zhin ankɔŋɔ nyak anenen.>>>

4 Fena Yɔɔna ne nyɛ re zizik, te su aneshir tena du lɛ kǝ Arik. netu ayi su aner abɛ duŋ na zumimin tǝ ta zuk zhɔk ne lalɛ. 5 Bɔbɔk ne ŋa kɛ Yahuda bǝn aneshir abǝ Urshelima bɔbɔk ne na gar bǝn abɔu. Abla zumimin men, te Yɔɔna ne su ba ne nek ine Urdu 6 Yɔɔna ne su kluŋklu iyi na ne fumfuk kpa yi lakurmi, bǝn ririk kɛ na ne lɛda kɛ kpa ne tiŋ, tena ta Adagbyaŋ bǝn ntun anisho. 7 Fena waŋa ai nkanlɛ iyi du maa: <<Inuŋ atei nyɛ ne goŋ muŋ tena ayi ne mgbyamgbyaŋ anaŋ me, ndi Juda ayi akpaza amaa bam ne mla ne zuge yir ba. 8 Mǝ suu zhin ne amashir, ama ine nyɛmɛ atei su zhin ne Izhu Tsetser.>>

9 Nǝ mkpaŋ yuŋɔ Yesɔ ne rɛ Nazara kɛ Galili te duŋ Yɔɔna suu ne nek ne Urdu. 10 Ndi Yesɔ anaga aru are miŋ amashire, akɔ yik gbarshu ku bu alɛla fena Izhu tsetser kuzi nyɛ sɔŋu ne mpa ndi angu. 11 Ankyak ikɔr ku rɛ gbarshu te di: <<Iwa uyi Zumuŋ, iwaŋ ndi Me nyeru; iwa susun muŋ inyɛru ngɔŋ.>>

12 Ne amkpama, Izhu tsetser akɔ gli Yesɔ kɔmɔ ne ahwaŋ, 13 te baŋ mkpaŋ ne ahwaŋa iber sɔknas, shetan azǝn tenu. Neyi amɔ ne ahwaŋa abiŋ bǝn inarum abɛ ŋlɔk aner, ne yiŋɛ abɛ shar ayou Arik ne zen lɔgu ma.

14 Ndi neka zhɔk Yɔɔna ne jaru, Yesɔ alɔ gar Galili, te du ilɛ didik kɛ Arik. 15 <<Mkpaŋ neka nyɛ,>> Yesɔ adi ba. <<Mkpaŋ ne ka nyɛ. kɔb Arik ne gbahir! Duŋ na zumimin min te tanyɛmɛ ne ilɛ didik!>> 16 Ndi Yesɔ atsǝnetsǝn ne ŋa kɛ Inǝk ne Galili, ayik Siman ben izumen Anduru azǝn tyak burgi ne inege, ayi aneshir abɛ vu ambɛ. 17 Yesɔ adi ba, <<Nyɛ zhin, zǝme azhin,>> <<te M tei duŋ zhin yi abɛ gli aneshir nyɛ ben abɛm.>> 18 Ne amkpama akɔ duŋ tyak burgi te zǝ Yesɔ.

19 Ndi ne ayene kɔmɔ ne ti, ate yik Yakubu izu Zebɛdi bǝn izumen Yɔɔna ne miŋ igu, azǝn ŋla burgi amen. 20 Ndi Yesɔ ne yik abɛ na ndum maa akɔ zhɔ ba, ankyak aduŋ tetɛɛ amen Zebɛdi ne igu bǝn aneshir abaŋ ndi ne baŋ ba na ndum kɛ yaa te zi Yesɔ.

21 Ane Yesɔ bǝn abɛ tsene maa ne kɔmɔ ne Kafanahum, ndi bɛr yi sɔŋ sik ne nyɛ, Yesɔ ne yir miŋ akaba te zen tsar amɔ. 22 Aneshire ne vuŋ anu ne tsar maa, te atsar ne mgbyamgbyaŋ, ba ndi abɛ bla tsar nkanlɛ iyi cɛr Musa ba. 23 Ne yaŋa iner nuŋ ne akaba ŋɔ ne men yi ne izhu yi shetan ne miŋ kpa maa azhɔk zhin, 24 Yesɔ awɔnǝ Nazara! <<Uwɔb anii bene bɛtai, Une nyɛ te ubǝ nyɛ zhɔk ta dɔmɔi? M ne zhi ka uyi ŋɔwa, Uyi Tsetser ne shar ayou Arik!>>

25 Yesɔ atsaŋ izhu mɔ ne amkpama te di,<<Kwɔnu!>> <<Ru ne kpa kɛ ner waŋa!>> 26 Izhu yi shetan lǝk ner ndi ayi ne kpa maa abaŋa ŋur ne mimi te ŋɔr aru ne kpa kɛ neshire.

27 Fe aneshir bɔbɔk avuŋ anu tɛ bǝn arib akpa mɛn te di, <<Waŋa aye nii? Itsar yayas, ina yi ne mgbyamgbyaŋ! Ana lɛ bǝn izhu yi shetan akɔ zǝ lɛ maa.>> 28 Ilɛ kɛ bla ki na Yesɔ ne yir ntuntun iyi ŋa kɛ Galili ngɔŋ andanda.

29 Ndi anaga duŋ akaba ŋɔ, akɔ gli Yakubu ben Yɔɔna te gar kɔb ane Siman ben Anduru. 30 Ne te yik acimen ayou Siman ikpa ne ŋuru zhɔk te akɔkur, ankyak akɔ bla Yesɔ ilɛ kǝ nǝ lɔmɔ. 31 Fena Yesɔ akɔte yigu akɔkur, avuŋ ŋɔk maa te abɛ alu asɔŋ. Ankyak akɔ rɛ te lɔgu ma.

32 Ikab amgbalu ne bǝn aneshir ne vu abɛ lɔ bǝn abaŋ ndi anerim ne yir ba te nyɛ bǝn Yesɔ tǝ bɛ naa ba. 33 Ankyak aner abɛ ntuno bɔbɔk atuŋ akpa abiŋ amkpa zhin ne ankɔŋ ane yir ntuno, 34 fe Yesɔ nena aner abɛ lɔ kaŋkaŋ tetɛk te duŋ ba rɛ. Tena yar anerim aglɛ rumɔ; nena yar anerim bu anu te lɛ, tǝ nɛ zhiu.

35 Ndi bɛr bane zen ŋan klɛ ba, Yesɔ atsɛru te duŋ kɔb kǝ sɔŋ maa te kɔmɔ ne goŋ ntun te gar ben Arik. 36 Ankyak Siman ben nki abɛ zeu tsǝn alu zǝ goŋ maa, 37 ndi ne te yigu, akɔ diu, aneshir tetɛk azǝne wɔb bu.

38 Fe Yesɔ akɔ diba, <<tsara zhin kɔmɔ ne ntuntun yi ti, tem ite du lɛ kɛ Arik amɔ: te waŋa ayi ki ndi mne nyɛ naima.>> 39 Neme Yesɔ ne du lɛ Arik ne akaba amene ne ntuntun iyi Galili, te yar anerim aglɛ rumɔ ne akpa aner abaŋ ndi ne yir ba.

40 Amɔ iner ne lɔ amkpuk nuŋ azǝ Yesɔ agar, te benu, tena tar agbarum, te di Yesɔ, <<utǝ ta Iben muŋ, ubɛ duŋ me rɛ.>>

41 Fena Yesɔ akɔ wɔ lɔ susun maa, te sagu ŋɔk, te diu, <<Mne ta nyɛmɛ, ubǝ rɛ.>> 42 Andanda ilɔ amkpuk go iduŋu, fe akɔ rɛ. 43 Yesɔ akɔ gbaŋu atɔŋ tedi ne kɔr ŋgɔŋ te duŋu akɔmɔ; 44 Ankyak adiu <<Duŋ bla ner nuŋ ikinuŋ ba. kɔmɔ kimi, kɔ te tsar tu mi bǝn ine na ndum kǝ Arik, tena nek ikinuŋ iyi tsar nyɛr mi ne akabakɔŋ ndi icɛr yi Musa ne di duŋ bɛ yik uyi tsetser.>> 45 Bane yi amɛ ba, ne ru te zen du ilɛ kɛ Arik ne zhɔk kpa. Iki ndi ne zi goŋɔ, Yesɔ bane yir miŋ ntuno ne zhɔk kpa ba te kǝr aneshir abɛ yigu ba ama ne sɔŋ ne mkpǝmkpa iyi goŋ ntun. Neme aneshir kɔte amɛ akyak te azǝn zeu gar.