1 Nǝ bɛr nuŋ Yesɔ ne kɔmɔ ne akabankɔŋ, fe iner nuŋ waŋ ndi iŋɔk maa ne vugun ayi muɔ. 2 Anuŋ ne miŋ mǝne awɔb ankɔŋ ane vuŋ Yesɔ ne lalɛ, ne suu ayi ŋgɔŋ te aba abɛ yik kai di wa atei na aneshire tǝ bɛ rɛ ne bɛr yi sɔŋ sik. 3 Yesɔ adi neshir nǝ gun ŋɔk go, <<Lu klɛ ne ti aneshir abaŋa.>>

4 Ankyak Yesɔ akɔ rib ba tedi, <<Itayi iyi anenen. Nǝ bɛr yi sɔŋ sik: abɛ na iki didik ka abɛ na ki mimin, abɛ ta ivli azhɔk ineshir ka abɛ ŋun ni?>> Ama bane di kinuŋ ba.

5 Akama tɔ ba ne ti kɛ mfu, ne te mfu ŋgɔŋ ne klik asusun mǝne, adi iner ne gun ŋɔgo, Ubǝ nab ŋɔgo.>> Neshire anab kɛ, ankyak ŋɔk maa iku nab. 6 Fe Ferisawa akɔ ru abɛm te zen kpa nyak ben aner abɛ Hiridus ir keŋ ndi aba atei na te abɛ ŋun Yesɔ.

7 Yesɔ ne kama ru ben abɛ tsene maa te gar kɔtɔŋ nek, fe ntsan aneshir abɛ rɛ Yahudiya ben Galili, 8 Urshelima, ben ntun yi Idɔm, ben ntuntun yi ŋa kɛ Juda ben Taya ben Sidon, aner tetɛk ne te tun ne zeu ndi ne wɔ kiki yiŋɛ. 9 Ndi ne yik idu aneshire abla abɛ tsene maa abe te wɔb igu vǝtsɔb aŋyak wa, te wa abɛ tɛ shaan ne du aneshir. 10 Te ne na aneshir tetɛk te ne rɛ, te duŋ abɛ yine lɔ kaŋkaŋ azǝn tur te aba abɛ sagu ŋɔk.

11 Mkpaŋ keŋ ndi anerim ne yigu, azhaku ne ti maa te aŋar zhin, <<Uyi Izu Arik.>> 12 Neme anǝk ba ilɛ ŋgɔŋ te kǝr abɛ bla nuŋ ka iwa ayi ŋɔwa ba.

13 Yesɔ ne kama yuŋ tu gbu te zhɔ abaŋ ndi wa ne ta nyɛmɛ bene ba, te duŋ ba te yigu amɔ. 14 Ne hria aner awur aneyaa tedi aba aye abɛ tsene maa te abǝ na ndum maa te bena yi abɛ du lɛ kɛ Arik 15 te bena yi ne mgbyamgbyaŋ kɛ yar anerim gli rumɔ. 16 Waŋa aye aneshir awur ane yaa abɛ hria amaa: Siman (iwaŋ ndi ne nǝgu sak te Biturus); 17 Yakubu izu Zebɛdi ben izumen ane Yɔɔna (Yesɔ ne zhɔ ba te Buwanazhi, watɔ Amumun abɛ nnas); 18 Anduru, Filibus, Batɔlɔmi, Matiu, Tɔma, Yakub izu Alfa, Tadiyo, Siman ne nyere kpa 19 ben Yahuda awɔnǝ Iskariyɔti ndi ne baŋ Yesɔ alɛb.

20 Fe Yesɔ ayir kɔb, ankyak aneshir akɔ tuŋ abiŋ, ir keŋ ndi iwa ben abɛ zeu tsǝn amaa bane yik mkpaŋ kɛ li kili yir ba. 21 Ndi aner kɔb abɛ Yesɔ ne wɔ ki ndi itsin, ne gar te aba abɛ vuŋu agli agar kɔb, te anuŋ adi, <<Itu maa ba yi anenen ba.>>

22 Ndi amɛ abɛ tsar ne nkanlɛ yi cɛr Musa abaŋ ndi ne zi anyɛ Urshelima adi, <<Ndar yi Belzebub itum ane anerim ivuŋu! ngɔŋ ane anerim tǝ ayar anerim aruu ma te aganci avuŋu.>>

23 Neme Yesɔ azhɔ ba te blaa ba nkanlɛ: <<shetan ana kikin te yar shetan rumɔi? 24 Ikɔb ngɔŋ te gab te ntǝk yaa, ikɔbɔ ba tei klɛ ba. 25 Aner abɛ miŋ kɔb bate biŋ atu ba; ikɔbɔ batei klɛ ba. 26 Ate yi ndi shetan te kyak tu maa te ŋar te nten, batei klɛ ba; iklɛtu maa ne nyɛ. 27 Ai lɛ didik, nuŋ batei yir kɔb kɛ neshir ne klik te kɔte baŋ kinuŋ maa te ru ba se ne kuti akpa ner ne klik ge baliŋ. Te kashe vu kiki iyi kɔbɔ. 28 Mblazhin izub, ilalɛ bɔbɔk bǝn nkan lelɛ yi sha Arik atei zuk aner azhɔk blai. 29 Ama iwaŋ ndi ate tun zhi izhu yi Arik; ne lalɛ kǝ yaŋ klɛtu keŋ ndi ba tei zuk ilalɛ maa azhɔk ba.>>

30 Yesɔ adi amɛ te azǝn di <<Ayi ne anerim.>>

31 Fe iyah amaa Yesɔ ben amunzumen ne tsǝne te yir. Te aklɛkli ne bɛm, akɔ shar nuŋ te abɛ zhɔu. 32 Ntsan aneshir ne kamu azhɔk ne tsutsu te diu, <<Iya mi bǝn amunzumin bǝn amunvamin ayi ne bɛm azǝn wɔb bu.>>

33 Yesɔ arib ba. <<Ayi ane ŋɔɔ ba yi iya muŋ ben amunzumɔrɔ?>>

34 Akam atɔ abaŋ ndi akɔsɔŋ agankyaŋa tedi, <<Abaŋa aye ne iya muŋ ben amunzumɔr!

35 Iwaŋ ndi ate naki ndi Arik adi ai wa ayi zumɔr ben vamɔr ben iya muŋ.>>