1 Neme Yesɔ atsar ba ne kɔtɔŋ nek. Ntsan aneshir ndi ne kamu azǝk ne atsutsumɔ ayi ne du te duŋu a yir miŋ igu asɔŋɔ te zen tsar ba ndi ne zǝ sɔŋ ne kɔtɔŋ nek ne Galili te zen wɔu. 2 Ne tsar ba kiki tetɛk ne nkanlɛ, fe ne miŋ kɛ tsar maa idi: 3 <<Wɔ zhin! Iner ne lɔn nuŋ ne gar tib bǝbǝ ki ne ahwaŋa amaa. 4 Ndi ayi ne min kɛ yi bǝbǝ kime, inuŋ var hrie ne ankɔŋ, fe aŋliŋlɔ anyɛ taŋǝ amli bɔbɔk. 5 Inuŋ var hrie ne ayaŋ, ndi mimi me ba yi tɔ ki ba. 6 Ndi arik ne laŋ ŋgɔŋ, bǝbǝ ki iyi tibɛ ku goŋ cɔkla, te kam klu te ririŋe bane sɔŋ ne mimi didik ba. 7 Bǝbǝ kinuŋ var hrie ne min ncɔŋ, ndi ne tɔ, ncoŋ ku turǝ teduŋ bane te mgbyaŋ ba. 8 Neme bǝbenuŋ nena hrie ne mimi didik. Nǝ tɔ, te flu tena dɔ mgbyaŋ, inuŋ ne yi abubu sɔktar, sɔk tani, inuŋ ne naŋ amgblik azhin.>>

9 Fena Yesɔ adi, <<Iwaŋ ndi ate yi ne atɔŋ ayi wɔ, abɛ wɔ.>>

10 Ndi Yesɔ neyi kiki maa, abɛ tsene maa awur ane yaa bǝn abaŋ ndi ne wɔu arib Yesɔ lɛ netu nkanlɛ yi bla maa. 11 Yesɔ abla ba tedi, <<Iki iyi suyir ne kɔb Arik nɛ nǝk zhin neyi. Ama abaŋ ndi ayi ne abɛm ne bla ba nkanlɛ yiŋɛ 12 te duŋ,

<<<Tǝ abɛ tɔ ba tei yik ba,

Tǝ bɛ na wɔ batei zhi ba;

Mba amɛ atei ŋur akam tǝ Arik abɛ zuk ba zhɔk!>>>

13 Fena Yesɔ adi ba, <<Ba zhin ne zhi nkan lɛ yiŋɛ ka? Tǝ izhin tei na kikin te zhi nkanlɛ nuŋǝ? 14 Iner ne lɔno ne tib ilɛ kɛ Arik. 15 Aneshir anuŋ ayi ndi bǝbǝ ki yi tib iyiŋ ndi ne var hrie ne ankɔŋ, amkpa awaŋ ndi ne tib ilɛ mɛ. Ate naga wɔ lɛ kɛ Arik, shetan inyɛ te baŋ ilɛ kɛ Arik agli tibɛ ne asusun amen. 16 Anuŋ, ayi ndi bǝbǝ yi var hrie ne amkpa ane ayaŋ, ndi ne wɔ lɛ kɛ Arik te nyer. 17 Ama ba ilɛmɛ bane yir miŋ asusun amene ba, ba baŋ mkpaŋ ba. Ndi iwɔb akla bǝn isak iya ite nyɛ netu lɛ kɛ Arik, akɔ mǝne azhaku. 18 Neme anuŋ, ayi ndi bǝbǝ ki yiŋ ndi ne tibɛ ne miŋ ncɔŋ, abaŋ ndi ne wɔ ilɛ kɛ Arik, 19 ama imɔ yi sɔŋ kɛ gɔnmimi, ishur ayi ne kiki tik ayi bǝn adudunki bǝn itik ayi ne bubu netu kiki ndi nyɛ te cɔk ilɛ kɛ Arik ila, te duŋ kɛ yaŋ flu. 20 Anuŋ, ayi ndi bǝbǝ yi tib ne mimi didik, awɔ ilɛ kɛ Arik, ne tanyɛme ne kǝ, anuŋ ne yik abubu sɔk tar, sɔk tani kɔ bǝ naŋ amgblik azhin ne bǝbǝ ki yi tibɛ.>>

21 Yesɔ adi ba, <<Izhin baŋ pitila ku nyak ne sesa ka ne aza agodɔ ne mimi? Ndi amɛ, di ka izhin sak zhin Lu kɛ laŋa ne amkpadeb? 22 Tǝ ikiyiŋ ndi ne suyir atei bui ayak andala, ikiyiŋ ndi iyi raraŋ Arik atei buri arumɔ. 23 Ate yi ndi inuŋ ayi ne atɔŋ ayi wɔ, abɛ wɔ.>>

24 Yesɔ adi ba, <<Izhin bǝ te zee ne kiki iyi wɔ min,>> <<Agbǝba awaŋ ndi izhin te tsar nuŋ kime, aye awa atei na tsa ru ma mi yi itei na gar kam. 25 Iner waŋ ndi ate yi ne ki atei na nyaŋu nuŋ ne tu mɔ; iwaŋ ndi ba yi ame neyi ba, kɔ vǝtsɔb yiŋ ndi ayime ne yi atei tei ne ŋɔk maa.>>

26 Yesɔ nena di, <<Waŋa ayi ir keŋ ndi kɔb Arik yime. Ineshir ne yi bǝbǝ ki ne mimi. 27 Akurna ne bu te sɔŋ tsitsir aririk, bǝbǝ me tɔ tena flu, neme ba zhi ka na kikin ba. 28 Imimi iduŋ bǝbǝ ki tɔ te flu te dɔ ikili, tɛ nab ŋkluŋ baliŋ, fe te lu ru atɔ, fe mgbyaŋ kpu ku ru. 29 Ndi ikiyi tibɛ neka rǝ mla sɛr, iner ne ahwaŋa atei baŋ alibzi amaa sɛrǝ, te mkpaŋ kɛ sɛrǝ ma nǝ ka tǝ. >>

30 Ankyak Yesɔ adi, <<Ta tei di kɔb Arik iyi kikini, ka nkanlɛ tayi tei bla ndi kɔbɔ yi mei? 31 Iyi ndi bǝbǝ nklik, keŋ ndi iyi mgbyaŋ mɔtsɔtsɔb ne miŋ kɛ bǝbǝ ki iyi tib ne mimi. 32 Neme ate tib bǝbǝ me, itɔ te flu tena te ngɔŋ te kam naŋ nki bǝbǝ ki ndi ne tibɛ ne miŋ Ahwaŋ ne kam zib, te aŋliŋlɔ abɛ bwak ne gbarshu ashur anjer ne anga amaa.>>

33 Yesɔ ne lɛ ben abɛba ne nkan lelɛ tetɛk, neme bane nazhi iki yi bla ba. 34 Yesɔ bane bla ba lɛnuŋ keŋ ndi bane yaŋ ba nkanlɛ ba. Ama mkpaŋ keŋ ndi atei ndɔ ben abɛ tsene maa, ba ku kinuŋ ayir bama ba.

35 Nǝ bǝn amgbalu neka te, abla abɛ zeu tsǝn te di, <<Duŋ zhin tabǝ glɔ kɔmɔ ne goŋ nek yuŋ.>> 36 Akɔ duŋ aneshir, te tsǝn ndɔ ben Yesɔ, ir keŋ ndi abɛ nama, ne gar ayir mimin gumɔ. 37 Ankyak nguŋgu ngɔŋ iye ankun amashir fuk gumɔ ŋgɔŋ ndi tei gbuŋa, ayi ndi igumɔ itei rim. 38 Yesɔ ne yi miŋ igumɔ ne gɔn te zen kurna te sak tu maa ne iki sak tu. Abɛ zeu tsǝn akɔte sǝu te di, <<Ine Tsar, bau nǝ kam tɔ kɔ tabǝ dɔ ba>>

39 Akɔ lu, te tsaŋ nguŋgumɔ tedi, <<Tǝ zee, Kǝr ubena fuk ba!>> Ankyak ankun amashire akɔ te zee.

40 Yesɔ akɔ di abɛ zeu tsin amaa, <<Izhin te sisik iye nii? Har azizaŋa ba zhin yi ne tanyɛmɛ ka?>>

41 Isisik ku te aneshire te ben arib akpa, <<Waŋa ayi ŋɔwai? Nak tɔ te vuŋ nguŋgu ben ankun amashir iwɔ lɛ maa!>>