1 Yesɔ ne duŋ amɔ te kɔmɔ ne ntun maa, abɛ tsene maa ne ku gɔŋ 2 Ndi bɛr yi sɔŋ sik ne nyɛ, Yesɔ ne tsar ba ne akabankɔŋ, aneshir tetɛk ndi ne wɔu ne vuŋ anu. Arib te di,

<<Iner waŋa ne yik kiki yiŋɛ neme? Nǝ yik Mgbemgbeb kǝŋe ne mee? ndi azǝn na kiki yi vuŋ anu! 3 Ba waŋa ayi izu ne kpaŋ ki kai? Ba wa ayi zu Meryamu bǝn izumen ane Yakubu, Yusuu, Yahuda ben Siman kai? Ba ye amunvamen ayi ben abɛta kai?>> Fe akɔ baŋ afuk bene bau.

4 Yesɔ di ba,<<Anǝk ine bla shar yi Arik ŋgon maa kɔte me anaga ayi ne ntun maa, ben aneshir amaa ben kɔb maa kɛ ba nǝgu ŋgon ba.>> 5 Ba ne na ikinuŋ yi vuŋ anu amuɔ ba, ne anaga sak aneshir abɛ lɔ aŋɔk te duŋ ba arɛ. 6 Yesɔ ne vuŋ anu ne yaŋ tanyɛmɛ mǝne.

Ankyak Yesɔ azǝ ntuntun te zen tsar. 7 Azho awur ne yaa, te shar ba aya yaa te nek ba mgbyamgbyaŋ ne tu anerim.

8 Waŋa ayi lɛ kɛ nek maa: <<Kǝr zhin bǝ baŋ ki nuŋ gli ne tsǝn min ba, nak gli zhin mkpɔki kɛ tsǝn, kǝr zhin bǝ gli kili ba, bǝn mgbɔ, ben azɔb ne kpamin. 9 Abɛ su akpaza kǝr abɛ gli kiki yi su ba. 10 Izhin te yir kɔb nuŋ, izhin bǝ sɔŋ amɔ se mkpaŋ keŋ ndi zhin ne duŋ ntuno. 11 Itun yiŋ ndi ba te ta zhin te wɔ zhin ba, izhin bǝ klu mgbumgbuk yi aza min shur ndi zhin te ru, te bǝ yi ba iki yi shu zhi ne atu amen.

12 Ne ru te zen du lɛ kɛ Arik te aneshir abɛ duŋ zumimin men 13 Ne gli anerim tetɛk agli arumɔ te kin aneshir tetɛk anyɛ te duŋ ba ne rɛ.

14 Itum Hiridus ne wɔ ki yiŋɛ, isak kɛ Yesɔ ne zhi kɛ ngɔŋ. Anuŋ adi, <<Yɔɔna ne su aneshir ne lu ne bɛ, waŋa yi ki yiŋ ndi kiki yi vuŋ anu zen na.>>

15 Anuŋ adi, <<Ayi Iliya.>>

Anuŋ adi <<Ayi ine bla shar yi Arik, ne min kɛ abɛ bla lɛ kɛ Arik kukub.>> 16 Fe ndi Hiridus ne wɔ mee, adi, <<Yɔɔna, waŋ ndi mne duŋ akyaŋ tu maa, ayi wa ne lu ne bɛ!>>

17 Hiridus ne tu maa ne nek anu te di abɛ vuŋ Yɔɔna, te wa abɛ kpau te ku ne jaru. Ne na me ne tu yi Hirudiya, iwa zumen Filibus waŋ ndi ne tau. 18 Yɔɔna ne mǝne bla Hiridus te di,<< Ba ne rɛ te abɛ ta Iwa zumen ba.>> 19 Fe hirudiya azǝn Gli Yɔɔna ne susun te wɔb ankɔŋ ane ŋunu. Ama bane yik ankɔŋɔ ba, 20 te Hiridus aklu sisik Yɔɔna te zen kamu zǝk, ne zhi ayi ner ne klu sisik Arik te na yi ner tsetser. Ndi Hirudus ne wɔ lɛ kɛ Yɔɔna ayi ne mɔ, susun maa ne cɔk la; neme ne wɔb te wa abɛ wɔu.

21 Ndi mkpaŋ ne te. Iber yi ŋli maa ne kam nyɛ Hiridus ne naa atum angɔŋgɔŋ ben amɔtsɔtsɔb ben angɔŋgɔŋ aneshir abɛ Galili igyaŋ. 22 Ndi va Hirudiya ne yir te glu, ne duŋ susun kɛ Hiridus ben angɔŋgɔŋ aneshir anyɛr.

Itum adi vǝnwama, <<Ben me iki yiŋ ndi uwɔbǝ, M tei nǝgu neyi.>> 23 Anegu anu te sherim, <<Iki yiŋ ndi utǝ wɔbǝ me tei nǝgu yi kɔ ate yi ndi ayi ŋa ikɔb kǝ gli muŋ.>>

24 Vǝvǝn iwa ma aru te di yaa maa, <<Mǝ ben anii?>>

Atanyeu ma te di,<<Itu kɛ Yɔɔna ne su aneshir.>>

25 Aŋur akam andanda ate yik itum te di: <<Mǝ wɔb te ubǝ nǝm itu Yɔɔna ne su aneshir ne miŋ agbǝgba.>>

26 Susun kɛ itum ne cokla, ama arim ayiŋ ndi ne shei bǝn angɔŋgɔŋ abɛ gyaŋ maa bane tanyɛmɛ te wa abɛ yazhiu ma ba. 27 Andanda itum akɔ shar ne blɛu tedi abɛ kɔte gli itu kɛ Yɔɔna agli nyɛmɛ. Ineshire akɔ kɔmɔ, te kɔte kyaŋ tu Yɔɔna ne jaru, 28 akɔte gli tu kɛ Yɔɔna te nyɛ ne agbǝgba. Itum ata kɛ anǝk va maa, ivǝnwa ma ata kɛ anǝk iya maa. 29 Ndi abɛ zǝ Yɔɔna na ndum ne wɔ mee, anyɛ baŋ ikum maa akɔte ru ne amkpa ane ru akum.

30 Abɛ zǝ Yesɔ tsin ne ŋur akam aya yaa te nyɛ kamu azǝk ne tsutsu te blau ki yiŋ ndi aba nenai ben yiŋ ndi aba ne tsarǝ 31 Fe, aneshir tetɛk azǝn nyɛ te kɔmɔ ba yik mkpaŋ kɛ li ki li ba,Yesɔ adi ba, <<Nyɛ zhin bene bɛm ne tu min ne amkpa ane yaŋ ya atɔŋ ne zizik te sɔŋ sik zhin.>>

32 Ankyak akɔ te yir igu ne tu men te kɔmɔ ne amkpa awaŋ ndi aneshir ba yime ba. 33 Ama aneshir tetɛk ndi ayik ba zhi aneshir aklu ne za a rɛ ntuntun te ku ba ti. 34 Ndi Yesɔ ne yir te yik ntsan aneshir, ne wɔ lɔ susun mǝne, ayi ndi awanta abaŋ ndi ba yi ne iner ne kyu ba ba. Fe akɔ vuŋ tsar ba ikiki tetɛk.

35 Nǝ mkpaŋa arik neka ku, fe abɛ tsene maa ne anyɛ bene bɔu. <<Amkpa waŋa ayi zizik, arik ne ka ku. 36 Duŋ aneshir akɔmɔ te gar ntuntun iyi gbahir te yir miŋ ntun te lɛb atu amen kili.>>

37 Ama a tanyɛme te di, <<Nek zhine ba kili.>>

Adiu te di, <<Iyiŋ ndi atei ŋun azɔb ayi mla ya neshir ne na ndum ndi tei yi ihwa tender! Te ta bǝ ŋlɔk azɔb ne ki li te nek ba ta li?>>

38 Yesɔ arib <<Ambwab borodi aben ayi ben abɛ zhin?>> <<kɔte tɔ zhin>>

Ndi ne kɔte tɔ, adi, <<Ambwab borodi atuŋ ben ambɛ ayaa.>>

39 Fe Yesɔ adi ba abɛ duŋ aneshir bɔbɔk abɛ zǝ sɔŋ ntsetsen ne agǝga ashushu. 40 Ankyak ne sɔŋ ntsǝtsen anuŋ amkplik azhi zhiin anuŋ sɔk tutuŋ 41 A baŋ ambwab borodi atuŋ ben ambɛ yaa te lɛge agli tɔ gbarshu, te nyer Arik te muŋ mbwab borodime. Fe te nek abɛ tsene maa ne ti kɛ aneshir. Yesɔ ne gab ba ambɛ amɛ ayaa ma bɔbɔk. 42 Ne li bɔbɔk mǝne te hri, 43 ankyak abɛ tsin amaa ne vu sisa amɛ wur ane yaa te vu nki borodi ben ambɛ me. 44 Idu alulum abaŋ ndi ne li kili me ne yi azhin atuŋ.

45 Andanda Yesɔ ne duŋ abɛ tsene maa ayir igu te kuti akɔmɔ ne Batseda, teshe duŋ aneshir a kɔmɔ. 46 Ndi Yesɔ ne duŋ ba, ne yuŋ tu gbu te ben Arik.

47 Ndi amgbalu neka te, igumɔ iyi ne atsutsu nek, Yesɔ ayi ne tu gbu iwa kiki maa. 48 Yesɔ ayik abɛ tsene maa azǝn yik iya ne den gumɔ, nguŋgu zen te zor ben abɛba. Nǝ agbak atuk nyɛ ŋan bɛr Yesɔ aru te gar ben abɛba. Nǝ na ndi atei gayir te duŋ ba, 49 ama ndi ne yik Yesɔ ne tsǝtsen ne amashir, ayik te di ayi ner ne ku ru akɔ zhɔk tsaŋ, 50 bɔbɔk mǝne ne yigu sisik ne te ba.

Anama lɛ bene abɛba te di, <<Vuŋ zhin susun! Ayi Nga. Duŋ te zhin sǝsǝk ba.>> 51 Fe Yesɔ akɔ yir miŋ igu ben abɛba, ngugumɔ iku zǝ kur. Bɔbɔk mǝne ne vuŋ anu, 52 bane zhi kiki yi mbwab borodi ba; asusun amene ne kpa ate amimin.

53 Ndi ne glɔ, ne yir Jenisara te kpa gumɔ aŋyak ne kɔtɔŋ nek. 54 Nak ru men ne gumɔ, aneshir akɔ tɔ Yesɔ azhi. 55 Ne klu zǝ ntuntun, te zen vu aner abɛ lɔ ne atakpa amen te gar amkpa waŋ ndi ate wɔ Yesɔ ayime. 56 Ankyak amkpa awaŋ ndi ate garu, ne miŋ ntun, bǝn tun vǝtsɔb aneshir avu abɛ lɔ azeshur ne amkpa ne li dub. Te zen benu abɛ duŋ ba asak aŋɔk ne ŋa anklu maa, abaŋ ndi sagu aŋɔk ne rɛ.