1 Fe Yesɔ ne duŋ amɔ te gar ntun yi Yahudiya ne goŋ nek ne Urdu. Ntsan aneshir nena nyɛ ben abɔu, nena tsar ba, ir keŋ ndi abɛ nama.

2 Ane Ferisawa nuŋ ne nyɛ bǝn abɔu te tsa ru tɔ te di, <<ire te lulum abɛ kyak iwa mai?>>

3 Yesɔ adi ba, <<Musa ne cɛr zhin te di kikinǝ?>>

4 Adi, <<Musa ne tanyɛmɛ te lulum abɛ cɛr mplɛ kɛ kluk nŋa anǝk iwa maa te yaru.>>

5 Yesɔ adi ba ayi klik atu min waŋai ki ndi Musa ne bla zhin ilɛ kǝ kpa nyak amɛ. 6 <<Ama ne kuti Arik ne <na lulum ben iwa.> 7 <Neme lulum atei duŋ tetɛɛ amaa ben iyah amaa te ama yaŋ ben iwa maa, 8 iyah mǝne atei yi kpa zhiin.> Neme ba yi akpa ayaa ba ama ikpa zhiin. 9 Neme iki yiŋ ndi Arik ne biŋǝ, kǝr inuŋ abɛ klugǝ ba.>>

10 Ndi neyi ne kɔbɔ, abɛ tsene maa aribu ilɛ kǝŋe. 11 Adi ba, <<Waŋ ndi ate kyak iwa maa tǝ ta nuŋ ne la lɛ kǝ ze amba ben iwa amaa. 12 Ate yi ndi iwa ate kyak lu maa te ŋa nuŋ, ne la lɛ kǝ ze alulum.>>

13 Aneshir azǝn gli Yesɔ amumun amuotsɔtsɔb te abɛ sak ba aŋɔk, ama abɛ tsene amaa ne tsaŋ ba. 14 Ndi Yesɔ ne yik amɛ, ne te mfu. Adi ba, <<Duŋ zhin amumun amuotsɔtsɔb anyɛ bǝn abɛm, kǝr zhin bǝ yar ba, te ikɔb kǝ Arik yi ir mǝne. 15 Mbla zhin lɛ didik, waŋ ndi ba te ta Arik ndi amumun amuotsɔtsɔb abaŋa ba batei yir kɔb Arik ba.>> 16 Ankyak Yesɔ avu amumun ne agli ne asa amaa te nek ba anu didik.

17 Ndi Yesɔ ne atsǝnetsǝn ne ankɔŋ, iner ne yi ne adudunki nuŋ aklu nyɛ zhaku ne aza amaa. Aribu te di, <<Ine Tsar didik,>> <<M tei na anii tem yik ivli kǝ yaŋ klɛtu?>>

18 Yesɔ adiu, <<Uzhɔm te ne tsar didik te nii?>> <<Nǝ tsar didik ba yime ba, Arik wa ankyak ai nǝ Tsar didik. 19 Une zhi icɛr yi Musa ne di: <Kǝr ubǝ ŋun neshir ba, kǝr ubǝ ze amba ba, kǝr ubǝ zhib ba, kǝr ubǝ timu ba, kǝr ubǝ kyer iki yi nuŋ ta ba, ubǝ nek tetɛɛ mi ben iyah mi ngoŋ men.>>>

20 Neshire adi, <<Ine Tsar,>> <<Mne na kiki yiŋɛ bɔbɔk mdi ne nak ri yi vǝvǝn vǝtsɔb.>>

21 Yesɔ ne tɔu te nyeru, te diu, <<Iki zhin ba une zen nai ba,>> <<kɔte vu adudunki yiŋ ndi uyime neyi lɛb bɔbɔk te nek abɛ yaŋ iki, te utei yi ne adudun ki ne gbarshu. Fe te kam nyɛ zǝm.>>

22 Ndi neshire ne wɔ amɛ azhizhi ne ku. Nǝ kama tibɛ te kpa ti te tǝ mfu, tǝ wa ayi ne adudunki.

23 Yesɔ ne kama tɔ abɛ tsene maa te di, <<Itei lɔ te neyi ne adudunki abɛ yir kɔb Arik!>>

24 Abɛ tsene maa asak aŋɔk ne anu ne iki yiŋ ndi Yesɔ ne blai. Ama Yesɔ ne na di ba, <<Amumun amuŋ, kɔb Arik ilɔ yir! 25 Itei yi tatak te lakurmi abɛ yir mblu alura inaŋ ne adudunki abɛ yir kɔb Arik.>>

26 Abɛ tsene maa ne vuŋ anu ngɔŋ, te di akpa men, <<Te iŋɔwa atei yik ita zhɔk!?>>

27 Yesɔ atɔ ba te di, <<Bǝn ineshir itei lɔmɔ, ama ba ben Arik ba; kɔte anii itei te ben Arik.>> 28 Biturus adi Yesɔ, <<Ta ne duŋ ikiki bɔbɔk te zeu!>>

29 Yesɔ adi, <<Mbla zhin ilɛ didik,>> <<Iwaŋ ndi ne duŋ kɔb maa ka zumen ka ai va men ka ai iya maa ka ai tetɛɛ maa ka ai amumun amaa ka ai ahwaŋ amaa ne sak kɛ lɛ didik kɛ Arik 30 te ba atei ta idǝk kɛ naŋ amkpaŋ amkplik azhin ne kab kǝŋe (ka ai akɔb, amunzu, amunva, aneyaa, amumun ben ahwaŋ, neme bɔbɔk, ina yik iya) bǝn mkpaŋ kɛ nyɛ, atei yik ivli kɛ yaŋ klɛtu. 31 Ama aneshir tetɛk anuŋ abɛ kuti atei yi abɛ klɛtu, abɛ klɛtu atei yi abɛ kuti.>>

32 Nǝ yi ne ankɔŋ ne gar Urshelima, Yesɔ ne kuti mǝne, abɛ zeu tsin amaa ne sak aŋɔk ne anu, aneshir abaŋ ndi ne zǝ ba ne te sisik. Ankyak Yesɔ ne na Gli abɛ zeu tsin amaa te gar kɔnsa te bla ba iki yiŋ ndi itei vuŋ wa. 33 Yesɔ adi ba, <<Ta gar Urshelima, atei vuŋ Izu Neshir alɛb ngɔŋ ine na ndum kǝ Arik ben abɛ tsar cɛr yi Musa. atei teu ambuk ayi ku te baŋu anǝk abaŋ ndi ba yi ŋli kɛ Yahudawa ba, 34 atei zhabu, te ruk ante shuru, te tsǝgu, te ŋunu. Iber tar te gayir atei lu.>>

35 Ankyak Yakubu ben Yɔɔna, amun Zebɛdi, anyɛ ben Yesɔ te di, <<Ine Tsar,>> <<ta wɔb te ubǝ naa ta bɔbɔk iki yiŋ ndi ta benu.>>

36 Yesɔ arib ba te di, <<izhin wɔb tem naa zhin anii?>>

37 Adi Yesɔ te di, <<Duŋ izhin ne miŋ mɔr abɛ sɔŋ ne ŋɔk li mi te izhin abɛ sɔŋ ne ŋɔk mla mi ne bɛr nek ngɔŋ mi.>>

38 Yesɔ adi ba, <<Ba zhin ne zhi iki yiŋ ndi izhin wɔ bǝ ba, izhin tei ya so ne kparantse keŋ ndi msomɔi, ka izhin tei ya su amashir awaŋ ndi me su newumɔi?>>

39 Adiu, <<Aba atei yaa maa.>> Yesɔ adi ba, <<Izhin te so ne kparantse keŋ ndi me so te su ne amashir awaŋ ndi me sumɔ ne wu, 40 ama isɔŋ ne ŋɔk li muŋ kɔ ŋɔk mla muŋ ba ayi nga wa M tei nek zhin ne kǝ ba. Mkpǝmkpa yiŋɛ iyi iye abaŋ ndi ne ka nai aŋyak ba.>>

41 Ndi nki awur abɛ zeu tsin amaa ne wɔ lɛ kǝŋe, ne te mfu ben Yakubu ben Yɔɔna. 42 Yesɔ ne zhɔ ba abiŋ tedi ba, <<Izhin ne zhi abaŋ ndi ayik ba ashak ayi ndi abaŋ ndi ba yi ŋli kɛ Yahudawa ba, angɔŋgɔŋ amene atsar ba mgbyamgbyaŋ. 43 Ba yi amɛ bǝn abɛ zhin ba. Neme, iwaŋ ndi awɔb te wa abɛ yi ŋgɔŋ ne miŋ min abɛ na tu maa ate igɛn, 44 iwaŋ ndi awɔb te wa abɛ yi ne kuti abɛ yi igen amin bɔbɔk. 45 Tǝ ba Izu Neshir bane anyɛ te bɛ zekuru ba, ama ne nyɛ te bɛ yi igen, te bɛ na nek susun maa te bɛ nek ba ivli te ta aneshir azhɔk.>>

46 Ankyak ndi ne nyɛ Jerikɔ. Ndi Yesɔ ben abɛ tsene maa, ben ntsan aneshir, a duŋ ntuno, Bartimawus ine amfik, (ndi, ayi zu Timawus), ne kɔsɔŋ aben ki ne kɔtɔŋ ankɔŋ. 47 Ndi ne wɔ adi ai Yesɔ awɔnǝ Nazara, akɔ te ahwa te di, <<Yesɔ, Izu Doda, lɔ susun muŋ!>>

48 Aneshir tetɛk atsaŋu te diu abɛ ku anu, ama akyak te te ahwa ngɔŋ te di, <<Izu Doda, lɔ susun muŋ!>>

49 Yesɔ agbur aklɛ te di, <<Zhɔzhin ne wu.>> Ankyak abɛ tsene maa azho ner ne amfik ge te diu, <<Sɛr nyak! Nǝ aza mi! Yesɔ azhɔu.>> 50 Ankyak iner ne amfik ge atyak anklu kɛ ku mvlu maa azhɔk, te tuk ne aza amaa te nyɛ ben Yesɔ.

51 Yesɔ adiu, <<Uwɔb te bɛ nau anii?>>

Iner ne amfik ge adi, <<Ine Tsar, mwɔb tem yik amkpa.>>

52 Yesɔ adiu, <<Tsin kɔmɔ, itanyɛmɛ mi ne duŋu rɛ.>> Nǝ amkpamkpama ayi ner ne amfik ge abu te zǝ Yesɔ akɔmɔ.