1 Nǝ bɛr yuŋɔ ntsan aneshir anuŋ ne biŋ, ba yine kinuŋ yi li ba, Yesɔ azho abɛ tsene maa te di, 2 <<M lɔ susun kɛ aneshir baŋa; ne ka te bɛr tar bene bɛm iyaŋ kili. 3 Mte di abɛ kɔmɔ ne kasa ate ku mfɔ ne ankɔŋ, anuŋ ne miŋ mǝne are amkpa gbagbaŋ.>>

4 Abɛ tsene maa mtanyeme, <<Nǝ zizik kǝŋe atei yik kili yi mla yɔk aneshire abaŋa yi?>>

5 <<Izhin yine ambwab borodi?>> Yesɔ arib.

<<Me taŋgba,>> a tanyɛu ma.

6 Yesɔ adi ntsan aneshire abɛ zisɔŋ ne mimi. Ndi ne baŋ ambwab borodi me taŋgba ma te nyɛr, ne mligǝ te nek abɛ tsene maa te abɛ nek aneshire, ana kɔ na mee. 7 Ayi ne amwe ambɛ watsɔb fe Yesɔ abaŋǝ te nyer te nek abɛ tsene maa abɛ ta gab zhine ba. 8 Aneshire ne li te hri. Ankyak abɛ tsǝn ama ne biŋ nki kili me isisa taŋgba ndi ne li te duŋ kime. 9 Aneshir abaŋ ndi ne yi amɔ ne yar azhin anas. Fe Yesɔ adi abɛ kɔmɔ, 10 Yesɔ akɔ yir miŋ igu bǝn abɛ tsene maa te kɔmɔ na gar kɛ Dalmanuta.

11 Ferisawa ne nyɛ te rib Yesɔ kiki nuŋ te bɛ tsa ru tɔ. Tǝ abɛ nek ba ngir nuŋ kɛ rɛ gbarshu. 12 Yesɔ avuŋ vli gli gɔŋ te di, <<Ayi nii duŋ kab kǝŋe awɔb te aba yik kiki yi vuŋ anui? Mǝ bla zhin lɛ didik, ba ngir keŋ ndi ate nek zhin.>> 13 Fe Yesɔ aduŋ ba, te yir gu te glɔ kɔmɔ ne gar nuŋ.

14 Abɛ tsǝn amaa ne ŋuro suk ne gli kili, anaga yi mbwab kili zhin yi ben abɛba ne gumɔ. 15 <<Izhin bǝ te zǝ,>> Yesɔ agbaŋ ba atɔŋ. <<Izhin bǝ hria ayi te tɔ mbumbur atuntu ane Ferisawa ben ayou Hiridus.>>

16 Ne lɛ kiki yiŋɛ ne akpa mɛn te di, <<Ayik ba ta yine borodi ba.>>

17 Ndi ayi ne miŋ kɛ lɛ ne akpa mɛn, Yesɔ arib ba: Ayi anii duŋ zhin di borodi ka? Ba zhin yik te na zhi kai? Asusun min ne kpa kai? 18 Izhin yine ayi ama ba zhin yik ba ben atɔŋ ba zhin wɔ ba? Ba zhin shuzhi kai? 19 Ndi mne mlik ambwab borodi tuŋ nek aneshir azhin atuŋ, neyi sisa ben ne zhin ne vu nkime?>> adi,

<<Iwur ane yaa,>>

20 <<Ndi mne mlik ambwab borodi ataŋgba m gab aneshir azhin anas, neyi sisa ben zhin ne vu nkime?>>

Mtanyeme,<<Itaŋgba.>>

21 Yesɔ adi ba, <<Har azǝzaŋa ba zhin shuzhi kai?>>

22 Ndi ne yir Batseda, aneshir anuŋ agli iner ne amfik te nyɛ te ben Yesɔ te abɛ sagu ŋɔk 23 Yesɔ ne vuŋ ŋɔk kɛ ner ne amfik ge te ru goŋ ntun. Ndi ne ruk ante ashuru ne ayi amaa te sagu ŋɔk, Yesɔ aribu,<<Uyik kinuŋ?>>

24 Atɔ shu tedi, <<Myik aneshir; ama ayi ndi atiŋe ankunkun atsǝnetsǝn.>>

25 Yesɔ ana sak iner ne amfik ge ŋɔk neyi amaa. Fe abu ayi amaa, iyik maa ku kam nyak, ankyak akɔ yik kɔte nii glaŋglaŋ. 26 Yesɔ adiu abɛ kɔmɔ ne kɔb, <<kǝr bǝ yir ntun nuŋ ba.>>

27 Yesɔ ben abɛ tsene maa ne gar ntuntun yi Kaseriya Filibi. Ne akɔ arib ba, <<Aneshir adi myi ŋɔwai?>>

28 Mtanyɛmɛ tedi, <<Anuŋ adi Yɔɔna ne su aneshir; anuŋ adi Iliya; anuŋ adi izhin ne miŋ abɛ bla shar yi Arik.>>

29 Arib ba. <<Fe izhineba fa?>> <<Izhin di myi Ŋɔwai?>>

Biturus mtanyeme, <<Uyi kristi.>>

30 Yesɔ ne gbaŋ ba atɔŋ kǝr abɛ duŋ bla nuŋ kinuŋ ne tu maa ba.

31 Fe Yesɔ avuŋ tsar ba te di Ivǝn Neshir atei yik iya ne kiki tetɛk anunkub atei na kyagu, ngɔŋ ne abɛ na ndum ne akaba bǝn abɛ tsar cɛr yi Musa atei ŋunu ne goŋ kɛ bɛr yi ntar atei na lu. 32 Yesɔ ne lɛ ki yiŋɛ aglɛ rumɔ, ankyak Biturus agliu te ru kɔnsa te atsaŋu.

33 Ama ndi Yesɔ ne kama tɔ abɛ tsene maa, atsaŋ Biturus. <<Kam tibɛ, shetan!>> Adi. Ilɛ kǝ susun mi ba rɛ bǝn Arik ba, anaga yi kiki yi aneshir.>>

34 Fe azho ntsan aneshire ben abɛ tsene maa te di: <<Waŋ ndi ate di wa atei zǝm abɛ kyak tu maa te baŋ mkpɔk nkunkun kǝ gen maa te zǝm 35 Iwaŋ ndi ate di wa atei na ivli maa aŋyak ba tei yik kɛ ba, ama waŋ ndi ate kyak vli maa ne tu muŋ bǝn ilɛ didik kǝ men ne ta kǝ azhɔk. 36 Ayi ki didik tayi ndi neshir atei yik adudunki iyi gɔnmimi te suk ivli maa? 37 Aye anii neshir atei nǝge tǝ ta ivli maa zhɔk? 38 Iwaŋ ndi ate shisha yi bla lɛ muŋ ne kab keŋ ndi ne kam goŋ anem te na zumimin, Ivǝn Neshir atei te shisha maa ndi ate nyɛ ne ngɔŋ kɛ Tetɛɛ maa bǝn abɛ shar ayou Arik abɛ yi tsetser.>>