1 Fena ndi muɔ bɛr ne te, fe Yesɔ akama kɔmɔ ne Kafanahum, ankyak aneshir ne yik tedi ne ka kama nyak kɔb. 2 Ndi amɛ aneshir tetɛk akɔ tuŋ abiŋ te iki kɛ baŋ ba bɔbɔk ba yime ba, te ben abɛ klɛ ne abɛm ne anɔkɔŋ, fe Yesɔ adu lɛ didik kɛ Arik. 3 Aner anuŋ ne gli ine lɔ waŋ ndi ŋa kpa maa ne ku aner anas ahruu. 4 Ndi bane yik amkpa ane gliu yire ba ne idu aneshir, akɔ baŋu te yuŋ tu adǝdak ayi miŋ kime te rus kɛ te baŋu ne ririk abiŋ ne ki kur maa asu azhɔk anenen ne amkpa awaŋ ndi Yesɔ ayime. 5 Ndi Yesɔ ne yik itanyɛmɛ men, akɔdi ne lɔmɔ, <<Vǝvǝn, ne zugu zhɔk ne zumimin mi.>>

6 Fena anuŋ abɛ tsar nkanlɛ yi cɛr Musa akɔsɔŋ ne amkpama, alɛ ne susun ne akpa mɛn te di, 7 <<Anii duŋ ineshir waŋa alɛ mei? Alalɛ kɛ yiŋ Arik! Ai ŋɔwa ne amla ne zugu zhɔk ne zumimin mba Arik wa kiki maa ka?>>

8 Andanda Yesɔ akɔ zhi ne susun maa te waŋa ayi iki duŋ ba alɛ ne susun amene, ankyak Yesɔ akɔ diba, <<Izhin lǝlɛ kɛ anii ne iki yiŋɛ? 9 Itayi naŋ: te abɛdi ine lɔ ku ŋa kpa, <Ne zugu zhɔk ne zumimin mi, kɔ abɛ di, <Lu, baŋ atakpa mi te tsǝn? 10 Neme te izhin bɛ zhi te Izu Neshir ayi ne mgbyamgbyaŋ ne gɔnmimi kɛ zugu zhɔk ne zumimin.>> Yesɔ adi ne lɔ ŋa kpama, 11 <<Mdiu, lu, baŋ ki kur mi te kɔmɔ.>> 12 Akɔ lu, abaŋ ki kur maa te agar aru ne ayi amen bɔbɔk. Iyiŋɛ ne duŋ aneshir asak aŋɔk nenu te gbar Arik sak, tedi, <<Bata ne zen yik ikinuŋ ndi iyiŋɛ ba!>>

13 Yesɔ nena ru akɔmɔ ne kɔtɔŋ lelɔ nek. Idu aneshir ne zeu agar, akɔ vuŋ tsar ba. 14 Ndi ne duŋ ba teyi kiki maa, ayik Lawi izu Alfa akɔsɔŋ ne vǝn iki kɛ ta gendu. Yesɔ akɔ diu, <<Lu zǝm,>> fe Lawi akɔ lu te zeu.

15 Ndi Yesɔ ne zen li ikili ne kɔb kɛ Lawi, aneshir abɛ na ndum ta gendu bǝn <<abɛ na zumimin>> azǝn li kili bene bɔu ndɔ ben abɛ tsene maa bǝn aneshir tetɛk abɛ zen zeu. 16 Abɛ tsar cɛr iyi Musa abaŋ ndi ntsan Ferisawa anuŋ ayik Yesɔ azǝn li kili ben <<abɛ na zumimin>> bǝn abɛ ta gendu, arib abɛ tsene maa: <<Anii duŋu zhiin li kili ben abɛ ta gendu te vuŋ abɛ na zumimin?>> 17 Inak wɔ iyiŋɛ, Yesɔ akɔ diba, <<Bai ner ne ikpa keke wa awɔb ner ne nek kǝka ba, ayi waŋ ndi alɔ. Bam ne nyɛ zhɔ abɛ tsetser ba, ama abɛ na zumimin.>>

18 Ne mkpaŋ nuŋ abɛ tsene abɛ Yɔɔna tsen bǝn Ferisawa ne kpa anu. Aner anuŋ ne nyɛ te rib Yesɔ, <<Anii iyi duŋ abɛ zǝ Yɔɔna tsǝn ben Ferisawa akpa anu, ama amie ba akpa anu kai?>> 19 Yesɔ adi ba, <<Aner abaŋ ndi igyaŋ iyi ne kɔb men ai na kikin te kpa anu ndi ne ta iwa ma ayi bene ba ne amkpa ne kpa ŋama? Bai te ba, ire mkpaŋ keŋ ndi atei yi bene ba. 20 Fena mkpaŋ tei nyɛ ndi atei baŋ ne ta iwa ma agli atibe bene ba, fe ne bǝn atei ka kpa anu.

21 <<Ba nuŋ atei gbu anklu ayayas aŋa te ahwɛn anyaŋ biŋ bǝn acicɛ anklu ba. Ate na amɛ, ŋa yaya sa itei gbaŋ ciceme gbuŋa, igbuŋa maa itei yi mimin. 22 Neme inuŋ batei shur ancen ayayas ne cice gwara ba. Ate shurɔ, acɛ nɛ atei wun teduŋ gwarama alakakna aŋar, fe iya mǝne atei var ahrie igwara ma iteina gbuŋa. Ashur ama ayayas ne kǝken yayas.>>

23 Nǝ bɛr yi sɔŋ sik nuŋ Yesɔ agara zǝ ahwaŋ ndi ne tib alikama, abɛ tsene maa atsǝne zeu, akɔ mlik atɔ nuŋ. 24 Ferisawa akɔ diu, <<Tɔ, ayi nii duŋu abɛ tsene mi ana ki mimin yiŋ ndi iglak ilɛ kɛ cɛr yi Musa ne bɛr yi sɔŋ sik?>>

25 Yesɔ asaga, Ba zhin ne wɔ iki yiŋ ndi Doda ane nai ben abɛ tsǝn amaa ikasa ne vuŋ ba te ne wɔb kili ka?

26 Nǝ mkpaŋ kɛ Abiyata ngɔŋ ine na ndum kǝ Arik, ne yir min akabankɔŋ ayou Arik tǝ ta borodi tena nek abɛ tsǝn amaa, irkeŋ ndi imenyi ana ki mimin kɛ abɛ na ndum ne akabakɔŋ ankyak.>> 27 Tena diba,<< Nena neshir iber yi sɔŋ sik, ba nena bɛr yi sɔŋ sik netu ayi ineshir ba. 28 Fena Izu Neshir ayi Ŋgɔŋ netu ayi bɛr yi sɔŋ sik.>>