1 Amblimblɛ bib, ngɔŋ ine na ndum kǝ Arik, bǝn anunkub, ben abɛ tsar Atɔra ben bɔbɔk Abɛ te ambuk neka kpa lɛ. Nǝ kpa Yesɔ, te gliu aru agar asak Bilatus ne aŋɔk. 2 Bilatus aribu <<Ayi uwa uyi itum ayou Yahudawa mai?>>

Yesɔ adi ba, <<E, ubla anenen,>> 3 Ngɔŋ ine na ndum kǝ Arik agbib bu te aba abɛ vuŋu ne lǝlɛ tetɛk. 4 Fe Bilatus atara na rib bu, <<Bau lɛ kai?>> Bau wɔ ba alɛ mbumbur alɛ tetɛk ne atu ami ka?>>

5 Yesɔ akyak sak ba ilɛmɛ, fe Bilatus akɔ vuŋ anu.

6 Iki yiŋ ndi anai ne mkpaŋ kɛ igyaŋa aneshir ate ben te abɛ zhɔk ba ner nuŋ ne kur ne jaru akɔ zhɔk ba anewu 7 Ner nuŋ ndi azhɔu te Barabas ane kukur ne jaru ben anuŋ ndi ne aŋlɔk aneshir. 8 Ntsan aneshir anyɛ te di Bilatus abɛ na aba iki ndi abene anai. 9 Bilatus adi, <<Izhin di mbǝ nzhɔk zhin itum ane Yahudawa waŋai?>> 10 Ne men azhi tedi ngɔŋ ne abɛ na ndum kǝ Arik ne ka men baŋ Yesɔ asak wa ne aŋɔk te ate ankiki. 11 Fe ngɔŋ ine na ndum kǝ Arik akɔ shɔk aneshir te abɛ di Bilatus abɛ zhɔk Barabas

12 Bilatus arib ba. <<Nga mna kikin, ben waŋ ndi izhin zhɔu te itum ane Yahudawa ma?>>

13 Ate ahwa, Kpaŋ zhi ne wu ne nkunkun!>>

14 Bilatus arib ba, <<Tei ni? Ne lalɛ anii?>>

Atana te ahwa, <<Kpaŋ zhin ne wu ne nkunkun kɛ gen!>>

15 Bilatus akɔ zhɔk ba Barabas te wa abɛ sik ntsan aneshire asusun. Akɔ duŋ ashur Yesɔ tsik, te avuŋu anab anǝk ba abɛ akpaŋu ne nkunkun kɛ gen.

16 Abɛ kpaakpa ma akɔ vuŋ Yesɔ te kɔmɔ ne amkpa ane te ambuk ne akaba ayou itum te zhɔ bɔbɔk abɛ kpaakpa abiŋ amkpa azhiin. 17 Akɔ baŋ anklu alɛlɛ didilim ake su itum asuu, tena nyɛn itu anku kɛ ncoŋ te abaŋ kɛ asuu nǝ tu. 18 Tǝ akɔ agbaru asak ayi nyak, <<Tɔ zhin itum anǝ Yahudawa!>> 19 Te klɛ te zen mligu tsik nǝ mkpɔki nǝ tu. Te tar agbarum te agbaru asak ayi mu. 20 Ndi ne zhabu aklɛ, fe akɔ tun anklu didilim te kam anklu amaa asuu. Fe akɔ gliu te kɔmɔ ne amkpa ane kpaŋu ne nkunkun kɛ gen.

21 Awɔ ne Kurane, Siman, Tetɛɛ ma Alikzanda ben Rufus, ne agar atsǝn are min ntun, Akɔ sagu ne mgbyamgbyaŋ abɛ baŋ mkpɔk nkunkun kǝ gen kǝ Yesɔ. 22 Agli Yesɔ te nyɛ amkpa ndi azhɔu te Golgota (amkpa ne akpukpotu). 23 Fe akɔ nǝgu amashir mwamwaŋ ben anǝlik, akyak sou. 24 Akɔ kpaŋu ne nkunkun kɛ gen. Te vu iki yi su maa gbuŋa agab, te ashur ankeŋkam te kɔte tawa abɛ zhi iki ndi iwa atei baŋ. 25 Ne kpaŋu ne nkunkun kɛ gen ne kab arik. 26 Ne cɛr lalɛ ma akpaŋ ne nkunkunɔ tedi: <<WAŊA AYI ITUM ANE YAHUDAWA.>> 27 Ne na kpaŋ abɛ zhib ayaa ndɔ ben abɔu, izhiin ni ŋɔk li maa, inuŋ ne ŋɔk mla maa. 28 Ilɛ kɛ Arik ne shaga 29 Aner abǝ gayir agar alɛ ne atu amaa, te azhaŋ atu amen yenu tedi, <<Haha! Iwa ndi udi utei zir akabakɔŋ te meu ne min kɛ bɛr tar, 30 ta tu mi zhɔk zi rɛ mkpɔk nkunkun kǝ gen!>>

31 Ngɔŋ ine na ndum kǝ Arik bǝn abɛ tsar Atɔra azhabu ne akpa mɛn tedi <<ne ta anuŋ azhɔk,>> te di, <<ama ba azhi ta tu ma zhɔk ba! 32 Duŋ zhin Kristi waŋa, Itum ne Isrela, zi rɛ mkpɔk nkunkun kǝ gen azizaŋa, te tabǝ yik te tanyɛmɛ.>> Abaŋ ndi ne kpaŋ ba ndɔmɔ ne zhabu tetɛk imenyi.

33 Ndi kab anzaŋ ne te akpa ne te bu gar yir kab arik. 34 Ndi arik ne kam aden Yesɔ azhɔk zhin tedi, <<Elɔi, Elɔi, Lama sabaktani?>> Ndi adi, Arik amuŋ, Arik amuŋ, aye nii duŋu kam goŋ nǝm?>>

35 Aner anuŋ ndi aklɛkli ne amkpama awɔ, tedi, <<Wɔ zhin, azho Iliya.>>

36 Ner nuŋ akɔ klu, agar abaŋ sɔsɔ asu ne amashir mwamwaŋ, te asuu ne tu mkpɔki, te anab anǝk Yesɔ tei abɛ so. Adi, <<Duŋ zhin newu. Tǝ tab tɔ ka Iliya atei nyɛ abaŋu agli azime.>>

37 Yesɔ aŋar kɔr te zhin, te zhɔk vli ma.

38 Mple anklu kɛ akabakɔŋ ne gbuŋa amplɛ aya rɛ tu gar shin. 39 Ndi ngɔŋ ne abɛ kpaakpa, aklikla ne ti kɛ Yesɔ, awɔ zhine te yik ndi azǝn gbaŋ iku, adi, <<Ner waŋa ai Izu Arik ilɛ didige!>>

40 Amba anuŋ aklɛkli shaan te zen klɔtɔ. Ne min mǝne ayi Meryamu Magadaliya, Meryamu iya maa Yakubu ambusher ben Yusuu, bǝn Solɔmi. 41 Amba abaŋa ne zǝ Yesɔ atsǝn are Galili tena bǝn lɔgu ma. Amba anuŋ tetɛk abaŋ ndi ne zeu are Urshelima ayi ne amkpama.

42 Ndi bɛr ŋan itei nyɛ iber yi sɔŋ sik. Amgbalu ne te 43 Yusuu ne Arimatiya, ngɔŋ neshir ne min mǝne, uwa maayi azǝn ŋub nyɛ kɔb Arik, ne gar ben Bilatus te abenu abɛ neg wa ikum kɛ Yesɔ. 44 Ikime ne nek Bilatus vuŋ anu ndi ne wɔ tedi Yesɔ neka ku. Azhɔ ngɔŋ ne abɛ kpaakpa te ribu ka Yesɔ ne men aku rɛ kukub. 45 Ndi ne awɔ are ben ngɔŋ ne abɛ kpaakpa ma tedi iyi amɛ, akɔ nek Yusuu ikumɔ. 46 Yusuu akɔ lɛb mplɛ anklu klikla, abaŋ ikumɔ aglɛ zǝme, te nyɛn kɛ aku ne anklu aklikla, te zhɔk kɛ ne min bɛ ndi ne ka kɛ ne min nkpaŋ. Tǝ atur nkpaŋ aku anu bɛmɛ. 47 Meryamu Magadaliya ben Meryamu iya maa Yusuu ne yik amkpa ndi ne ruu ma.