1 Ndi Yesɔ ne ru ne akabakɔŋ, izhiin ne miŋ kɛ abɛ tsene maa adiu, <<Ine Tsar! Tɔ, mkpaŋ goŋgɔŋ didik yiŋɛ dei! Tena tɔ sak aner abaŋa iya ngɔŋ ne imɛ didik yiŋɛ!>>

2 Yesɔ adiu, <<Izhin yik imɛ ngɔngɔŋ yiŋɛ?>> <<Mkpaŋ nuŋ ba tei sɔŋ netu kɛ nuŋ ba; kɔte tayi atei sei avar atyak azhɔk.>>

3 Ndi Yesɔ ne kɔ sɔŋ ne Igbu yi Zetun ndi atɔ kpa ben Akabakɔŋ, ane Biturus ben Yakubu, Yɔɔna ben Anduru aribu ne kɔnsa te di, 4 <<Bla ta, iki yiŋɛ ite na atentai? Anii itei yi ngir kɛ shak ikiki yiŋɛ?>>

5 Yesɔ adi ba: <<Izhin bǝ sɔŋ shur ayi te kǝr nuŋ bǝ lɔm zhin ba. 6 Aner tetɛk atei nyɛ ne sak muŋ, te di, <Aba ayi nga,> Te lɔm aneshir tetɛk. 7 Izhin tei wɔ lɛ kɛ ikum ben lǝlɛ yi kum, kǝr asusun amin abɛ lu aklɛ ba. Ikiki yiŋɛ itei na, ama iklɛtu ba ne zen nyɛ ba. 8 Ntun tei wɔb ntun ne akla, atum atei wɔb atum ne akla. Mimi tei jaŋ ne mkpemkpa tetɛk, ijɔŋ tei te. Waŋa ayi ndi iyah iyi kuti ne ŋli.

9 Izhin bǝ nak sɔŋ shur ayi. atei gli zhin te gar amkpa ane te ambuk ne akaba. Nǝ atu muŋ atei gli zhin te gar bǝn gomnoni bǝn atum te zhin bǝ bla ikinuŋ ne atu muŋ ne ti men. 10 Ama atei kuti adu ilɛ didik ne ntuntun bɔbɔk ne liŋ. 11 Ate yi ndi ate vu zhin te gar amkpa ane te ambuk, kǝr asusun amin abɛ cɔk ala ne atu ayi iki yiŋɛ ndi izhin tei blai ba. Izhin bǝ bla iki yiŋ ndi ne nyɛ zhin ne mkpaŋa, te bai izhineba lɛ ba ayi Izhu Tsetser.

12 <<Izumen ane nuŋ atei baŋ zumen alɛb te duŋ aŋunu, tetɛɛ atei na baŋ izu maa alɛb. Amumun atei na wɔb atetɛ amen ne akla te ŋlɔk ba. 13 Aneshir bɔbɔk atei kyak zhin ne atu ayi sak amuŋ, ama waŋ ndi ate kli mgbamgbaŋ atei yik ita zhɔk.

14 <<Izhin te yik <te ayak iki mimin ne amkpa waŋ ndi ba ne te ba, ine tɔ abɛ zhi, fe abaŋ ndi ayi ne ntun yi Yahudiya bɛ klu te gar igbu. 15 Waŋ ndi ate yi ne tu ki kǝr abɛ di wa atei zǝ te baŋ kinuŋ ne kɔb maa ba. 16 Waŋ ndi ate yi ne ahwaŋ kǝr abɛ di wa atei klu agar baŋ anklu ne kɔb ba. 17 Amba abɛ yi ne anɛ bǝn abɛ so amumun atei yik iya ne mkpaŋa. 18 Izhin bǝ ben Arik te kǝr iki yiŋɛ bǝ yi ne kus ba, 19 te ne bɛr yuŋɔ atei yik iya ngɔŋ ir keŋ ndi bane zen ayik ir maa ba ire mkpaŋ kaŋ ndi Arik ne na gɔnmimi, se azizaŋa, ba tei na yik ir maa ba gar klɛ tu gɔŋmimi. 20 Abɛ di ba Arik aduŋ ibɛre yi watsɔb ba, iner nuŋ bai bɛ lieru ba. Ama ne atu ayi abaŋ ndi Arik ne hria ba, Arik ne duŋ ibɛre bǝ te watsɔb. 21 Nǝ mkpaŋ yuŋɔ inuŋ ate di zhin, tɔ zhin, te Kristi me waŋ!> Ka, abɛ di, <Tɔ zhin, iyuŋ! Kǝr izhin bǝ tanyɛmɛ ba. 22 Te kristi abɛ timu bǝn abɛ bla shar yi Arik abɛ mu atei muŋ aru te na ikiki yi vuŋ anu te bǝ lɔm abaŋ ndi ne hria ba, te yi ndi tei te. 23 Neme izhin bǝ sɔŋ shur ayi; Mne ka bla zhin ikiki bɔbɔk andanda.

24 <<Ama ne bɛr yuŋɔ, ne iyah ndi ne yige,

<<<Arik ba tei laŋ ba,

Ihwa ba tei na laŋ ba;

25 Icinces tei zhaku rɛ gbarshu,

Ikiki yi gbarshu itei jaŋ.>

26 <<Ne mkpaŋ yuŋɔ aneshir atei yik Izu Neshir anyɛ ne akpa ne mgbyamgbyaŋ maa bǝn ngɔŋ maa. 27 Ankyak atei shar abɛ shar ayou Arik te tuŋ abɛ hria amaa abiŋ ire igar kɛ anzaŋ, amgbalu, ire ŋɔk li ben ŋɔk mla, ire iklɛtu gɔnmimi te gar klɛtu gbarshu.

28 <<Azizaŋa izhin bǝ tɔ zhi nkanlɛ ire bǝn itiŋ nglǝŋglǝ: Ate yi ndi amgbavu amaa te zu te anuŋ atɔ, izhin zhi te ikus yi gbahir. 29 Neme, izhin te yik ikiki yiŋɛ na, izhin bǝ zhi te mkpaŋ ne te gbahir, bǝn abɛta. 30 Mbla zhin lɛ didik, ikab kǝŋe batei gayir ba se iki yiŋɛ ne na. 31 Igbarshu bǝn gɔnmimi tei gayir, ama ilɛ muŋ ba tei gayir ba.

32 <<Ba nuŋ ndi ne zhi iber bǝn mkpaŋa ba, bǝn abɛ shar ayou Arik ne Gbarshu, ka ayi Izu maa, ama anak ayi Tetɛɛ wa ankyak. 33 Izhin bǝ sɔŋ shur ayi! te na sɔŋ tsitsir! Inuŋ ba ne zhi mkpaŋa ba. 34 Iyi ndi iner nuŋ ne gar tsǝn: Nǝ duŋ kɔb maa te baŋ kɛ asak agen amaa ne aŋɔk, kɔte ŋɔwa ne ndum keŋ ndi ne nǝgu ne kǝ, te di iwaŋ ndi aklɛ ne anɔkɔŋ abɛ shur ayi.

35 <<Neme izhin bǝ sɔŋ shur ayi te ba nuŋ ne zhi mkpaŋ keŋ ndi akiki ne kɔbɔ atei nyak ba, ka ayi amgbalu, ka ayi atsutsu bu, ka ayi mkpaŋ kɛ tuk agbak, ka amblimblɛ. 36 Ate nyɛ kpakar, kǝr izhin bǝ duŋɔ anyɛ yik zhin kukur na ba. 37 Iki yiŋ ndi mbla zhin, mbla kɔte ŋɔwa: <Sɔŋ shur zhin ayi!>>>