1 Ndi bɛr yi sɔŋ sik ne gayir, Meryamu Magadaliya, bǝn Meryamu iya maa Yakubu, bǝn Solɔmi, ne lɛb anyɛ ne ye mgbɔ shushum, te ba abɛ kɔte kin ikum Yesɔ. 2 Ne amblimblɛ bib bɛr yi sɔŋ sik, ndi anzaŋ asɔŋɔ ru, te sɔŋ agar ibɛmɛ 3 te rib atu amen te di, <<Ŋɔwa atei ŋli ta nkpaŋ atibe ne anu bɛmɛi?>>

4 Ama ndi ne lɛk ayi atɔ ibǝ me, te yik nkpaŋ, yiŋ ndi iyi ngɔŋ, ne ŋlǝi agli atibe. 5 Ndi ne yir min ibɛmɛ, ne yik ivǝnenzak nuŋ akɔ sɔŋ asu nklunklu klikla, te akɔ sɔŋ ne ŋɔk li, ankyak ate sǝsǝk.

6 Ivǝnenzak ga adi ba, <<kǝr zhin bǝ te sǝsǝk ba, izhin wɔb Yesɔ waŋ ndi ayi awɔnǝ Nazara, waŋ ndi ne kpaŋu ne kuŋkun. Nǝ ka lu! Ba yi ame ayaŋa ba. Tɔ zhin amkpa awaŋ ndi ne zhɔ gu ma. 7 Ama izhin bǝ kam kɔmɔ, te kɔte bla abɛ tsene maa bǝn Biturus, <atei kuu zhin ti te gar Galili. Izhin tei yigu amɔ, ir keŋ ndi ne bla zhine.>>>

8 Neme ne ri kpa bǝn sisik, amba ma ne ru ne bɛ kǝ Yesɔ ne tanyɛmɛ te klu akɔmɔ. Bane bla Biturus ka anuŋ ikinuŋ ba, te ate sisik.

9 Ndi Yesɔ ne lu amblimblɛ ne bɛr yi sɔŋ sik, ne muno ruu Meryamu Magadaliya, iwaŋ ndi ne Gli anerim amɛ taŋgba aglɛ rumɔ ne kpa maa. 10 Meryamu Magadaliya agar te te bla abaŋ ndi ne men yi ben Yesɔ ndi azǝn lɛn susun te na zhiin. 11 Ndi ne wɔ te Yesɔ ayime tsitsir te nena yigu, ba ne tanyɛmɛ ba.

12 Neme Yesɔ ne na munoru ne nkuŋkɔŋ tetɛk ben aneshir ayaa ne min mǝne ndi ne tsǝtsene kɔmɔ ne ntun. 13 Nǝ kɔmɔ te kɔte bla anki mǝne; ama bane tanyɛmɛ ba.

14 Nǝ gɔgɔŋ Yesɔ ne muno ruu awur ane zhin ndi ne zen li ikili; Ne gbaŋ ba atɔŋ ne yaŋ tanyɛmɛ men bǝn klik atu yi yaŋ tanyɛmɛ bǝn abaŋ ndi ne yik wa ndi wa ne lu.

15 Adi ba, <<kɔmɔ zhin ne gɔnmimi te du zhin ilɛ didik kǝ men bǝn aneshir bɔbɔk. 16 Iwaŋ ndi ate tanyɛmɛ te na duŋ asu atei lieru, ama iwaŋ ndi ba ne tanyɛmɛ ba atei ŋunu. 17 Ngir kǝŋe tei yi ben abaŋ ndi ne tanyɛmɛ: atei gli anerim arumɔ ne sak muŋ; atei lɛ ne aŋa yayas; 18 atei baŋ ane wa ne aŋɔk amen; atei so kǝka kɛ ku, ba tei na ba iki mimin ba, atei sak aner abɛ lɔ aŋɔk te duŋ ba are.>>

19 Ndi Yesɔ Ngɔŋ ne lɛ ben abɛba, Arik ne baŋu te kɔmɔ ne gbarshu te akɔ sɔŋ ne ŋɔk li maa. 20 Ankyak abɛ tsin abɛ Yesɔ aru te kɔte du lɛ kɛ men didik kɔte me, Arik ne tsǝn bǝn abɛba te duŋ lɛ kɛ bla maa bǝ shaga ne na ikiki yi vuŋ anu.