1 Nǝ cɛr muŋ iyi ku ti, Tiyofulɔ, mne ncɛr bɔbɔk ki yiŋ ndi Yesɔ ne kuti anai, ben ki yiŋ ndi ane tsarǝ 2 te gar mkpaŋ keŋ ndi ane baŋu te kɔmɔ ne gbarshu, ndi ane nek anu akɛ nyɛ Izhu Tsetser bǝn abɛ nau ndum abaŋ ndi ne hria ba. 3 Yesɔ ne tsar aneshir kpa maa ndi ne yik iya, te na bla aneshir abɛ kli tetɛk te di wa ayi tsitsir. Ane tsar tu maa amkpamkpaŋ har bɛr sɔknas, azǝn lɛ ilɛ kɛ kɔb Arik. 4 Ndi ne yi ndɔ bǝn aba, ne nek ba nken lɛ te di << kǝr duŋ zhin Urshelima ba, ama izhin bǝ ŋub tǝ ta inek iyiŋ ndi Tetɛɛ amuŋ nɛ kpai anyak, iyiŋ ndi zhin ne wɔ nenu amuŋ. 5 Yɔɔna ne su aneshir ne amashir, ne miŋ kɛ bɛr watsɔb atei su zhin ne Izhu tsetser.>>

6 Ndi ne kam anyɛ tuŋ abiŋ, ane rib bu, <<Ŋgɔŋ, ai mkpaŋ kǝŋe kɛ Utei ta ngɔŋ kɛ Isrela nek bai?>>

7 A di ba: <<Izhi mkpaŋa bǝn zhi iki yi na bɛr bai min ba, Tetɛɛ wa ne anyak mkpaŋa ne mgbyamgbyaŋ maa. 8 Ama izhin tei ta mgbyamgbyaŋ ndi Izhu Tsetser te zǝǝ ne atu amin; izhineba tei du lɛ muŋ ne Urshelima, ben Yahudiya, ben Samariya te kɔmɔ ne tu klɛ yi gɔnmimi.>>

9 Ndi Yesɔ ne bla amɛ, Izhu Tsetser abaŋu te kɔmɔ ne shu neyi amen, akpa ne ku ndi bane na yigu ba.

10 Nǝ shur ayi amen te zen tɔ gbarshu ndi azǝn kɔmɔ, ankyak aneshir ayaa aklɛkli anyaŋ ba, ne su kiki klikla. 11 Abɛ su ki klikla ma adi, <<Izhin aner abɛ Galili>> Adi ba, <<Izhin klɛ tɔ anii ne shu mɔi? Yesɔ waŋ ndi ne baŋu ben abɛ zhin te kɔmɔ ne shu, atei na kam aŋyak ndi zhin ne yik ne baŋu te kɔmɔ ne shumɔ.>>

12 Ndi aneshir ne ŋur akam aŋyak Urshelima ndi ne zǝǝ are Igbu iyi Zaitun, iyiŋ ndi iyi gbahir bǝn Urshelima, itsin vǝtsɔb. 13 Ndi ne nyak, ne yuŋ tuki kɛ sɔŋ mǝne. Abaŋ ndi ane yime ayi ane Biturus, ben Yɔɔna, ben Yakubu, ben Anduru, ben Filibus, ben Tɔma, ben Batɔlɔmi, ben Matiu, ben Yakubu izu Halfa, ben Saminu Zalɔt, ben Yahuza izu Yakubu. 14 Aneshir abaŋa bɔbɔk mǝne ne susun zhiin ne tuŋ abiŋ te ben Arik, ben ane Mata ben Meryamu iyah maa Yesɔ, ben amunzumene.

15 Nǝ mkpaŋ yuŋɔ Biturus ne lu aklɛ ne miŋ amunzumɔr abɛ zǝ Arik abaŋ ndi ne yi amkplik azhin ne sɔk yaa (120) 16 fe tedi, <<amunzumɔr, nɛrɛ te Ilɛ kɛ Arik keŋ ndi ne cɛr kɛ bɛ shaga ir keŋ ndi Izhu Tsetser ne bla nenu akɛ Doda netu kɛ Yahuda, waŋ ndi ne yi ne tsar ba ankɔŋ tǝ bɛ vuŋ Yesɔ 17 Neyi zhiin ne min mɔrɔ, te ana yine ki yi na nemiŋ kɛ ndum kǝŋe.>>

18 (Ndi ne ta idǝk maa kɛ na ki mimin,Yahuda ne lɛb amkpa; amɔ te akama zhaku antɔzi, ikpa maa ne lakŋar te duŋ alɛlɛ amaa ne ru akur ne abɛm. 19 Iki yiŋɛ ne duŋ kɔte neshir tawa ne Urshelima ne wɔi, fǝ tǝ zhɔ amkpama ne aŋa mǝne te Akaldama, watɔ ahwaŋ ane azhizhi.)

20 <<Fena,>> Biturus ne di, Ne cɛr amɛ nemin Zabura te di,

<<<Ikɔb maa bǝyi amkpɔk akɔ, inuŋ abɛ ta mben yi ndum maa> 21 Ndi amɛ, ne rɛ te abɛ hria nuŋ ne min aneshir abaŋa ndi ne yi ben abɛta, nak rɛ mkpaŋ keŋ ndi Ŋgɔŋ amɔr Yesɔ ne yi ben abɛta, 22 Nak baŋ rɛ mkpaŋ kɛ Yɔɔna ine su aner, te kɔmɔ ne mkpaŋ keŋ ndi ne baŋ Yesɔ agli adɔmɔ nǝ ti mɔr. Tǝ zhiin ne miŋ kɛ aneshir abaŋ ndi ne zǝ ta ayik ilumaa ne bɛ.>>

23 Ankyak akɔ kpob aner ayaa: Yusuu ndi azhɔu te Barsabas, ana zhɔu te Yustus bǝn Matiya. 24 Fe akɔ ben Arik, tedi, <<Ŋgɔŋ, Une zhi susun kɛ kɔte ŋɔwa. Nǝmin kɛ aneshir ayaa baŋa tsar ta waŋ ndi une hriau 25 te abɛ baŋ amkpa nǝ du lɛ kɛ Arik ndi Yahuda ne duŋ kɛ te kɔmɔ ne abɛ ndi ne teu anenen,> 26 Fe akɔ shur ba ankeŋkam, nkǝŋkama kɔ vuŋ Matiya, akɔ blau azhɔk ne min kɛ aneshir awur ane zhiin abɛ gar ishar maa.