1 Nǝ iber yi gayir abɛ zǝ Arik ne te du, fe ane Yahudawa abaŋ ndi wɔ aŋa Helɛnawa alɛ ne atu ayi Ibraniyawa abe gab ikiki te di ba nek amba baŋ ndi alulumɔ ne ku kili kɔte ber tayi ba. 2 Fe abɛ ze Yesɔ tsen amɛ awur ane yaa ma azhɔ aneshir te di ba, <<Bane rɛ te tabǝ duŋ ndum mɔr kɛ du lɛ kɛ Arik, te kam nyak amkpa ne gab kili ba. 3 Amunzumɔr, ne rɛ izhin bɛ hria aneshir amɛ tangba abɛ yine Izhu tsetser ne miŋ min abaŋ ndi izhin ne tanyɛmɛ ne ba anayi Mgbemgbeb te nek ba ndum kǝŋe 4 taba tabǝ nek tu mɔr te kɔmɔ te ben Arik te du ilɛ kǝ Arik.>>

5 Iki yiŋ ndi ne bla aneshir ne tanyɛmɛ bɔbɔk, fe ne hria Istifanus, iner waŋ ndi ne zhi Arik nena yine Izhu Tsetser, bǝn Filibus, bǝn Burokɔras, bǝn Nikanar, bǝn Timan, bǝn Barnaba, bǝn Nikɔlas awɔ ne Antakiya waŋ ndi ne yir Yahudiya. 6 Waŋa abaŋ ndi abɛ zǝ Yesɔ tsin ne gli ba gar ne ti kɛ abɛ na ndum kɛ Arik. Ndi ne ben Arik ne sak ba ŋɔk.

7 Ilɛ kɛ Arik zen kɔ ne ti. Abɛ ta lɛ kɛ Arik izen te du ne Urshelima tetɛk, abɛ na ndum kǝ Arik ne te tetɛk ne tanyɛmɛ ne nek tu iye aneshir.

8 Fena Istifanus, ndi Arik ne negu anu didik tena yi ne mgbyamgbyaŋ kɛ Arik, ne duŋu ne na ikiki yi vuŋ anu ne min aneshir. 9 Ankyak ine akaba anuŋ ndi azhɔu te (Akaba aner abɛ zuk shur) agɛn abɛ zuk shur anuŋ ne ntuntun ne tuŋ akpa men ne ntuntun te nga aŋa bǝn Istifanus te abla mu ne tu maa; tuno ayi, Libatiya ndi ayi Kuruya bǝn Iskandariya bǝn Asiya, ne te antam bǝn Istifanus te yenu tuk. 10 Ama aneshire bane kɔgu Itifanus ne lɛ ba te Izhu tsetser iyi ben abɔu.

11 Fe ne ku ba anu te shɔk aneshir, te di, <<Aba ne wɔu azǝn yen Musa, te zen la sak kɛ Arik.>>

12 Fena ne lɛk susun kɛ aneshir bǝn angɔŋgɔŋ, bǝn abɛ tsar Atɔra, fe akɔ te mfu te vuŋu, te gliu te kɔmɔ ben abɛ te ambuk. 13 Fe ne gli aneshir anuŋ anyɛmɛ te ti mu ashur ba, te di, <<Iner waŋa azǝn lɛ lǝlɛ mimin ne tu yi akaba ne yi tsetser bǝn icɛr yi Musa. 14 Ta ne wɔu a zen di te Yesɔ ayi awɔnǝ Nazara a tei zir amkpa waŋa, te na sen kiki yiŋ ndi Musa ne duŋ ta neyi.>>

15 Abaŋ ndi akɔ sɔŋ ne amkpa ne te ambuk go ashuru ayi, ayik ti maa yi ndi iti kɛ ine shar ayou Arik.