1 Nǝ yi ndi mkpaŋ yuŋɔ ndi Itum Hiridus ne vu anuŋ abaŋ ndi ayi ne akabaŋkɔŋ, te wa bɛ nek ba iyah. 2 Ne vuŋ Yakubu, izumen ane Yɔɔna, te ŋunu ne nzi. 3 Ndi ne yik nerɛ Yahudawa, akɔ vuŋ Biturus maayi. Iyiŋɛ nena ne mkpaŋ kɛ igyaŋ yi ta idaŋ kɛ yaŋ shur mumuŋ atuntu. 4 Ndi ne duŋɔ vuŋu a zhɔ gu ne jaru, te sagu ne aŋɔk ntǝg nas bene abɛ kpaakpa amɛ nas kɔte ntǝg takɛ. Hiridus ne lɛ nyak ne susun maa te wa atei ka lɔ teu ambuk ndi igyaŋ yi glak te ka gayir.

5 Fe ne nyak Biturus ne jaru, ndi amɛ abɛ zǝ Arik azǝn kwɔyi te ben Arik ne atu ayi Biturus.

6 Nǝ bu ndi Hiridus atei gliu arumɔ tǝ bɛ teu ambuk, Biturus akɔ kurna ne angus abɛ kpaakpa amɛ yaa ne kpau ne tsǝtsaŋ mei yaa fe anuŋ abɛ blɛ ake klɛ ne Jaru m ɔ. 7 Andanda fe ine shar Arik akɔ munoru fe ilu ku laŋ yir min jaru m ɔ. Akɔ ŋur Biturus ne iyi sa te duŋɔ lu. <<Nama, lu klɛ!>> Adi, fena itsǝtsaŋa ku gburkluk var hrie.

8 Ankyak ine shar Arik adiu, <<Baŋ anklu ami su tena su akpaza mi.>> Fena Biturus akɔ na ndi ablau ma. <<Gen anklu ami ne kpa te zǝm,>> Nǝ shar ayou Arik ablau. 9 Biturus akɔ zeu aru ne mi jaru mɔ, ama ba ne zhi te ki na nǝ shar Arik iyime ba; Ayik ndi iwa yik rimla. 10 Agara kam ne blɛ ine kuti bǝn ne yaa te nyɛ adɔŋkɔŋ akɛ zɔb ndi kɔmɔ ne min ntun. Iku buu ba ne tu maa, akɔ gar aru. Ndi neka tsǝne te yir gbagbaŋ, ankyak ine shar Arik aduŋ ba.

11 Ankyak izhu yi Biturus ku nyak anenen fe adi, <<Azizaŋa Mni zhi ne yaŋ te antam te Ŋgɔŋ ne shar ine shar amaa te abɛ glim arumɔ ne ŋɔk kɛ Hiridus ben kɔte nii ndi Yahudawa ne shur atɔŋ te aba bɛ wɔ.>>

12 Amɛ ndi ki yiŋɛ nena ne atu amaa, a kɔmɔ ne kɔb Meryamu iya maa Yɔɔna ndi ana zhɔu te Markus, amɔ aner tetɛk ne biŋ te zen ben Arik. 13 Biturus aŋur ankɔŋ ne adɔŋkɔŋ ake abɛm, fe vǝnwa nuŋ ayi gen waŋ ndi azhɔu te Ruda awɔ aŋur ankɔŋ tɛ nyɛ adɔŋkɔŋ ŋɔ. 14 Ndi ne wɔ kɔr kɛ Biturus azhi, anyɛr te duŋ bu ankɔŋɔ te ŋar kɔr maa, <<Ibiturus aklɛkli ne adɔŋkɔŋ!>>

15 <<Ulandar,>> A diu. Ndi ne kyak duŋ blama, akɔ di, <<Atai yi irii maa.>>

16 Ankyak Biturus ne kyak te zǝn ŋur ankɔŋɔ, ndi ne bu ankɔŋɔ te yigu kɔte ŋɔwa bane na lɛ yir ba. 17 Biturus alɛ ne ŋɔk te kǝr abɛ bu anu ba te bla ndi Ŋgɔŋ ne gli wa rumɔ ne Jaru. <<Bla zhin Yakubu ben amunya lɛ kǝŋe,>> Ne bla, tena duŋ ba te gar amkpanuŋ.

18 Ndi bɛr ne ŋen, inuŋ bane di kinuŋ ne min kǝ abɛ kpaa kpama ne atu yi Biturus ba. 19 Ndi Hiridus ne duŋ azǝbu tena zǝb te wɔb bu fe bane yigu ba, akama zǝb abɛ blɛmɛ tɛ di abɛ ŋlɔk ba.

Ankyak Hiridus ne kɔmɔ ne Yahuda tena gar Kaseriya te yine sɔŋ amɔ. 20 Hiridus azǝn vǝ aneshir abɛ Tiriyan bǝn Sidon; akɔ bine te zeu te wɔb sɔŋ bene bɔu. Ndi yik Blastus ne ku ba goŋ, Iner nuŋ waŋ ndi ne tanyɛmɛ bene bɔu ayi gen ayou Itum, aribu isɔŋ kɛ sik ne ntuno te shurɔ yi bǝn Itum ndi anekba kili.

21 Nǝ bɛr nyak mǝne Hiridus, ne su anklu akɛ Itum, te sɔŋ ne mben maa te bla nkan lǝlɛ a shur aneshir. 22 Aner aŋar akɔr tedi, <<Waŋai kɔr kɛ arik, bai kɛ neshir ba.>> 23 Andanda, ndi Hiridus bane nek Arik Ŋgɔŋ maa ba, ine shar bla lɛ kɛ Ŋgɔŋ aŋuru azhɔk, fe nkis ku liu ŋun.

24 Fe ilɛ kɛ Arik izen kɔmɔ tena bla kɛ.

25 Ndi Barnaba ben Shaulu ne klɛ ndum kɛ na mǝne, ne duŋ Urshelima te baŋ Yɔɔna waŋ ndi ana zhɔu te Markus te kɔmɔ ne Antiyok.