1 Abɛ na ndum kɛ Arik ben nki amunya ne gar kɛ Yahuda ne wɔ abaŋ ndi ba yi Yahuda ba ne ta lɛ kɛ Arik. 2 Fe ndi Biturus ne yuŋ akɔmɔ ne Urshelima, abaŋ ndi ne kɔk ba zǝk apwar Biturus aŋyak 3 tedi, <<Une gar kɔb abaŋ ndi bane kɔk ba zǝk te li ki li bene ba.>>

4 Biturus akɔ lɛ te bla ba kɔte nii ndi nena: 5 <<Mne yi ne ntun yi Jopa te zen ben Arik, fe ne min kɛ zen bene, fe ndi rimla ku nyɛm. Mniyik ririk izi re shu ne kpa abubu angɔŋ ne nguŋgu me nas te zi nyɛ anenen ne amkpawaŋ ndi m yime. 6 Mte ntɔ miŋe myik inarum abɛ aza nas ne gɔŋmimi angɔŋgɔŋ, abɛ gbur ne mimi ben aŋliŋlɔ abɛ shu. 7 Fena mwɔ kɔr dim, <Lu kli, Biturus ŋun tǝ ta.>

8 <<Mku ndi, bai te ba, Ŋgɔŋ! Ikinuŋ iyaŋ tsetser ka ba yi tsetser ne taba yir anu amuŋ ba.>

9 <<Ikɔr tar rɛ shu mkpaŋ kɛ yaa, <Kǝr ubǝ di uzhɔ iki nuŋ te ba yi tsetser ba iyiŋ ndi Arik neka duŋǝ yi tsetser.> 10 Ikime nena amɛ amkpaŋa tar, tɛna kama abaŋǝ kɔmɔ ne shu.

11 <<Ayaŋa fe aner atar abaŋ ndi ne shar ba bene bɛm ire Kaseriya ne gar kɔb keŋ ndi Mne sɔŋɔ. 12 Izhu aye Arik adim kǝr mduŋ gbaŋ kpa ne zǝ ba gar amɔ ba. Abɛ zǝ Arik amɛ tani ne zǝm menyi. Fe tane yir kɔb neshire. 13 Kaniliyu abla ta ndi wa ne yik ine shar ayou Arik ne muŋ aru ne kɔ maa tedi, <Shar te duŋ abɛ kɔmɔ ne Jopa ben Simɔn waŋ ndi a zhɔu te Biturus. 14 A tei gliu ishar ndi iwa ben kɔmi bɔbɔk atei taba shur.>

15 <<Ndi ne zin ilɛmɛ, izhu tsetser ne nyɛ ne atu amen ndi nena nyɛ ne atu amɔr ne kuti. 16 Fena mku shuzhi ne iki yiŋ ndi Ŋgɔŋ ne di: <Yɔɔna a su ne amashir, ama atei su zhin ne Izhu tsetser.> 17 Ndi amɛ Arik ne nek abaŋ ndi bai ŋli Yahudawa ba iki ndi nɛna nǝk ta, waŋ ndi nɛ tanyɛmɛ ben Ŋgɔŋ Yesɔ Kristi, ngam nǝ yi ŋɔɔ wa ndi M ga aŋa bǝn Arik?>>

18 Ndi ne wɔ amɛ, bane na yi ki bla ba te nyɛr Arik, tedi, <<Fena, Arik ne nǝk ta te vuŋ abaŋ ndi bai ŋli kɛ Yahudawa ba abɛ tau ne yaŋ tei ku.>>

19 Ankyak abaŋ ndi ne klu aŋar ne atu nek iyah ndi ne ka ŋun Istifanus ne gar ntun yi Fonisha, sipro, ben Antiyok, a bla Yahudawa kiki men ilɛ kɛ Arik. 20 Fe anuŋ ne min mǝne, ka yɛ ni, aneshir abɛ rɛ Sipro bǝn Sirǝn, agar Antiyok te azǝn lɛ ben Helɛna men yi, adu ba ilɛ didik ne atu ayi Ngoŋ Yesɔ. 21 Fe ŋɔk kɛ Ŋgɔŋ iyi bǝ ne beba, fena aneshir tetɛk ne tanyɛme te di aba tei kama zǝ Ŋgɔŋ.

22 Ilɛ didik kǝŋe ne te yir atɔŋ aye aneshire abɛ zǝ Arik ne Urshelima, fe akɔ shar Barnaba ne Antiyok. 23 Ndi Barnaba ne te yir ne yik neyi amaa iki ndi Arik nenai, ne nyɛr tɛna nek ba nkenlɛ te bɛ klɛ mgbamgbaŋ ne lɛ didik kɛ Ŋgɔŋ ne asusun amen. 24 Barnaba ayi neshir didik, waŋ ndi Izhu tsetser iyi bene bɔu ben tanyɛme, ankyak aneshir abɛ du ne tanyɛme ne lɛ kɛ Ŋgɔŋɔ.

25 Ankyak Barnaba a kɔmɔ ne Tarsus agar wɔb Shaulu, 26 Fe ndi ne yigu, a gliu te nyak Antiyok. Nǝ min kɛ se mɛ Barnaba bǝn Shaulu ne biŋ te na ndum ne akabaŋkɔŋ te tsar aneshir tetɛk. Abɛ ne ndumo ane kuti azhɔ ba te Krista ne Antiyok.

27 Nǝ mkpaŋ yuŋɔ abɛ bla na ndum Arik anuŋ ne zi are Urshelima te gar Antiyok. 28 Izhiin ne miŋ mǝne azhɔu te Agabus, a lu kli ndi izhu ne diu abɛ bla te izhɔŋ ngɔŋ inyɛ itei yir kɔte me ne gar gɔŋmimi kɔ Roma. (Iyiŋɛ nena ne mkpaŋ kɛ nuŋ ndi azhɔu te kladɔs ne Roma.) 29 Abɛ tsǝn amaa ben Yesɔ, kɔte ŋɔ ne ki ndi Arik ne nǝgu, ne glii arumɔ te abɛ nek amunya ne Yahuda. 30 Iyiŋɛ ne nai, te shar ne kime te bɛ nek angɔŋgɔŋ ne aŋɔk ayi Barnaba ben Shaulu ne Urshelima.