Atos 21

Bulus ne gar Urushelima

1 Ndi ta ne duŋ ba, ta ni yir igu te gar igar kɛ kɔs. Ne bɛr yi ya ta ne gar Rodusa, tena gar Bantara. 2 Ta ni yik igu kɛ gar Finikiya, tani yir kɛ te kɔmɔ. 3 Ndi tane te gbahir ne kuburus, tani kam zi ŋɔk mla ma, tani zi ne Taya, amɔ igu mɔ te zi ki yiŋ ndi ne baŋ yi. 4 Ndi tane yik abɛ zi Yesɔ amɔ tane sɔŋ bene abɛba bɛr Taŋgba. Izhu tsetser ne bla Bulus kǝr bɛ gar Urshelima ba. 5 Ndi mkpaŋ ne te ndi ta tei lu, ta lu te vuŋ tsǝn mɔr. Alulum ben amba, ben amumun, ne zǝk ta agli ru ne ntunɔ, ta ne tar agbarum ne kɔtɔŋ nek te ben Arik. 6 Ankyak ndi ta ne bla lɛ kɛ duŋ akpa tane duŋ ba akam kɔmɔ ne kɔb.

7 Tane vuŋ tsin mɔr rɛ Taya te gar Talamayas, ne muɔ tane yik amunya ben amunvamɔr tetɛk tane sɔŋ bene bɛba bɛr zhin. 8 Ndi bɛr ne ŋan te gar Kaseriya, tane yir kɔb Filibus ne bla lɛ kɛ Arik, waŋ ndi ayi ne min kɛ ataŋgba ndi ne hria ba. 9 Ayi ne mune amba amɛ nas ndi bane zen aŋa ba, abla shar yi Arik.

10 Ndi ta ne te bɛr tetɛk amɔ, ne bla shar ayou Arik nuŋ ndi azhɔu te Agabus are Yahudiya. 11 Ne yi bene bɛta ne ban ki kpa tiŋ yi Bulus, te kpa a ŋɔk bene aza ma te di. <<Izhu tsetser idi, <Ne me angɔŋgɔŋ bɛ Yahudawa ate kpa akiki ne ki kpa tiŋ yiŋɛ te vuŋ nek abɛ yaŋ zhi Arik.>>>

12 Ndi taba bene aneshir abaŋ ndi ne yi ne amkpama tane ben Bulus kɛ bɛ gar Urshelima ba. 13 Fe Bulus adi ta te di, <<Izhin zhin tɛ nii te duŋ kpa ku sik me? Mne nǝk tu muŋ te bɛ kpam ba kpa Ankyak ba tem na ku ne Urshelima nǝ sak kɛ Yesɔ.>> 14 Ndi ne kyak ben mɔrɔ, bata na yi ni ki na ba fe ta di, <<Arik bɛ na kiyiŋ ndi ne reu.

15 Ne me, ta vuŋ ankɔŋ te gar Urushelima. 16 Anuŋ abɛ zi Yesɔ ndi are Kaseriya ne zǝk ta te gli ta te gar kɔb Manason, amɔ wa ta te kur. Ayi neshir ne kubrus waŋ ndi ne baŋ kpaŋ tetɛk ne zi Yesɔ.

Bulus ne yir Urushelima

17 Ndi ta ne yir Urushelima, amun zumɔr bene amun va mɔr ne ta ta aŋɔk ya. 18 Ndi bɛr ne ŋan Bulus ben taba tane gar te kɔte yik Yakubu, bɔbɔk angɔŋgɔŋ abɛ zi Yesɔ ne yime na kpama. 19 Bulus ne tek ba te bla ba iri keŋ ndi Arik ne na ndum bane wa ne tɔ yi abɛ yaŋ zhi Arik.

20 Ndi ne wɔ me, ne gbara Arik sak. Fe adi Bulus: <<Izu mɔr, uyik, Yahudawa azhiin tetɛk ne ta lɛ kɛ Arik, ne me bɔbɔk mǝne awɔb lɛ kɛ Arik. 21 Ne bla ba te di utsar Yahudiya abaŋ ndi ayi ne min abɛ yaŋ zhi lɛ kɛ Arik ba zi lɛ kɛ Musa ba. 22 Ta tei na anii?aneshire mɔr ate zhi te izhin yi ayaŋa, 23 ne me na kiyiŋ ndi ta tei blau. Aneshir amɛ nas ndi ayi ben abɛ ta ne sherim. 24 Izhin bǝ baŋ aneshir abaŋa, te duŋ ba bɛ yi tsetser, te ya ba, te duŋ ba bɛ kɔn atu men. Ne me ba nuŋ ndi ate yi ndi iyi amɛ ne lɛ keŋ ndi ne bla kɛ ne tɔ mi, fe ate di wa miyi uzǝ lɛ kɛ Arik kɛ cɛr yi Musa. 25 Netu yi acɛn abaŋ ndi ne ta Arik, tane cɛr ba kiyiŋ ndi iyi ne susun amɔr tedi batei li kiyiŋ ndi ne nek kpok kuŋkun ndi ne sub kɛ aŋyak te zǝ kuu kɛ ba, kǝr bɛ na ta na keŋ ndi bane yak kɛ ba, bene narum yiŋ ndi ne fir yi ŋun, kǝr bɛ na kur ben amba abaŋ ndi ba yi amen ba.

26 Ne bɛr yi ya, Bulus ne gli aneshir abaŋa te den akpa men tsetser. Fe na gar Akabaŋkɔŋ te blɛ bɛr yiŋ Ndi aneshir ate duŋ akpa men tsetser bɛr iri keŋ Ndi ate bin ba kiki.

Ne vuŋ Bulus ne Akabaŋkɔŋ

27 Ndi bɛr taŋgba ne te gayir, aner bɛ Yahudawa nuŋ ndi are gar kɛ Asiya ne yik Bulus ne Akabaŋkɔŋ. Ne shɔk aneshir bɔbɔk te bɛ vuŋ Bulus, 28 aneshire ayatɔŋ te di, <<Amunzumɔr aner abɛ Isrela, lɔk zhin tama! Waŋ ayi ner waŋ ndi atsar kɔte ŋɔwa ne kɔte me bɛ kam ti bene aner amɔr ben lɛ keŋ ndi Musa ne cɛr ta nǝk ta ne kǝ. Ne mee, ne Gli acɛn te duŋ ba yir Akabaŋkɔŋ te zen la amkpa ne sɔŋ amene.>> 29 (Ne kɔkɔb ne yik Tarofimas awɔnǝ Afisa ne min tun bene Bulus te di Bulus ne gliu te yir Akabaŋkɔŋ.)

30 Ntuno bɔbɔk ne ŋurka ne ya tɔŋ, aneshir bɔbɔk aklu te rɛ agagar te nyɛ. Avuŋ Bulus, te gbaŋu agli rumɔ ne Akabaŋkɔŋ, ne amkpamkpama te ku ankɔŋɔ. 31 Ndi ne te te ba bɛ ŋunu, ilɛ mɛ ne te yir atɔŋ ŋgɔŋ ne abɛ tyak kum abaŋ ndi ayi ne Roma te di bɔbɔk ntun yi Urshelima ne tsik ŋar. 32 Fe akɔ lu te Gli angɔŋgɔŋ Anuŋ abɛ tyak kum anuŋ te gliu agar bene aneshire. Ndi aner abɛ tsik akpa ŋar ne yik ŋɔk ne tyak kum bene abɛ tyak kum Anuŋ, aduŋ tsik Bulus.

33 Ngɔŋ ne abɛ tyak kumɔ anyɛ te vuŋ Bulus te di abɛ kpau ne saraka me yaa. Te rib bu ayi ŋɔwa nena na anii. 34 Anuŋ ne min kɛ aneshir alǝk akɔr tedi yiŋ anuŋ adi yuŋ, ndi ŋgɔŋ ne tyak kumɔ bane wɔ lɛ didik bǝn abɛ yatɔŋɔ ba, adi bɛ baŋ Bulus te gar amkpa ne sɔŋ abɛ tyak kum. 35 Ndi Bulus ne yir kɔb kɛ zi, aneshir ayatɔŋ ŋgɔŋ tedi abɛ tyak kum bɛ gliu te kɔmɔ. 36 Aneshir abaŋ ndi ne zǝ bama akyak te yatɔŋ tedi, <<Zhɔk zhin newu adɔmɔ!>>

Bulus ne lɛ ben Aneshir

37 Ndi abɛ tyak kumɔ ne te baŋ Bulus te gar amkpa ne sɔŋ amene, arib ŋgɔŋ amene tedi, <<Ka zhin duŋ me bla kinuŋ ini?>> Ŋgɔŋ ne tyak kum adiu,

<<U ya lɛ Helenanci yi?>> 38 <<Bai wa uyi awɔ ne Masar ndi bɛr yi gayir ne duŋ aneshir tsik ŋar te yaa tɔŋ te gli aneshir bɛ kyak wɔ lɛ me azhin nas te gli ba te gar zǝzǝk ka?>>

39 Bulus adi, <<Me yi awɔ ne Yahudawa, me rɛ Tarsus ntun yi Kilikiya, me yi ŋli kɛ ntun yi tɔ shak yi. Me ben ne duŋ lɛ bene aneshir abaŋ.>>

40 Ndi ŋɔk ne tyak kum ne ta yimɛ, Bulus ne lu kli ne nga azǝ te diba abɛ ku anu. Ndi ne ku anu, adi ba na ŋa yi Yahudawai.