1 Ankyak Shaulu ne yi ne amkpama, te tanyɛmɛ abɛ ŋun Istifanus.

Ne bɛrɛ yi ya abɛ zǝ Yesɔ ne Urshelima ne yik iya, ne klu aŋar te kɔmɔ ne Yahudiya ben Samariya, anaga abɛ zǝ Yesɔ tsin ankyak. 2 Fe aneshir abɛ te sisik Arik aba ne ru Istifanus, ne zhinu ngɔŋ. 3 Ama Shaulu ne zǝn sak aner abɛ zǝ Arik iya ngɔŋ, a yir akɔ kɔb, te gbur amba bǝn alulum, te vu ba shur nǝ jaru.

4 Abaŋ ndi na se ba var ne zin zǝ tuntun te du lɛ didik kɛ men kɔte me. 5 Filibus ne yir miŋ tuŋ yi Samariya te zin bla lɛ kɛ Arik kɛ men. 6 Ndi ntsan aneshir ne wɔ, te yik ikiki yi vuŋ anu ndi Filibus a zin nai, ne susun zhiin ne shur kpa te wɔ ki yi bla maa. 7 Abaŋ ndi anerim ne yir ba ne ru te duŋ ba, anerim ne zin ŋur ruru, a bɛ ku kpa gar zhiin ben abɛ kpuk tetɛk ne duŋ ba arɛ. 8 Aneshir ne zin nyer ne min ntuno goŋ.

9 Neshir nuŋ ndi azhɔu te Saminu waŋ ndi atɔ ne min tuŋ tena nek aneshir abɛ Samariya kǝka. Aŋur asa te di wa ayi kinuŋ, 10 Aneshir ashur kpa te nǝgu asusun men angɔŋgɔŋ ben amɔtsɔtsɔb a di, <<Iner waŋa mgbyamgbyaŋ ma kǝŋe iyi kɛ Arik waŋ ndi zhɔu te tetɛɛ ngɔŋ.>> 11 Ne zeu tǝ nɛ yik kiki yi zin nama, ndi a nek ba ki vuŋ anu ne tu maa. 12 Ndi ne tanyɛmɛ ne lɛ kɛ men ndi Filibus ne bla kɛ ne tu kɛ kɔb Arik ben sak kɛ Yesɔ Kristi ndi ne su ba ne amashir amba ben alulum. 13 Tǝ vuŋ Siman ne tu maa ne tanyɛmɛ ne suu ne sak kɛ Arik. Ankyak azǝ te gar kɔte me, ne yik ir keŋ ndi Filibus azen na ikiki yi vuŋ anu.

14 Ndi abɛ zǝ Yesɔ tsin ndi ayi ne Urshelima ne wɔ Samariyawa ne ta lɛ kɛ Arik nyɛmɛ, akɔ shar ane Biturus bǝn Yɔɔna bǝn a bɛba. 15 Ndi ne kɔ te yir akɔ ben Arik te abɛ ta Izhu yi tsetser, 16 ndi Izhu tsetser bane zen nyɛ ben abɛba ba, ne su ba ne amashir ne isak Ngɔŋ Yesɔ. 17 Fe ane Biturus ben Yɔɔna akɔ sak ba ŋɔk, akɔ ta izhu yi tsetser.

18 Ankyak, Saminu akɔ yik asak abɛ zǝ Yesɔ tsin anŋɔk Izhu tsetser hrie ba, te anab azɔb nǝk ba 19 te di, <<Ngama muŋ yi neme zhin mgbyamgbyaŋ kǝŋe, tem te sak kɔte ŋɔwa ŋɔk, bena ta Izhu tsetser.>>

20 Ama Biturus ne diu: <<Izhin bɛ naŋ dɔ iwa ben azɔb me, uyik te di alɛb izhi yi nek Arik yiŋɛ ne zɔb! 21 Ndɔmi ba yi ne ki yiŋɛ ba, susun mi ba yi anenen bǝn Arik ba. 22 Ne me bǝ su aŋɔk nerɛ te duŋ ki mimin yi na mi, te ben Arik te abɛ zugu zhɔk ne na zumimin yiŋ ndi une nyagǝ ne susun mi. 23 Te myik susun mi ne cɔkla, ina kpa zumimin.>>

24 Fe Saminu a tanyɛme tedi, <<Izhin bǝ ben me Arik, te kǝr iki zhiin ne ki yiŋ ndi izhin ne blai bǝ duŋ vuŋ me ba.>>

25 Ndi ane Biturus bǝn Yɔɔna ne zhi a yi lɛ Arik, ne bla kɛ te kama kɔmɔ ne Urshelima, te zen du lɛ kɛ men ne ntuntun yi Samariya tetɛk.

26 Fena ine shar ayou Arik ne di Filibus, <<Lu te kam zǝ ŋɔk li mi, te zǝ ankɔŋ ndi are Urshelima te kɔmɔ ne Gaza.>> Ayi ankɔŋ ane ablubluk. 27 Fe alu te kɔmɔ. A yik awɔnǝ Habasha, ayi tetɛɛ, ngɔŋ ne shir ne ntun yi Samariya. Habasha, ayi wa ayi ine nyak azɔbɔ ayi itum amba, ne nyɛ ben Arik ne Urshelima, 28 Atsǝne kɔmɔ ne kɔb ne nŋa maa, te zen bla lɛ kɛ Arik ne cɛr yi Ishaya ine bla shar yi Arik. 29 Fe Izhu tsetser idi Filibus, <<Tib nyak ben nŋa waŋa.>>

30 Fe Filibus aklu kɔmɔ bene bɔu, awɔu azǝn bla mplɛ cɛr kɛ Ishaya ine bla shar yi Arik. Aribu, <<U zhi ki yiŋ ndi uzǝn bla mai?>>

31 Fe adi, <<Ne me? Se nuŋ ne blam>> fe a ben Filibus abɛ ayuŋ sɔŋ ben abɔu.

32 Waŋa a yi amkpa waŋ ndi a zen bla cɛr ma:

<<Ne gburu ndi wanta te kɔmɔ ne amkpa ne yak,

Ir keŋ ndi vǝn nklu iku anu,

Ne ŋɔk kɛ ner ne yagu ne ku anu maa bene bɔu.

33 Nǝ zitu zhɔk maa ne kyak lɛ ma.

Nŋɔwa a tei bla lɛ maa ne gɔnmimi?

Ne ka baŋ vli maa ne gɔŋmimi.>>

34 Fe ngɔŋ ine bla shar yi Arik waŋ ndi ne yaru ne lɛ arib Filibus, te di, <<Me rib bu, ine bla shar ayou Arik waŋa, alɛ lɛ kɛ ŋɔwai? Itu maa kɔ ikɛ nuŋ ini?>> 35 Fe Filibus abu anu te baŋa rɛ ne mplɛ cɛr kǝŋe te bla lɛ kɛ men kɛ Yesɔ.

36 Ayi ne min kɛ tsin, ayik nkam amashir, ankyak ngɔŋɔ adi, <<Tɔ amashir awaŋ. Aye nii duŋ bau tei sum ne sak kɛ Arik kai?>> 37 Filibus a di, <<Utǝ tanyɛme ne susun mi zhiin atei suu>> Ngɔŋ a tanyɛme tedi, <<Mne tanyɛme te di Yesɔ Kristi ayi Izu Arik>> 38 Fe adi abɛ duŋ nŋa ma agbur akli, fe yaya mǝne a kɔ yir min amashir, fe Filibus akɔ su ngɔŋɔ ne sak Arik. 39 Ndi ne ru ne min amashire Izhu tsetser yi Arik ifuk Filibus baŋ tsibɛ, ngɔŋɔ bane na yigu ba, fe a tsin te bene nyɛr. 40 Ndi Filibus ne yir Azotus, fe ne zǝ ntuntun te zin bla ba lɛ kɛ men, te yir Kaseriya.