1 Bulus ne nyɛ Darbɛ tena gar Listira, ndi ne tsǝn amaa ndi azhɔu te Timoti a sɔŋɔ, iwaŋ ndi Iya maa aye aŋa Yahudawa ne ta lɛ kɛ Arik fe tetɛɛ maa aye awɔnǝ Helɛnawa. 2 Amunya abɛ zǝ Arik ne Listira ben Ikɔniya ne bla lɛ didik ne atu ayi Timoti. 3 Bulus ne di wa atei baŋu ine tsǝn amaa, fe ne kɔgu zǝk te ayi awɔnǝ Yahudawa waŋ ndi asɔŋ ne gara, ne zhi te tetɛɛ maa ayi awɔnǝ Helɛnawa. 4 Ndi ne zǝ ntun-ntun, abla lɛ kɛ sɔŋ ben ki ndi ne nyagǝ ndi abɛ na ndum ben abɛ hria ne di abɛ blai ne Urshelima te aneshir abɛ nek ŋgɔŋ. 5 Fe mkpǝmkpa yi ku ayi neyik keŋken lǝlɛ mǝne iyi duŋ ba aŋur aklik ne lɛ kɛ ta nyɛmɛ te duŋ abɛ ta ilɛmɛ azǝn shaga.

6 Bulus ben akpaa abɛ tsǝn amaa ne gar azǝ igar kɛ Firijiya ben Galantiya, ndi Izhu Tsetser ne nyak ba te bɛ du ilɛmɛ ne garke Asiya. 7 Ndi ne nyɛ kɔtɔŋ ntun yi Galantiya Misiya, ne na te aba abɛ yir Bitiriya, fe Izhu iyi Yesɔ ba ne ta nyɛmɛ ba. 8 Ankyak akɔ zǝ Misiya te gar azǝ akɔmɔ ne Taruwasa. 9 Nǝ bu Bulus ne yik ne rimla keŋ ndi awɔnǝ Makidɔniya aklɛ zen benu, <<Glɔ nyɛ Makidɔniya te zok tama ki.>> 10 Ndi Bulus neka yik rim lama, Bata nena sɔŋ ba ta ku kɔmɔ ne Makidɔniya, te ta nyɛmɛ te aye Arik wa azhɔ ta te tabǝ te du ilɛ maa amɔ.

11 Tane zǝ gwu ne Taruwasa ne tu nek ngɔŋ te kɔmɔ te yir Samutaraki, ndi bɛr ne ŋen tane kɔmɔ ne Niyapoli. 12 Ire mwɔ tane zǝ Filibi, ntun ngɔŋ ndi ne yi ne tsutsu akɛ Romawa ne ŋakɛ Makidɔniya. Tane te mwɔ bɛr amɔ.

13 Nǝ bɛr sɔŋ sik tane ru kɔmɔ ne amagɔŋ ntuno ne tuk, ndi tane zhɔk susun te ta tei yik amkpa ane ku ayi. Ta zǝ sɔŋ te ku lɛ bene amba abaŋ ndi aye amɔ. 14 Izhiin ne min kɛ amba bǝ wɔ tama are ntun yi Tayatira, azhɔu te Lidiya, idub maa aluk kluŋklu ye aŋɔk didik. Aneyi waŋ ndi azɔkuu Arik. 15 Ndi Lidiya wa ben aner abɛ kɔmaa ne su ba ne amashir, ne zhɔ ta te tabǝ gar kɔmaa. <<atei ndi izhin ne baŋ me tem ne ta nyɛmɛ ne lɛ kɛ Ŋgɔŋ,>> adi, <<Nye zhin te sɔŋ ne kɔmuŋ,>> Ankyak azǝn dam ta.

16 Ndi tane yi ne ankɔŋ ane gar bǝn Arik ne Akaba, tane mla kpa bǝn vǝnwa nuŋ ndi ayi izhu yi shetan ne yiru ndi abla tɔ tii. Agli adudunki tetɛk aŋyak kɔb kɛ ngɔŋ amaa ne tɔmɔ. 17 Ivǝnwa ma azǝ ane Bulus te ŋur ruru <<Alulum abaŋa aye bǝ na ndum Ŋgɔŋ ne Shu Arik, ndi adu lɛ kɛ ankɔŋ ane ta zhɔk>> 18 Ven iwa ma ne baŋ bɛr te zen na me. Nǝ klɛtu Bulus akɔ baŋ afuk te kama nyɛ di ishetan ne min kɛ vǝnwama, <<Nǝ sak kɛ Yesɔ Kristi Mdi ubǝ ru ne kpa kɛ vǝnwama!>> Fe andanda izhu mimi nǝ iku duŋu.

19 Fe abaŋ ndi ven wa igene aye maa azhi te ankɔŋ ane yik azɔb amene ne klɛ, a vuŋ Bulus ben Sila te gbur ba kɔmɔ ne gar kɛ dub te abe te yik angɔŋgɔŋ. 20 Ne Gli ba gar amkpa ne te ambuk te di, <<Aner abaŋa ai Yahudawa, te zen ruk ntuno cɔkla 21 ne nkan lǝlɛ yiŋ ndi ba yi bla mɔr ba te Romawa aba atei ana ndumo.>>

22 Idu aneshir azhɔk ba ya atɔŋ ne atu aye nii Bulus ben Sila, fe abɛ te ambuk aduŋu gbu ki mǝne aŋa te duŋ atsik ba ne ririk kɛ zɔb. 23 Ndi neka tsǝk ba ngɔŋ, a tur ba a shur ne Jaru, ine blɛ amkpama adiu te abɛ shurɔ yi mgbamgbaŋ ne Jaru m ɔ. 24 Ndi ne ta ilɛmɛ, ashur ba ne burgi yi luk te shur ba atsitsaŋ ne za.

25 Nǝ min kɛ atsutsu bu Bulus bǝn Sila azǝn ben Arik tena duk Arik asem, anuŋ abaŋ ndi ne shur ba ne Jaru menyi azǝn wɔ ba. 26 Ankyak akɔ wɔ zhaŋ mimi ndi ikab tanda kɛ kime ne zhaŋ ngɔŋ. Mkpaŋ zhin bɔbɔk nkuŋkɔŋ yi jaru m ɔ ku bu, fe atsitsaŋa amene ayi kɔte kɛ ŋɔwa rik ahrie. 27 Ine na ndum ne Jaru m ɔ akam asi, fe ndi ne yik Inɔŋkɔŋ iyi jaru m ɔ ikur bu, akɔ agbaŋ anzi akɛ tiŋ maa atun te wai ŋun tu maa te yik ndi abɛ shur ne jaru m ɔ neka klu. 28 Ankyak Bulus akɔ ŋar kɔr, <<Duŋ diu la kpami ba! Ta yimɛ bɔbɔk mɔrɔ!>>

29 Ine na ndum ne Jaru m ɔ adi abɛ gli wa lu mɔ, aŋur ayir ne mimin ate zhaku ne ti kɛ Bulus ben Sila. 30 Akɔ gli ba rumɔ te rib abɛ na ndum ne jaru m ɔ, <<Angɔŋgɔŋ, M tei na anii tem lirui?>>

31 Ane Bulus ben Sila ablau lɛ kɛ Arik tedi, <<Ta nyɛmɛ ben Ŋgɔŋ Yesɔ, teu ka shii lieru iwa ben aner kɔmi.>> 32 Ankyak akɔ blau ilɛ kɛ Arik ben abaŋ ndi ayi ne kɔ maa. 33 Nǝ min kɛ atsutsu bu ine na ndum jaru m ɔ agli ba ate ŋlaa ba amkpa mǝne; fe ayaŋa iwa ben aner kɔmaa akɔ su ba. 34 Nǝ na ndum Jaru m ɔ ne gli ba te kɔmɔ ne kɔmaa te nǝk ba kili; nyɛr ne shak susun maa ndi wa ne ta lɛ kɛ Arik iwa ben aner kɔmaa.

35 Ndi bɛr ne ŋen, abɛ te ambuk go akɔ shar angɔŋgɔŋ anuŋ te bɛ tedi ne na ndum jaru m ɔ: <<Zuk anere te duŋ ba kɔmɔ.>> 36 Nǝ na ndum Jaru m ɔ abla Bulus, <<Abɛ te ambuk ne di abɛ zu gu ben Sila azhɔk. Azizaŋa izhin bǝ kɔmɔ. Tsǝn zhin ne sik susun.>>

37 Fena Bulus adi abɛ na ndumo; <<Ne tsǝk ta neyi aner tetɛk ne yaŋ tǝ ta ambuk, itaba mɔr yi tayi ŋli kɛ Romawa te vuu ta tuk shur ne Jaru. Fe azizaŋa aba dibai gli ta rumɔ raraŋ ŋǝ? Bai te ba! Duŋ ba nyɛ ne tu men te zǝk ta rumɔ.>> 38 Angɔŋgɔŋɔ akɔte bla abɛ te ambuk, ndi ne wɔ te Bulus ben Sila ayi ŋli kɛ Romawa, sǝsǝk ku vuŋ ba. 39 Akɔ gar ate ben ba te zǝk ba aru are Jaru m ɔ, te ben ba te abɛ duŋ ntuno. 40 Ndi Bulus ben Sila ne ru ne Jaru m ɔ, ne kɔmɔ ne kɔb kɛ Lidiya, amɔ nɛ te yik nki amunya te nǝk ba lɛ didik. Te kɔmɔ.