Atos 23

1 Bulus a tɔ angɔŋgɔŋ aba lɛ lǝlɛ te di, <<Amunzu mɔr, Mǝne na duŋ kɛ di Arik ne di bɛ na kɛ ne susun didik te nyɛ bǝn aliŋ.>> 2 Ne me Hananiya ŋgɔŋ ne bɛ bla lɛ kɛ Arik a di abaŋ di aklɛ kli gbahir bǝn bɔu bɛ ŋɔru ne ne. 3 Fe Bulus adiu, <<Arik atei ŋuru miyi, kɔntsin keŋ di ne kin kɛ ntɔŋ! Usɔŋ ne bem te ubǝ tǝm ambuk ne lɛ kǝ Arik kǝ cɛr Musa ndi wa miyi bau zǝ kɛ ba, te di ubǝ ŋur me.>>

4 Abaŋ ndi a kɛ kli gbahir bǝn Bulus adi, <<Anii duŋu yen ngɔŋ nena ndum kɛ Arik?>>

5 Bulus adi, <<Amunya, bam ne zhi te di ayi ŋɔk ne na ndum kɛ Arik ba. Ne cɛr te di; <Kǝr bɛ lɛ mimin ne tu yi ŋgon ne Gli aneshir ba.>>>

6 Fe Bulus, ne zhi tedi anuŋ ne min mine ayi Sadusiyawa ben Ferisawa, alɛ nǝ kɔr ngɔŋ ne akpa ne bin aner angɔŋgɔŋ te di, <<Amunzumɔr, me yi Bafarisi, ne ŋli Ferisawa. Me kɛ kli ne amkpa ane te ambuk te nzhɔk susun ne ku te lu abɛ ku.>> 7 Ndi Bulus ne bla amɛ, antam ne lu ne atsutsu ane Ferisawa ben Sadukiyawa, aneshir ne gab ate tek ya. 8 (Ane Sadukiyawa adi iku te lu ba yime ba, abɛ shar ayou Arik ba yi ame ba ben zhu ba na yime ba, amɛ Ferisawa ne tanyɛme ne kiyiŋ bɔbɔk.)

9 Ne te atam tetɛk, abɛ tsar lɛ kɛ Arik anuŋ ndi ayi Ferisawa ne lu te tǝ atam ŋgon. <<Bata ne yik kinuŋ mimin ne tu yi ner waŋa ba,>> adi. <<Te yiŋ ndi ayi zhu kɔ abɛ shar ayou Arik ne lɛ bene bau nai?>> 10 Ndi atam ne lu ŋgon fe sisik ne vuŋ ŋgon ne bɛ tyak kum kǝr abɛ lu tyak Bulus ne mkpaŋ nuŋ ba. Aduŋ abɛ tyak kum a zi te bɛ kɔte ban Bulus te kɔmɔ ne amkpa ne sɔŋ amen.

11 Ne bu yi ku zǝ Arik ne kli gbahir ben Bulus te di, <<Be kli gbamgbaŋ! Ndi ne bla lɛ muŋ ne Urshelima, ne me utei na bla kǝ nǝ Roma.>>

Yahudawa ne kpa nyak te bɛ ŋun Bulus

12 Ne bɛr yi yaa, Yahudawa nuŋ ne bin te kpa yak te sherim aba ba te li te sɔ ba sɛ ba ne ŋun Bulus ne liŋ. 13 Aneshir bɛ naŋ sɔk nas aba ne kpa lɛ keŋ yak. 14 Ne gar bǝn ŋɔk ne na ndum kɛ Arik bǝn angɔŋgɔŋ bɛ Akabaŋkɔŋ te di, <<Ta ne she arim ŋɔk te di bata te so te li kinuŋ ba se ta ne ŋun Bulus. 15 Azizaŋa izhin aba bǝn nki angɔŋgɔŋ izhin bǝ shar bǝn ngɔŋ ne abɛ tyak kum tǝ bɛ gli Bulus agli nyɛmɛ bene bɔu ndi izhin tena rib bu lǝlɛ nuŋ netu ayi lɛ kɛŋ ndi azǝn zhɔu goŋ rime. Ta ne ka na gli ta tei ŋunu bane yir bene bɛ zhin ba.>>

16 Ne me ndi vǝvǝn ayou va men ane Bulus ne wɔ kiyiŋ ndi ne kpai aŋyak, ne gar amkpa ne sɔŋ abɛ tyak kum te bla Bulus.

17 Fe Bulus azho zhiin nemin angɔŋgɔŋ abɛ te ambuk alɛ te diu, <<Gli vǝvǝn waŋa te gar ben ŋgon ne tyak kum, ayi ne kiyi blau.>> 18 Fe agliu te gar ben ŋgon ne tyak kum.

Ne yi ne min abɛ te ambuk alɔ adi, <<Bulus ne yi ne amkpa ne ku aneshir, ne shar bene bɛm te bɛ Gli vǝvǝn waŋa te ye ben abɔu te ayi ne kiyi blau.>>

19 Ŋgɔŋ ne tyak kum a vuŋ vǝvǝn ne ŋɔk, te gliu te gar kɔn sa te rib bu, <<Utei blam anii?>>

20 Vǝvǝn ne adi: <<Yahudawa anuŋ ne tanyɛme atei shar bǝn bɔu te ubɛ gli Bulus te gar amkpa ane ambuk amblimblɛ atei kama Gli tedi aba atei na rib bu ikiyiŋ ndi itsin netu maa. 21 Kǝr ubǝ tanyɛme ba, te aneshir abǝ naŋ sɔk nas akɔkur nǝ zǝzǝk te kur ablɛu. Ne shɛrim aba batei so tena li ba se aba ne ŋun Bulus. Ne ka na kli azizaŋa, aklɛ ŋub te abɛ tanyɛme ne shar men.>>

22 Ngɔŋ ne tyak ikumɔ aduŋ vǝvǝne kɔmɔ te gbaŋu atɔŋ, <<Kǝr ubɛ bla nuŋ tedi une blam lɛ kǝŋe ba.>>

Ne tur Bulus te duŋ gar ben ŋgɔŋ ne Gli Filikus

23 Fe ne zhɔ abɛ tyak kum amɛ yaa tedi ba, <<Lu zhin te vu zhin ngɔŋgɔŋ abɛ tyak kum amɛ yaa, ben abɛ sa nŋa amɛ sɔk wur me taŋgba ben abɛ Gli kab azhin ayaa te gar zhin Kaseriya ne mkpaŋ teres kɛ amgbalu bu. 24 Duŋ zhin Bulus ayuŋ nŋa te bɛ gliu kiki maa te gar ben ngɔŋ ne gli Filikus.>>

25 Ngɔŋ abɛ kpaakpa ne cɛr amplɛ te di:

26 Ire ben Kaludiya Lisiya,

Te gar ben ngɔŋ ne Gli Filikus:

Me tegu tetɛk.

27 Ner waŋa ne tau ne aŋɔk ane Yahudawa ne tǝ te ba bɛ ŋunu, Mne nyɛ bǝn abɛ tyak ikumɔ tǝ ntau zhɔk, mne zhi tǝ ayi ŋli kɛ Roma. 28 Mǝne te tem zhi te Bulus ne naa ba anii, Me gliu te ngar amkpa ane te ambuk amene. 29 Me ne yik lɛ keŋ ndi agliu ma bane bin ben kiki iyi na men ba, bane na kinuŋ ndi ne mla ŋunu kɔ zhɔ gu ne jaru ba. 30 Ndi ne blam ikpa nyak yiŋ ndi ne tei netu maa. Mǝne turu ngar ben abɔu andanda. Mǝ ne na ndi abɛ wɔb bu nɛ lɛ abɛ gar tɛ te blau ikiyiŋ ndi ne naa ba.

31 Fe abɛ tyak kum, akɔ na kiyiŋ ndi ne di abɛ na, te baŋ Bulus ne bu te gliu te gar ben Antibatiri. 32 Ndi bɛr ne ŋan ne duŋ abɛ sa nŋa gliu te kɔmɔ, fe abɛ tyak kumɔ akam ŋur akam kɔmɔ ne amkpa ne sɔŋ amen. 33 Ndi abɛ sa ane nŋa ma ne yir Kaseriya, nɛ nǝk ngɔŋ ne Gli ntun icɛr yi ngɔŋ ne tyak kumɔ te nǝgu Bulus. 34 Ndi ngɔŋ ne gli ntuno ne tɔ cɛrǝ arib Bulus tedi uyi awɔnǝ mee. Ndi ne zhi tedi are Kilikiya, 35 ngɔŋɔ adi, <<M tei wɔ kɔ azǝbu ne nii ndi abɛ zebu ma ate nyɛ.>> Ankyak akɔ duŋ ba nyak Bulus ne bur Hiridus.