1 Ndi tane ka lieru ne kɔtɔŋ keŋ ndi azho kɛ te Malita. 2 Abɛ sɔŋɔ amɔ ne naa ta ki didik iyaŋ ŋursuk. Ne mɔ klu tena ta ta bɔbɔk ndi alu azǝn ku mvlu na te. 3 Bulus ne biŋ ankaki, ndi atei shurǝ ne lu, iwah yi tus, nguŋgu lu vuŋǝ, ikɔte nyɛn ŋɔk kɛ Bulus te fau. 4 Ankyak ndi abɛ sɔŋ ne amkpama ayik iwama ne nyɛnu ne ŋɔk, akɔdi akpa mɛn, <<Ineshir waŋa atei yi ne ŋlɔk aneshir; kɔ ndi ne na yaru ne nek ngɔŋ, iyaŋ na lɛ didik iduŋu bai lieru ba.>> 5 Fe Bulus ne mes iwama azhɔk ne lu bane wɔ kinuŋ ne kpa maa ba. 6 Aneshir a shurɔ yi te aba abɛ yik amkpa maa ne wu tɛ tuno zhaku, fe ndi ne dǝk te zen shurɔ yi bane yik kinuŋ ne nau ba, akama sen asusun men tedi ayi Arik.

7 Ne mwɔ, waŋa ayi nuŋ waŋ ndi azhɔu te Babiliyus, ngɔŋ ne amkpama. Ne ta ta ne kɔmaa iber mai tar te naa ta didik. 8 Tetɛɛ maa ikpa ne ŋuru vuŋ te akɔkur, azǝn yik iyah nǝ lɔ lamuka te bene ja. Bulus ne yir te yigu te nau tǝ nɛ rɛ. 9 Fe ndi ne yi amɛ, nki abɛ lɔ kpa ne ntuno anyɛ ne naa ba te ne rɛ. 10 Ne nǝk ta ngɔŋ ne nkuŋkɔŋ tetɛk fe ta neka tei lu, ne nǝk ta kiki tetɛk iyi wɔb mɔr.

11 Ndi ihwa tar ne gayir, tane lu ne malita te zǝ gu kɛ Alikzandariya ndi ne nakǝ te sub izhu atagwe arik amɛ yaa kastɔ bǝn Pullus. 12 Tane klɛ ne Sirakus iber tar amɔ. 13 Tane na lu amɔ te yir ntun yi Rigiyum. Nǝ ŋen bɛr, nguŋgu yi amgbalu ne tei fe bɛr te ŋan ta yir Futiyoli. 14 Amɔ tane yik abɛ zi Arik ne di tabǝ te sati zhin bene ba. Ndi amɛ tane kɔmɔ ne Roma. 15 Amunya amɔ ne wɔ ŋyɛ mɔrɔ, tǝ nɛ vuŋ tsǝn ibaŋ rɛ Afiyus, bene amkpa ne sɔŋ sik anuŋ awaŋa ndi azhɔu te abene sɔŋ sik atar tǝ bɛ mla bǝn ta amɔ. Ndi ne yik anere Bulus ne nyere Arik tena ŋuro klik. 16 Ndi tane yir Roma, ne duŋ Bulus a sɔŋ kiki maa, ben ne kpaakpa waŋ ndi atei blɛu.

17 Ndi iber tar ne gayir, ne zhɔ aner abiŋ amɔ aŋgɔŋ anuŋ abɛ Yahudawa. Ndi ne biŋ, Bulus adi ba: <<Amunyamɔr, mne zhi bam nǝ naa aneshir amɔr ikinuŋ yi cɔk susun la ba kɔ kam ŋglak lɛ kɛ ŋyak atsintsime mɔr, ne vuŋ me ne Urushelima te baŋ mǝ a nǝk Romawa. 18 Ne rib me te di abɛba, te bam ni lalɛ nuŋ kɛ mla ku ba. 19 Fe Yahudawa akyak ilɛmɛ, Ankyak mne baŋ ilɛmɛ te gar ben kaisar. Bai nyer muŋ ba tem baŋa aner amuŋ te bɛ yaa ilalɛ nuŋ. 20 Ndi yeme, mne wɔb tem yik zhin te lɛ bene abɛ zhin. Ayi ndi ijɔk susun kɛ Isrela iyi ne kpam ne atabɛrbɛr.>>

21 Akɔ sagu ma, <<Ba tane ta icɛr mplɛ nuŋ rɛ Yahuda ne atu amin ba, ba nuŋ ne min kɛ anere mɔrɔ waŋ ndi ne rɛm wɔ te bla lɛ mimin ne tu mi. 22 Fe tane di tab wɔb te ta bɛ wɔ iki yiŋ ndi utǝ blai, te tane zhi te neshir kɔte me bane tanyɛmɛ ne zǝ Arik yayas yiŋɛ ba.>>

23 Ne kpa nyak ndi atei yik Bulus bɛr nuŋ, te nyɛ ne du ne abɛ ne sɔŋɔ maa. Ne bla ba ilɛmɛ ibaŋ rɛ amblimblɛ mla nǝ ku arik, abla lɛ kɛ kɔb Arik, te baŋ rɛ nkanlɛ yi Musa, bǝn abɛ na ndum Arik tǝ wa abɛ baŋ asusun mǝne tɔ gar nǝ lɛ kɛ Yesɔ. 24 Anuŋ ne tanyɛme nǝ lɛ kɛ bla maa, anuŋ ne kyak. 25 Ne gaaŋa ne akpa mɛn te ŋar azhizhin ndi Bulus ne lǝlɛ kɛ klɛ maa: Izhu tsetser ne bla lɛ atsintsim amɔr ilɛ didik ndi ne di nenu akɛ Ishaya ne nau ndum maa:

26 <<<Gar ben aneshir abaŋa te di,

<<Izhin tei wɔ ba zhin tei zhi ba;

Izhin tei tɔ ba zhin tei yik ba.

27 Tǝ asusun aner abaŋa neka kama yi ashishir;

Itei lɔ ba wɔ ne tɔŋɔ men,

Nena ku ayi men.

Mba amɛ ba atei yik ne ayi amen,

Tena wɔ ne atɔŋ amen

Tena zhi ne asusun amen

Tena kam aŋyak bene bɛm, fe nga M tei zuk ba shur.>

28 <<Fe ngam wɔb te izhin bǝ zhi te ta zhɔk ye Arik ne sharu bene abaŋ ndi bai Yahudawa ba, atei wɔ!>> 29 Ndi Bulus ne bla amɛ, fe Yahudawa akɔ lu te te antam ne akpa.

30 Nǝ min kɛ ase yaa anenen Bulus ne sɔŋ ne kɔb keŋ ndi ne nyagu tǝ ta anere abaŋ ndi ne nyɛ bene bɔu. 31 Te zen bla lɛ kɛ kɔb ngɔŋ kɛ Arik, bǝn tsar ne atu yi Ŋgɔŋ Yesɔ kristi iyaŋ klu sǝsǝk, ba nuŋ ne yaru ba.