1 Ndi bɛr sɔk tuŋ ne nyɛ, neyi amkpa azhiin bɔbɔk mǝne. 2 Ankyak awɔ igu ndi ŋguŋgu rɛ shu te nyɛ shak kɔb keŋ ndi akɔsɔŋɔ. 3 Akɔ yik laŋ ndi iyi ndi lǝlɛn lu te nyɛ gab sɔɔŋ ba netu. 4 Bɔbɔk mǝne, Izhu Tsetser ku shak ba, akɔ lɛ ne aŋa kaaŋkaŋ, ndi Izhu Tsetser ne nǝk ba.

5 Nǝ mkpaŋa Yahudawa anuŋ abɛ rɛ ntuntun yi gɔŋmimi ndi asɔŋ ne Urshelima abaŋ ndi aklu sǝsǝk Arik. 6 Ndi ne wɔ igumɔ, tǝduŋ abiŋ te kime ne shak ba susun, te kɔte ŋɔwa awɔ ba alɛ ne aŋa amaa. 7 Ndi ikime ne shak ba susun arib te di: <<Aner abaŋa ba yi aner abɛ Galili kai? 8 Aye nii tsǝn tǝ ta wɔ kɔte ŋɔwa ne miŋ mɔrɔ awɔlɛ ne aŋaa aye kɔmen? 9 Tayi ane Patinya, ane Midiya, ben ane Lametiya; abɛ sɔŋ ne Mesopotamiya, Yahudiya ben Kafadɔsiya, Pontɔs ben Asiya, 10 Firijiya, ben Bamfiliya, ben Masar, ben gar kɛ Libiya yaŋ Siren; acɛn abɛ rǝ Roma 11 (Yahudawa ben abaŋ ndi ne cɔk aglik bǝn abɛ zǝ lɛ kɛ tanyɛmɛ Yahudawa); Karita, bǝn Larabawa, ta wɔ ba abla kiki ngɔngɔŋ yiŋ ndi Arik nɛ nai ne aŋa amɔr!>> 12 Bɔbɔk mǝne ikime ne kpa ba tu ne vuŋ anu, te rib akpa mɛn tedi, <<Waŋa ayi anii amei?>>

13 Ankyak anuŋ, akɔ mlakba te di, <<Nǝ mli iki rǝrǝ te zen hwa.>>

14 Ankyak Biturus ne lu akli ne miŋ kǝ amɛ awur anezhiin abaŋa, ne lɛk kɔr tedi: <<Amunzumɔr Yahudawa bǝn aner abɛ Urshelima, shur zhin atɔŋ te wɔ iki ndi M tei mbla zhin. 15 Aner abaŋa ba hwa ba ndi zhin yik ba me, azizaŋa ayi mkpaŋ kɛ teres kɛ amblimblɛ! 16 Duŋ zhin, waŋa ayi lɛ keŋ ndi ine bla shar yi Arik Ijue ne lɛ:

17 Arik ne di, <<<Mkpaŋ tei nyɛ klɛtu ndi,

M tei mbwaa aneshir kab Izhu muŋ.

Amunlum ben amunamba atei bla iki yi nyɛ ne ti,

Amunanzak atei yik iki yi nyɛ ti,

Anunkub atei te rimla.

18 Agɛn abaŋ ndi azǝm alulum bǝn amba,

M tei mbwa Izhu Tsetser muŋ ne bɛr yi nyɛ,

A tei bla kiki iyi nyɛ ne sak muŋ.

19 M tei ntsar kiki ngɔngɔŋ ne shu

Bǝn ngir ne gɔnmimi kɛ shin,

Azhizhi bǝn ilu, bǝn ntsiŋ ngɔŋ.

20 A tei duŋ aririk akam atǝ ibu

Fe ihwa tei kam te azhizhi

Fe bɛr ngɔŋ iye Arik iteishi nyɛ.

21 Waŋ ndi ate ben

Nǝ sak kɛ Arik atei yik ita zhɔk.>

22 <<Aner abɛ Isrela, wɔ zhin lɛ kǝŋe: Yesɔ Awɔnǝ Nazara, iner waŋ ndi Arik ne bla zhin tedi iwa ne tanyɛme ben abɔu, ben kiki ngɔngɔŋ ndi ne nai, ben kiki yi vuŋ anu ndi nena, ben iki yik ne ayi ndi Arik ne nai ne aŋɔk amaa, ndi izhineba nǝ zhi. 23 Yesɔ waŋa ayi Arik wa ne tanyɛmɛ te nek zhin ne wu ne zhi maa bǝn zhin yi susun maa izhin ne kpaanu bǝn aner amimin te kɔru ne nkunkun kɛ gen, te ŋunu ne aŋɔk ayi aner abɛ na zumimiŋ. 24 Fe Arik ne lɛgu ne kumɔ, te iku bane gliu yir ba. 25 Doda ne lɛ netu maa te di:

<<<Kɔ te mkpaŋ takɛ me yik Arik bene bɛm.

Ayi ne ŋɔk li muŋ,

Sǝsǝk kinuŋ ba tei vuŋ me ba.

26 Ne me, susun muŋ ne klak, fe anu amuŋ atei gbar Arik asak,

Ikpa muŋ maayi itei yik suŋ sik te shur ayi,

27 Fena bau tei tyak me zhɔk ne bɛ ba,

Bau tei duŋ iner ami tsetser abɛ ku te bɔ ba.

28 Ai wa Une tsar me nkuŋkɔŋ yiŋ ndi M tei vli;

Utei na duŋ mna nyɛr ne timi.>

29 Biturus adi, <<Amun zumɔr, M tei mbla zhin ne susun zhiin netu ayi ntsǝntsǝm amɔr Doda, ndi ane ku, ne ruu, ibɛ maa iyi bǝn ta har aliŋe. 30 Fena Doda ayi ine bla shar yi Arik ndi ne zhi te Arik ne kpai anyak tedi, iwa a tei tun nuŋ ne aŋa amaa abaŋ asak ne mben ngɔŋ maa. 31 Fǝ ndi Doda ne yik amɛ, te nena bla netu ayi lu Almasihu ne bɛ, tedi ba tei duŋu ne min bɛme ba, ikpa maa batei na yik bɔ ba. 32 Yesɔ waŋa, Arik ne lɛgu ne bɛ bɔbɔk mɔrɔ tani yik amɛ ne ayi amɔr ilɛ mɛ iyi zub. 33 Ne baŋu te kɔte nyagu ne ŋɔk li kɛ Arik, tena ta mben Tetɛɛ maa ne ikpa nyak yi Izhu Tsetser tena bwa shur iki ndi izhin yige tena wɔi. 34 Tǝ, Doda bane yuŋ shu ba, ama wa ne tu maa ne di, <<<Arik ne di Ŋgɔŋ amuŋ: <<Zisɔŋ ne ŋɔk li muŋ 35 Se mne nduŋ abɛ kyagu yi abɛyi ki caŋ ne aza mi.>>>

36 <<Neme duŋ aneshir abɛ Isrela azhi te di: Arik ne duŋ Yesɔ waŋa, ndi ne kpaŋu ne kuŋkun kɛ gen, ayi wa Ŋgɔŋ tena yi Kristi.>>

37 Ndi ne wɔ me, ilɛ mɛ ne tur ba ne susun, akɔdi Biturus bǝn nki abɛ tsene maa,<<Amunzumɔr, ta tei na kikini?>>

38 Fe Biturus adi ba, <<Izhin bǝ nek asusun amin, te abɛ su zhin, kɔte ŋɔwa ne sak kɛ Yesɔ Kristi, te zuk zhin azhɔk ne zumimin min, atei na nek zhin Izhu Tsetser. 39 Ikpa nyaga iyi min ben amumun amin ben abaŋ ndi ayi gbagbaŋ abaŋ ndi Ŋgɔŋ Arik amɔr atei zhɔ ba.>>

40 Biturus ne ben ba bǝn anuŋ tetǝk, te gbaŋ ba atɔŋ tena nǝk ba lɛ, tedi, <<Izhin bɛ gli atu min igli rumɔ ne gɔnmimi mimin kǝŋe.>> 41 Abaŋ ndi ne tanyɛme nǝ lɛ maa ne su ba ne bǝn, aneshire idu mǝne ne vuŋ azhin atar.

42 Fe nɛ nǝk mkpaŋ men ben abɛ na ndum tsar amaa te vuŋ abɛ biŋ atu amen, tena gab kili, te ben Arik. 43 Fe sǝsǝk ku vuŋ kɔte ŋɔwa, kiki yi vuŋ anu tetɛk ne aŋɔk aye abɛ na ndum kɛ Arik. 44 Bɔbɔk abɛ zǝ Arik neyi amkpa zhiin tena kiki men abiŋ aŋkun azhiin. 45 Ne vu kiki men alɛb, te gab azɔbɔ ne kpa men ndi iyah yi ŋɔ yime 46 kɔte bɛr tayi akɔmɔ ne akaba ne susun zhin te zen gab kili ne akɔbɔ men, ali kili ne nyɛr ne min kɛ sik susun. 47 Agbar Arik tena nyɛr ijɔk susun kɛ aneshir. Fe Ŋgɔŋ ne duŋ abaŋ ndi ne tau ate du.