1 Ndi Bulus ben abɛ tsǝn amaa ne gar azǝ miŋ Amfiboli bǝn Apolɔniya, ne nyɛ Tasalɔnika, ndi ne yik akaba ane ku ayi ayou Yahudawa. 2 Ndi ne yiu kiki na maa, Bulus akɔmɔ ne akabaŋkɔŋ ŋɔ, ne bɛr yi sɔŋ sik mei tar te zen wɔ ba ne lɛ kɛ Arik, 3 Abla tena duŋ ba zhi te Mezaya atei yik iyah tena lu ne ku. <<Yesɔ waŋa ngam mbla lɛ zhiin te wau yi Mezaya ma.>> Adi. 4 Yahudawa anuŋ ne tsi klɛ te aba abɛ zǝ ane Bulus ben Sila, ne mee aner tetɛk abaŋ ndi aklu sǝsǝk Arik Helɛnawa ben amba nuŋ angɔŋgɔŋ abaŋ ndi atɔ ba shagai.

5 Fena Yahudawa nuŋ alɔ te ankiŋki, akɔ gyagmu nuŋ te babɛ cɔk ba la ne garke dubɔ, ne aneshir te kɔ lɔk mgbu ne ntuno. Akɔ nama andanda te gar kɔb kɛ Yason te ba wɔb Bulus ben Sila te babɛ baŋ ba sak aneshir ne aŋɔk. 6 Ndi bane te yik ba ba, akɔ gbaŋ Jason arumɔ ben abɛ zǝ Arik anuŋ ne ti kɛ angɔŋgɔŋ abɛ ntuno, te aya atɔŋ: <<Aner baŋa azǝn shɔk mgbu nyak ne goŋ mimi ne nyɛ ayaŋa, 7 Fena Yason ata ba aŋyak ne kɔmaa. Bɔbɔk mǝne azǝn cɔk cɛr yi itum ŋgɔŋ ne Roma ndi azhɔu te kaisar ala tedi Itum nuŋ, waŋ ndi azhɔu te Yesɔ.>> 8 Fe ndi ne wɔ me, ntsan aneshir ben ntuno ben abaŋ ndi ana ndum ŋas angɔŋgɔŋ aner ne wɔ me fe susun mǝne cɔk la. 9 Ankyak akɔ ta ŋɔk kɛ Yason ben nki aner fe te duŋ ba kɔmɔ.

10 Ndi ibu ne ka shir, amunya akɔ tur ane Bulus ben Sila te duŋ ba kɔmɔ ne Biriya. Ndi neka te yir amɔ, ne te yir amkpa ane akaba Yahudawa. 11 Ayaŋa aner abɛ Biriya ba yi ne lǝktu ba ndi abɛ Tasalɔnika, ne ta lɛ kɛ Arik ne nyɛr tena shur ayi te ba abɛzhi ilɛ kɛ Arik kɔte bɛr tayi tena yik ka iki ndi Bulus ablai iyi anenen o. 12 Yahudawa tetɛk ne ta nyɛmɛ ne lɛ kɛ Arik, ndi angɔŋgɔŋ amba nuŋ abɛ Helɛnawa ben alulum menyi.

13 Ndi Yahudawa abɛ Tasalɔnika ne wɔ te Bulus azǝn bla lɛ kɛ Arik ne Biriya, akɔ gar amɔ menyi, te kpur aneshir tena shɔk ba. 14 Amunya akɔ nama ndanda te duŋ Bulus akɔmɔ nenu nek, fe Isila ben Timoti ne sɔŋ ne Biriya. 15 Alulum abaŋ ndi ne zǝk Bulus tena gliu te gar Antina te lɔ duŋ ishar abɛ Gli Sila ben Timoti te bɛ ka yik wa ndi ishara te yik ba ndanda.

16 Ndi Bulus azǝn ŋub nyɛ ane Timoti bǝn Sila ne Antina, isusun maa ne wu shaga ne ntuno te anere azǝ ane arik tetɛk. 17 Ankyak akɔ ta nyɛmɛ ne akaba amene ben Yahudawa ben Helɛnawa abɛ klu sǝsǝk Arik, bene abaŋ ndi ayi ne garke dub kɔte bɛr tayi ben abaŋ ndi aye amɔ. 18 Ne mee ntsan aneshire abɛ Abikuriya bǝn Sitɔkiya abɛ yini amkpalaŋ akɔ nga aŋa bene bɔu. Anuŋ ne min mǝne arib, <<Aye nii ne ya atɔŋ waŋa a blai?.>> Anuŋ akɔ di, <<Ayi ndi awɔb tsar izhi arik ayayas.>> Adi amɛ te Bulus azǝn bla lɛ didik netu Yesɔ ben Lu maa ne ku. 19 Ankyak akɔ baŋu te gliu agar ne igbu yi Arasa, ndi aneshir ne biŋ amɔ, te diu, <<Ka tei zhi tsar yayas iyiŋɛ ndi uglei nyɛmei? 20 U gli kiki yayas nyɛ atɔŋ amɔr tǝ ta di tabǝ wɔi ka di kikin.>> 21 (Ntun yi Antina ben acɛn abaŋ ndi ne baŋ mkpaŋ te kɔsɔŋ isha yaŋ ki na te zen lɛ lǝlɛ yiŋ ndi aba wɔi ben yayas.)

22 Bulus alu aklɛ ne amkpa anǝ biŋe tedi; <<Izhin aner abɛ Antina! Mniyik te kɔte mee izhin ye abɛ zǝ arik ŋgɔŋ. 23 Ndi mne ngɔŋri tena ntɔ bwe iki ndi izhin zǝǝ ma, mne na yik itu cɛr. Tɔ arik waŋ ndi bane zhiu ba. Azizaŋa iwaŋ ndi izhin zeu ndi ba zhin ne jiu ba M tei bla zhin lɛ ne atu amaa.

24 <<Arik waŋ ndi nɛ na goŋmimi ben kɔte nii ne miŋe ayi Ŋgɔŋ ne shu ben goŋ mimi ba sɔŋ ne akaba ndi ne meu ne aŋɔk ba. 25 Fe ba na zo gu naki nuŋ iye aŋɔk ba, ndi awɔb kinuŋ, te Iwa ne tuu maa anǝk aneshir susun ben vli ben kɔte nii. 26 Ibaŋ rɛ ina neshir zhiin, nena ntun yi aner abɛ goŋ mimi, te bɛ Gli bɔbɔk; tena na mkpaŋ kɛ nyak te ben abɛ ane sɔŋ amene anenen. 27 Arik ne na amɛ te aneshir abɛ wɔb wa ndi ai ka lɔ ŋam wa te yik wa, ndi amɛ ba yi shaan bene be ta ba. 28 <<Nǝ min maa taku sɔŋ tena tsǝn tena na ki ndi ta nai.>> Ndi anuŋ abɛ duk asem nkenlɛ adi, <Ta yi abɛ nga ŋli maa,>

29 Fena te yi ndi tayi nga ŋli kɛ Arik, kǝr tabǝ yik ndi ngɔŋ kɛ azurfa kai zinariya ka tei yi mkpaŋai zhu iyi na neshir ne ŋɔk maa. 30 Ikukub Arik ne kyak nyak na ki mimin mɔr, fe azizaŋa ne di aneshir kɔte me abɛ duŋ na ki mimin tena sɔŋ didik. 31 Arik ne nyak bɛr yiŋ ndi Iwa atei tei goŋmimi ŋas adidik bǝn Ineshir ne hria amaa. Ne tanyɛmɛ ne lɛ kɛ bla maa bene aneshir ndi ne lɛk Yesɔ ne ku.

32 Ndi ne wɔ lɛ kɛ kam lu ne ku, anuŋ akɔ lɛ bɛs, fe anuŋ adi, <<Tei na wɔb wɔ ilɛmɛ.>> 33 Fena, Bulus aduŋ sɔŋɔ. 34 Amɔ aner anuŋ ne ta nyɛmɛ te zǝ Bulus te ta lɛ kɛ Arik. Ne min mǝne ai Diyonisiyus, izhiin ne min abɛ biŋe, ben uwa nuŋ ndi azhɔu te Damaris, ben anuŋ amene.