1 Aner anuŋ ne zi are Yahuda agar Antiyok te zǝn tsar amunya: <<Mba zhin te duŋ akɔk zhin zǝk ba, ne bla yi cɛr Musa, ba zhin tei lieru ba.>> 2 Iyiŋɛ ne duŋ Bulus ben Barnaba ne gaaŋa tena te antam bene ba. Fe ne hria Bulus ben Barnaba, ben aner abɛ ta nyɛmɛ ne lɛ kɛ Arik anuŋ abɛ yuŋ agar Urshelima abɛ te yik abɛ na ndum amaa bene angɔŋgɔŋ abaŋ ndi ne hria ba netu lɛ kɛ ribɛ. 3 Abɛ na ndum ne akaba ma azhɔk ba ne ankɔŋ te duŋ ba ru, ndi ne tsǝn te gara zǝ Folisiya ben Samariya, abla ndi aner abaŋ ndi bai ŋli Yahudawa ba ne ta lɛ kɛ Arik. Iyiŋɛ ne duŋ nki amunya ne nyɛr ngɔŋ. 4 Ndi ne nyɛ Urshelima, aner abɛ akaba amɔ ne taba ben abɛ na ndum maa ben abaŋ ndi ne hria ba, te bla ba kiki ndi Arik ne nai ne aŋɔk amene.

5 Fena anuŋ abaŋ ndi ne ta lɛ kɛ Arik ndi aklɛ ne goŋ kɛ ane Ferisawa alɔ kli tedi, <<Iwaŋ ndi bai ŋli kɛ Yahudawa ba se ne kɔgu zǝk baliŋ te na zǝ nkenlɛ yi cɛr Musa baliŋ.>>

6 Abɛ na ndum amaa bene abɛ hria amaa ne zǝ sɔŋ ne nkenlɛ iyi ribɛ. 7 Ndi ne baŋ mkpaŋ ne lɛme, Biturus a lɔ klɛ te lɛ bene ba: <<Amunya, izhin ne zhi te mkpaŋ nuŋ kǝme Arik ne hria ne miŋ kɛ abaŋ ndi bai ŋli Yahudawa ba ai ka wɔ nenu amuŋ ishar yilɛ yayas tɛ ka ta nyɛmɛ. 8 Arik, waŋ ndi ne zhi susun, ne tsar tena ta nyɛ bama te nek ba Izhu tsetser, ndi ne na nek ta mɔr yi. 9 Bane duŋǝ iyi kaaŋkaŋ ne atu amɔr ben aba ba, ne ŋla asusun amene ne ta nyɛmɛ. 10 Fe azizaŋa, anii te izhin ten Arik te baŋ hru sak abɛ na ndum amaa ne gbaktɔ ihru keŋ ndi itaba kai atetɛ mɔr ai baŋ kɛ yir? 11 Bai tǝ ba! Tani ta nyɛmɛ tei na Yesɔ Ŋgɔŋ amɔr te tabǝ lieru ndi aba yime.>>

12 Aner abɛ sɔŋ wɔmɔ bane na bu anu ayir ba ndi ne zen wɔ ane Barnaba ben Bulus abla ba iki ngɔŋgɔŋ yi vuŋ anu ndi Arik ne naa baŋ ndi bai ŋli Yahudawa ba ne aŋɔk amen. 13 Ndi ne klɛ, Yakubu alɔ klɛ te lɛ: <<Amunya, wɔm azhin. 14 Siman neka bla ta ki ndi Arik ne kuti atsarǝ ndi ne abaŋ aba ndi bai ŋli kɛ Yahudawa ba te abɛ yi amaa. 15 Ililɛ yi aner abɛ bla lɛ kɛ Arik ne ta nyɛmɛ ne yiŋɛ, ndi ne cɛrǝ:

16 <<<Iyiŋɛ te gayir M tei ŋur nkam

Tǝm na nkam mɛ Doda akaba ndi ne zǝr

Mkpǝmkpa yi zǝr M tei mɛi, tena ŋglǝi nyaga,

17 Te aner abaŋ ndi ne dǝk abɛ wɔb Ŋgɔŋ,

Te abaŋ ndi bai ŋli Yahudawa bɛ zhɔ sak muŋ,

Ŋgɔŋ ne bla, ai waŋ ndi ana ki yiŋɛ>

18 Ndi Arik ine zhi ire kukub.

19 Yakubu adi <<Ai te ambuk amuŋ, ne mɛ, kǝr tabǝ duŋ kime bǝ yi ne iyah ben abaŋ ndi bai ŋli Yahudawa ba ndi ne ta nyɛmɛ ne lɛ kɛ Arik. 20 Ndi amɛ tabǝ cɛr ba, te bla ba abɛ te shaan netu kili yiŋ ndi ne glak anerim, te kur bene amba kɔ alulum abɛ aneshir, ben inarum yiŋ ndi bane yak itu maa ba azhizhi bane na ru ba. 21 Tǝ Musa ne bla kɔte ntun tayi ne mkpaŋ kɛ kuti te bɛ bla kɛ ne akaba ne bɛr yi sɔŋ sik.>>

22 Ankyak abɛ na ndum maa ben abɛ hria amaa, ibiŋ ben abɛ akaba bɔbɔk, ne di aba tei hria aner anuŋ amene te shar ba ne Antiyok ane Bulus ben Barnaba. Ne hria Yahuda (waŋ ndi azhɔu te Barsabas) bǝn Sila, aner ayaa abaŋ ndi atei yi abɛ gli amunya. 23 Ne gli mplɛ kɛ cɛr ndi ne shar bama:

Abɛ na ndum Yesɔ ben abaŋ ndi ne hria bama, amunzumin,

Abɛbaŋ ndi bai ŋli Yahudawa ba ndi ne ta nyɛmɛ ne ta Arik ndi ayi ne Antiyok, Siriya:

Mtǝk zhin.

24 Tani wɔ te anuŋ nɛ duŋ ta ba ne zhi mɔr ba tɛ zen dam zhin, aduŋ asusun amin ate mfu ne kiki ndi azǝn lɛ. 25 Fe tane ta nyɛmɛ bɔbɔk mɔrɔ te tabǝ hria alulum anuŋ te shar ba bene bɛ zhin ne akpa mɔr Barnaba ben Bulus 26 alulum abaŋ ndi ne nek atu amen ne sak kɛ Ŋgɔŋ amɔr Yesɔ Kristi. 27 Ndi iye me ta baŋ shar Yahuda ben Sila te abɛ na te wɔ nenu ne ki ndi tane cɛrǝ. 28 Iyi ndi ire te Izhu Tsetser ben taba mɔryi te kǝr tabǝ tsǝ zhin ne kinuŋ ngɔŋ iyi luk ndi bai wɔb mɔr ba. 29 Izhin tei kam ti ne kili yiŋ ndi ne glak anerim, ne azhizhi, ben narum ndi ne ka itu maa kyaŋ, ben kur ben amba kɔ alulum abɛ aneshir. Izhin bǝ tsǝ klɛ te duŋ zhin ki yiŋɛ.

Ta duŋ zhin keke

30 Aneshir ne duŋ ba te kama zi kɔmɔ ne Antiyok, amɔ ne tuŋ abɛ ku ayi ne akaba abiŋ amkpa zhiin te she nek ba mplɛ kɛ cɛrǝ. 31 Yahuda ben Sila, abaŋ ndi aba du lɛ kɛ Arik menyi, ne lɛ te nek ba mgbyamgbyaŋ te amunyama abɛ tsi kli ne lɛ kɛ Arik. 32 Yahuda ben Sila, aba menyi aye aner abɛ na ndum Arik, ne lɛ tetɛk menyi te nek amunya mgbyamgbyaŋ. 33 Ndi ne baŋ mwɔ mkpaŋ bene ba amɔ, amunya ne zǝk ba te nek ba anu adidik akɛ sɔŋ kɛ sik te abɛ ŋur akam ate yik abaŋ ndi ne shar bama ne ne adidik. 34 Sila ne yigǝ ne rɛ tǝ wa abɛ sɔŋ amɔ 35 Ankyak Bulus ben Barnaba a sɔŋ ne Antiyok, ndi aba ben anuŋ tetɛk ne tsar tena du lɛ kɛ Ŋgɔŋ.

36 Nǝ mkpaŋ nuŋ kǝŋe Bulus adi Barnaba, <<Duŋ tabǝ kɔmɔ te yik amunya bɔbɔk abɛ yi ne ntuntun ndi tane bla ba lɛ kɛ Ŋgɔŋ tena yik ki na mǝne.>> 37 Barnaba ne di wa atei gli Yɔɔna, ndi na zhɔu te Markus, bene ba, 38 Fe Bulus bane yige ire te abɛ gliu ba, te ne lɔ klu te duŋ ba ne Bamfiliya te kyak ndumo. 39 Ne nga aŋa ngɔŋ ndi ne duŋ ba gab tsǝn mǝne. Barnaba abaŋ Markus te kɔmɔ ne Sipro, 40 fe Bulus wa ahria Sila te kɔmɔ, ne sak anu amunyama nena iyi Ŋgɔŋ. 41 Ne zǝ miŋ Siriya ben Silisiya, te nek aneshir lɛ ne mkpǝmkpa iye akaba te bɛ tsi klɛ mgbamgbaŋ.