1 Ndi iyiŋɛ ne gayir, Yesɔ nena muno ruu abɛ zeu tsǝn amaa, ne Inǝk ne Tibiriya. Waŋa ayi ir keŋ ndi ne nama: 2 Siman Biturus, Tɔma (ine zhɔ te atagwe), Nataniyel awɔnǝ Kana ne Galili, amun Zebɛdi, ben abɛ zeu tsǝn amaa anuŋ amɛ yaa ayi ndɔ. 3 Fena Siman Biturus adi nkime, <<Mru ngar vu ambɛ,>> fe akɔ diu, <<Ta tei gar ndɔ.>> Ankyak akɔ ru te kɔte yir miŋ igu, ama ne bu iyi bǝn bane vuŋ ikinuŋ ba.

4 Ndi anzaŋ azǝn ru, Yesɔ akɛ kli ne kɔtɔŋ inege, ama abɛ zeu tsǝn amaa bane zhi te ayi Yesɔ ba.

5 Fe Yesɔ azhɔ ba tedi, <<Akpaamuŋ, ba zhin ne vuŋ ambe nuŋ ka?>>

<<Ɔɔ, akɔ asagu ma.

6 Adi, <<Tyak burgi amine ne gar kɛ ŋɔk li ne tɔŋ gumɔ te izhin tei vu anuŋ.>> Ndi nena ne bla maa, bane gbaŋ burgime aru ayir ba te ambɛ tetɛk ayi ne miŋ burgime.

7 Fe izhiin ne abɛ tsene maa iwaŋ ndi anyeru ma adi Biturus, <<Ayi Ŋgɔŋ!>> Ndi Siman Biturus anak awɔu adi amɛ, <<Ayi Ŋgɔŋ,>> akɔ gen anklu ake abɛm amaa ne kpa (ane mǝne tun kɛ aŋyak) te tuk aku ne miŋ amashir. 8 Nki abɛ tsene maa azeu ne igu, agbur burgime ne ambɛ tetɛk ne miŋe, te anaga ri yi ne miŋ lelɔ inege, ilak gab mkpaŋ aza amkplik azhiin ne mimi. 9 Ndi ne te ru ganki abɛm, neyik ne mɔk lu te ten ambɛ me, ben mwɔ borodi.

10 Yesɔ adi ba, <<Glim azhin amɔ ambɛ anuŋ abaŋ ndi izhin ne vumɔ.>>

11 Siman Biturus ayir miŋ gumɔ te agbaŋ burgime agar kɔtɔŋ inege ne ambɛ tetɛk, 153, idu kɛ ambɛ ne miŋ burgime bane gbu aŋa ba. 12 Yesɔ adi ba, <<Nye zhin te tabǝ li kili iye amblimblɛ.>> Ba nuŋ ne miŋ kɛ abɛ zeu tsǝn amaa ne rib bu ba, <<Uyi ŋɔwai?>> Ne zhi te ayi Ŋgɔŋ. 13 Fe Yesɔ alu agar, abaŋ borodime te nyɛr Arik te nek ba; tena amɛ ne ambɛ me. 14 Waŋa ayi mkpaŋ kɛ ntar ndi Yesɔ amuno ruu abɛ zeu tsǝn amaa ndi neka lu ne ku.

15 Ndi neka li aklɛ, Yesɔ adi Siman Biturus, <<Siman izu Yɔɔna, une tanyɛme bene bɛm ilɛ didik inaŋ abaŋa yi?>>

Siman Biturus adiu <<E, Ŋgɔŋ,>>, <<Une zhi te mne tanyɛme bene bɔu.>>

Yesɔ adiu, Yɔk awanta amuŋ.>>

16 Yesɔ atara adiu mkpaŋ kɛ yaa, <<Siman izu Yɔɔna, unyer me ilɛ didik?>>

Ata nyɛmɛ tedi, <<E, Ŋgɔŋ, une zhi tem ne tanyɛme bene bɔu.>>

Yesɔ adiu, <<Ŋub awanta amuŋ.>>

17 Mkpaŋ kɛ ntar Yesɔ adiu, <<Siman izu Yɔɔna, <<Une tanyɛme bene bɛm i?>> Biturus akɔ abaŋ afuk ne ir keŋ ndi Yesɔ atara rib wa mkpaŋ kɛ ntar, <<Une tanyɛme bene bɛm i?>> Biturus adiu, <<Ŋgɔŋ, une zhi kiki yiŋɛ bɔbɔk; une zhi tem ne tanyɛme bene bɔu.>>

Yesɔ adiu, <<Yɔk awanta amuŋ. 18 Ngam blau lɛ didik, indi une ri yi vǝnenzak uduŋ ne tu mi te kɔmɔ ne amkpa ndi ugar; ama ndi utǝ cɛ, utei nab aŋɔk teduŋ inuŋ ashe suu anklu te gliu agar amkpa awaŋ ndi bɔu ne diu ugaru ba.>> 19 Yesɔ abla amɛ tǝ wa abɛ tsar ir kɛ ku keŋ ndi itei vuŋ Biturus te duŋu abɛ nek Arik ngɔŋ. Fe akɔ diu, <<Zǝm!>>

20 Biturus akam yik izhiin ne miŋ kɛ abɛ tsene maa iwaŋ ndi Yesɔ anyɛruma atsene zǝ ba. (Iwaŋ ndi neyi gbahir ne amkpa ane li kili iye amblimblɛ ndɔ ben Yesɔ tedi, <<Ŋgɔŋ, ayi ŋɔwa atei baŋu alɛb i?>>) 21 Ndi Biturus ne yigu, akɔ rib, <<Ŋgɔŋ, tǝ wa fa?>> 22 Yesɔ adi, <<Ate yi ndi M tei duŋu abɛyi tsitsir mla ne mkpaŋ kɛ nyɛ muŋ, anii mi iyi ne miŋei? Utei zǝm ne mgbyamgbyaŋ.>> 23 Ndi ne yi amɛ, iduk lɛmen ne yir miŋ kɛ amunya te izhiin ne miŋ kɛ abɛ tsene maa batei ku ba. Ama Yesɔ baa ne di ba wa atei yaŋ ku ba, <<Mte nduŋu ayi tsitsir mla ne nyɛ muŋ, anii iyi mi ne miŋei?>>

24 Waŋa ayi ne miŋ kɛ abɛ tsene maa ndi ne yik kiki yiŋɛ tena cɛrǝ asak. Tane zhi te iki iyiŋ ndi ne blai ai lɛ didik.

25 Yesɔ nena kikinuŋ tetɛk iyiŋ ndi ai bɛdi ne cɛrǝ zhi zhin bɔbɔk, igɔnmimi ne tu maa batei hru mgbɔk lɛ kǝ cɛrǝ yir ba.