1 Ndi yiŋɛ ne gayir, Yesɔ ne glɔ gɔŋ nek kɛ Galili (ndi ai inǝk ne Tibiriya), 2 ankyak ntsan aneshir azeu te ne yik ikiki yi vuŋ anu ndi ne nai ndi ne duŋ abɛ lɔ are. 3 Fe Yesɔ ne yuŋ tu Igbu te zǝ sɔŋ ben abɛ zeu tsin. 4 Igyaŋ yi tuk glak yi Yahudawa ne te gbahir.

5 Ndi Yesɔ ne lɛk tu te yik ntsan aneshir tetɛk nyɛ ben abɔu, adi Filibus, <<Tatǝ yik borodi tetɛk ne amɛ te lɛb nek aneshir abaŋa atai?>> 6 Yesɔ ne rib amɛ ankyak te abɛ tsa ru atɔ, te ne ai ka mǝne zhi ne susun maa iki yiŋ ndi wa atei na.

7 Filibus adi Yesɔ, <<Azɔb amkplik ayaa ba te mla lɛb borodi keŋ ndi inuŋ atei yik watsɔb ba!>>

8 Inuŋ ne miŋ kɛ abɛ tsene maa ndi azhɔu te, Anduru, izumen ane Biturus, adi Yesɔ, 9 <<Tɔ vǝvǝn nuŋ agli mbwab daŋ kɛ yuk me tuŋ ben ambɛ mwɔ tsɔtsɔb amɛ ayaa, ama ba atei mla nek Ntsan aneshir abaŋa ba.>>

10 Yesɔ adi, <<Duŋ zhin aneshire azesɔŋ.>> Agǝga tetɛk ne yi ne amkpama, ankyak alulum ne zǝ sɔŋ, atei mla azhiin atuŋ. 11 Ankyak Yesɔ abaŋ mplipla la, te nyɛr Arik, te gab abaŋ ndi ne zǝ sɔŋ ir keŋ ndi tei mla ba. Tena na amɛ ne ambɛ me.

12 Ndi ne ka li kili ahri, Yesɔ adi abɛ zeu tsin amaa, <<Biŋ zhin nki kili yiŋ ndi ne dǝk. kǝr zhin bǝ duŋ ikinuŋ cɔkla ba.>> 13 Fe ne biŋ nki mplipla la bǝn ambɛ me bɔbɔk ne shak sisa mei wur aneyaa yiŋ ndi ne li te duŋǝ.

14 Ndi aneshir ne yik iki vuŋ anu ndi Yesɔ ne na, fe adi, <<Ai lɛ didik waŋ ai ine bla shar yi Arik ndi atei nyɛ gɔnmimi.>> 15 Yesɔ, ne men azhi te awɔb nyɛnu Itum ne mgbyamgbyaŋ, ankyak aduŋ ba te gar itugbu wa kiki maa.

16 Ndi amgbalu ne te abɛ zeu tsin ne gar inǝk, 17 ne amuɔ ne yir igu keŋ ndi igar ŋɔk Kafanahum. Ibu ne te Yesɔ bane zen anyɛ bǝn abǝba ba. 18 Nguŋgu ne te ngɔŋ te duŋ Amashir ne inǝk ne lu ankun. 19 Ndi ne tsin ne igumɔ gab aza tar kɔ nas, ne yik Yesɔ atsetsen ne atu amashir, te anyɛ ben abɛba ne gumɔ, ankyak sisik te ba. 20 Ama Yesɔ adi ba, <<Ai nga; kǝr te zhin sisik ba.>> 21 Ankyak ne wɔb te aba bǝ baŋu ne igumɔ, fe igumɔ yir kɔtɔŋ inǝk ne amkpa ne zi amen.

22 Ne bɛr yi ku zǝ ntsan aneshir abaŋ ndi ne klikli ne ŋɔk nek ne zhi te anak igu zhiin ndi ne kpa kɛ yak amɔ, ndi Yesɔ bǝn abɛ tsene maa ba ne yir kɛ ba, anak abɛ zeu tsin ankyak ne yir gumɔ. 23 Igu muɔtsɔtsɔb nuŋ ne rɛ Tibariya te nyɛ gbahir ne amkpa waŋ ndi aneshir ne ta mbwab daŋ ndi Yesɔ ne nyɛr Arik te nek ba ne kǝ. 24 Ndi ntsan aneshir ne zhi te Yesɔ ben abɛ zeu tsin ba yi ne amkpa ma ba, ne yir gu te gar Kafanahum te gar wɔb Yesɔ.

25 Ndi ne yigu ne ŋɔk nek yuŋ, aribu te di, <<Ne tsar, une nyɛ ayaŋa atentai?>>

26 Yesɔ adi ba, <<Mbla zhin lɛ didik, izhin wɔb me, bai lɛ kɛ yik iki yi vuŋ anu ndi mne nai ba ama ai ir keŋ ndi izhin ne ta mplipla la ihri. 27 Kǝr izhin bǝ na ndum kɛ ikili yi cɔkla ba, ama izhin bǝ wɔb ikili yiŋ ndi ba te cɔkla ba iyi nek ivli, waŋa ayi kili ndi izu neshir atei nek zhin neyi. Ndi Arik Tetɛɛ ne nǝgu mgbyamgbyaŋ kɛ na me.>>

28 Ankyak aribu te di, <<Ta tei na kikin te na ndum ndi Arik awɔb yi?>>

29 Yesɔ adi ba, <<Waŋ ayi iki yiŋ ndi Arik awɔb te abɛ nai: abɛ tanyɛmɛ bǝn iwaŋ ndi ne sharu.>>

30 Fe aribu te di, <<Ai iki vuŋ anu itei utǝ nai te ta bǝ tanyɛmɛ bǝn abɔu? Utei na anii? 31 Atsintsim amɔr ne ta kili ne zizik; <Arik ne nek ba kili kɛ rɛ gbarshu ata.>>>

32 Yesɔ adi ba, <<Mbla zhin izub, ba ne Musa wa ne nek zhin kili kɛ rɛ shu ba, ama ne yi tetɛɛ muŋ wa ne nek zhin kili didik kɛ rɛ shu. 33 kili kɛ Arik ai waŋ ndi ne zǝǝ are shu te nyɛ mimi te nek gɔnmimi ivli.>>

34 Adi, <<Ngɔŋ>> <<Ivuŋ rɛ azizaŋa nek ta kili yiŋɛ.>>

35 Ankyak Yesɔ adi ba, <<Nga myi borodi kɛ nek ivli. Iwaŋ ndi atei nyɛ ben abɛm ba te na wɔ ikasa ba, iwaŋ ndi atei na tanyɛmɛ bǝn abɛm ihre ba te na teu ba. 36 Ama ir keŋ ndi mneka mbla zhin, izhin ne yik me ama ba zhin ne tanyɛmɛ bǝn abɛm ba. 37 Bɔbɔk abaŋ ndi Tetɛɛ ne nǝm ne ba atei nyɛ ben abɛm, iwaŋ ndi ate nyɛ ben abɛm bam te yaru ba. 38 Te mne nyɛ ire gbarshu ba me na iki yi susun muŋ ba ama bǝ na iki yiŋ ndi ne shar me awɔb yi. 39 Waŋa ai ikiyiŋ ndi ne shar me awɔb yi, kǝr mbǝ tyak inuŋ ne miŋ kɛ abaŋ ndi ne nǝm aba zhɔk ba, ama mbǝ lɛk ba ne bar klɛtu. 40 Iki wɔb Tetɛɛ amuŋ ai iwaŋ ndi ate yik izu maa te na tanyɛmɛ bǝn abɔu atei yik ivli kɛ yaŋ klɛtu, Nga M tei lɛk ba ne bar klɛtu.>>

41 Ankyak Yahudawa alɛ mumur ne atu maa te di, <<Mǝ yi kili yiŋ ndi rɛ gbarshu.>> 42 Adi, <<Di waŋa ai Yesɔ kai, izu Yusuu, ndi ta ne zhi iya maa ben tetɛɛ maa? fe te na kikin di, <me rɛ gbarshu>?>>

43 Yesɔ adi ba, <<izhin bǝ duŋ lɛ zhin mumur ne akpa min.>> 44 <<Ba nuŋ ate nyɛ ben abɛm ba se waŋ ndi Tetɛɛ muŋ ne gliu anyɛ ben abɛm, fe nga M tei luk ba ngli lumɔ ne bar klɛtu. 45 Icɛr yi abɛ bla shar yi Arik idi: <<Arik atei tsar ba bɔbɔk mǝne.> waŋ ndi ate wɔ Tetɛɛ te na zǝ tsar maa anyɛ ben abɛm. 46 Ba nuŋ ne yik Arik ba se waŋ ndi are ben Arik; ne nak yik tetɛɛ ankyak. 47 Mbla zhin lɛ didik, waŋ ndi ate tanyɛmɛ ayi ne ivli kɛ yaŋ klɛ tu. 48 Myi kili yi nek ivli. 49 Atsintsim amin ne ta kili ne zizik, neme ne ku. 50 Ama kili nuŋ ire gbarshu, ndi neshir ate ta kɛ bai ku ba. 51 Me yi kili yi nek ivli ndi ire gbarshu. Iwaŋ ndi atei ta borodi kǝŋe, ba te ku ba. Ikili yiŋɛ ai ina kpa muŋ, te gɔnmimi bǝ yik ivli.>>

52 Ankyak Yahudawa ne te antam te vǝ ngɔŋ ne akpa men te di, <<Iner waŋ atei na kikin te nek ta ina kpa maa ta ta?>>

53 Yesɔ adi ba, <<Me bla zhin lɛ didik, se zhin ne ta ina kpa kɛ zu neshir te so azhizhi maa, mba amɛ ba izhin ba te yik ivli ba. 54 Iwaŋ ndi ate ta ina kpa muŋ tena so azhizhi amuŋ ayi ne ivli kɛ yaŋ klɛ tu, M tei lugu Gli lumɔ ne bar klɛ tu. 55 Tǝ ina kpa muŋ ai kili didik ben azhizhi amuŋ ai ki so didik. 56 Iwaŋ ndi ate ta ina kpa muŋ te ne so azhizhi amuŋ ayi ben abɛm, nga mne yi ben aba. 57 Ir keŋ ndi tetɛɛ tsitsir ne shar me te mne yi tsitsir ne atu maa, ne me iwaŋ ndi nga me yiu ikili maa atei yi tsitsir ne atu muŋ. 58 Waŋ ayi kili ndi ire gbarshu. Atsentsem amin ne li kili te ku, ama waŋ ndi ate li kili kǝŋe ba tei ku ba atei yi tsitsir yaŋ klɛtu.>> 59 Ne bla lǝlɛ yiŋɛ ne zen tsar ne Akaba ne Kafanahum.

60 Abɛ zǝ Yesɔ tsen anuŋ tetɛk ne wɔ amɛ te di, <<Waŋ ayi tsar yi lɔmɔ. Iŋɔwa atei zhi?>>

61 Yesɔ ne zhi te abɛ zeu tsin azǝn lɛ mumur, adi ba, <<Ilɛ kǝŋe ne cɔk asusun min lai? 62 Ate yiŋ ndi zhin te yik izu neshir azǝ rɛ amkpa waŋ ndi amene yime! 63 Izhu Arik inǝk vli; mgbyamgbyaŋ kɛ neshir ba nek iki nuŋ ba. Ilɛ keŋ ndi lɛ zhin ai Izhu ndi inǝk ivli. 64 Neme anuŋ ne miŋ min ba ne tanyɛmɛ ne lɛ muŋ ba.>> Yesɔ ne mǝne zhi ne kuti ai ŋɔwa ne miŋ men ba ne tanyɛmɛ bǝn abɔu ba te na zhi ai ŋɔwa ate baŋ wa alɛb abɛ te zor ben abɔu. 65 Yesɔ ne na di ba, <<Waŋ ai iki yiŋ ndi mne bla zhin ba nuŋ atei nyɛ ben abɛm ba se Tetɛɛ ne duŋu anyɛ.>>

66 Ire mkpaŋ yuŋɔ anuŋ abɛ zǝ Yesɔ tsen anuŋ ne duŋǝ ba ne na zeu ba.

67 Yesɔ arib abɛ na ndum amaa awur ane yaa te di, <<Izhin wɔb te zhin bǝ duŋ me, minyii?>>

68 Siman Biturus atanyeu ma te di, <<Arik, ta tei gar ben iŋɔwai? Uyi ne ivli kɛ yaŋ klɛtu. 69 Tane tanyɛmɛ te zhi te uyi tsetser ndi are ben Arik.>>

70 Ankyak Yesɔ adi, <<Bai nga ne hria zhin, awur ane yaa kai? ama izhin ne miŋ min ai shetan!>> 71 (Adi Yahuda skariyoti izu siman, waŋ ndi, ne yi ne miŋ kɛ awur ane yaa, ai wa atei baŋ Yesɔ alɛb.)